Goda Ranganatha Kalyanam: హిందూ సంప్రదాయంలో సంక్రాంతి సంబరాల తొలి రోజైన భోగి పర్వదినానికి ఒక విశిష్టమైన ఆధ్యాత్మిక ప్రాముఖ్యత ఉంది. ఈ రోజున గోదా దేవి (ఆండాళ్ అమ్మవారు) తన కఠినమైన ధనుర్మాస వ్రతాన్ని పూర్తి చేసి, తాను ప్రేమించిన శ్రీ రంగనాథ స్వామిని వివాహం చేసుకున్నట్లు పురాణాలు చెబుతున్నాయి. ఈ అద్భుత ఘట్టాన్ని స్మరిస్తూ భోగి రోజున ఆలయాల్లో నిర్వహించే గోదా రంగనాథ కళ్యాణం భక్తులకు కనువిందు చేయడమే కాకుండా, సకల శుభాలను చేకూరుస్తుందని ప్రతీతి. ఆధ్యాత్మికంగా ఈ కళ్యాణానికి ఎంతో ప్రాముఖ్యత ఉంది. వివాహ ప్రయత్నాల్లో ఉన్నవారు లేదా వివాహం ఆలస్యమవుతున్న వారు ఈ దివ్య కళ్యాణాన్ని దర్శించుకోవడం వల్ల అడ్డంకులు తొలగిపోతాయని భక్తుల ప్రగాఢ విశ్వాసం. అంతేకాకుండా, ఇప్పటికే వివాహమైన దంపతులు ఈ వేడుకలో పాల్గొనడం వల్ల వారి మధ్య అన్యోన్యత పెరుగుతుందని, కుటుంబంలో శాంతి సౌఖ్యాలు వర్ధిల్లుతాయని పెద్దలు చెబుతుంటారు. ఈ వేడుక కేవలం ఒక వివాహ మహోత్సవం మాత్రమే కాకుండా, జీవాత్మ (గోదా దేవి) పరమాత్మలో (రంగనాథుడు) లీనమయ్యే పరమ పవిత్ర ప్రక్రియకు ప్రతీకగా నిలుస్తుంది. ఈ భోగి పర్వదినాన్ని పురస్కరించుకుని వేదమందిరంలో అత్యంత వైభవంగా గోదా రంగనాథుల కళ్యాణ మహోత్సవం నిర్వహించబడుతోంది. వేద మంత్రోచ్ఛారణల మధ్య, శాస్త్రోక్తంగా జరిగే ఈ కళ్యాణ వేడుకలో పాల్గొనడం ద్వారా భక్తులు ఆ దివ్య దంపతుల అనుగ్రహాన్ని నేరుగా పొందవచ్చు
