Shiva Puja: పరమేశ్వరుడిని ఆరాధించే భక్తులు తప్పకుండా ఉపయోగించే పత్రం బిల్వ పత్రం, దీనిని తెలుగులో మారేడు దళం అని పిలుస్తారు. శివుడు 'అభిషేక ప్రియుడు' కాగా, ఆయనకు మారేడు దళాలతో చేసే పూజ అంటే మహా ప్రీతి. శివారాధనలో ఈ పత్రానికి ఉన్న ప్రాముఖ్యత అపారం. శివ పురాణం ప్రకారం, మారేడు వృక్షం సాక్షాత్తు శివ స్వరూపంగా భావించబడుతుంది. మారేడు దళం లేనిదే శివుని పూజ అసంపూర్ణమని శాస్త్ర వచనం. సాధారణంగా మూడు ఆకులు కలిపి ఉండే మారేడు దళాన్ని త్రిదళం అని కూడా అంటారు. ఈ మూడు ఆకులు త్రిమూర్తులైన బ్రహ్మ, విష్ణు, మహేశ్వరులకు లేదా శివుడి త్రినేత్రాలకు ప్రతీకగా భావిస్తారు. "ఏక బిల్వం శివార్పణం" అంటూ ఒక్క మారేడు దళాన్ని భక్తితో శివుడికి సమర్పించినా, ఘోరమైన పాపాలు సైతం తొలగిపోతాయని, భక్తుల కోరికలు నెరవేరుతాయని ప్రగాఢ విశ్వాసం. స్కంద పురాణం ప్రకారం ఈ మారేడు చెట్టు పార్వతీదేవి చెమట నుంచి పుట్టిందని చెబుతారు. జాతకంలో శని దోషం ఉన్నవారు బిల్వ పత్రాలతో శివుడిని పూజిస్తే దోష నివారణ జరుగుతుందని కూడా పురాణాల ద్వారా తెలుస్తోంది. బిల్వ పత్రమే కాకుండా, కొన్ని ప్రత్యేక సమయాల్లో లేదా ప్రత్యేక ఫలితాల కోసం ఇతర పత్రాలను కూడా శివ పూజలో ఉపయోగిస్తారు. అయితే, ఈ పత్రాలన్నిటిలో మారేడు దళానికి ఉన్న స్థానం అత్యంత శ్రేష్ఠమైనది, ముఖ్యమైనది. శివ పూజ చేసేటప్పుడు బిల్వ పత్రాలను తప్పకుండా సమర్పించడం అనేది భక్తులు పాటించే ప్రధాన నియమాలలో ఒకటిగా ఉంది.
