Hanuman Jayanti 2026: హనుమాన్ జయంతి 2026: వాయుపుత్రుడి ఆశీస్సుల కోసం ఇలా పూజించండి.. శుభ సమయం, విశిష్టతలివే..

Hanuman Jayanti 2026: దుష్టశిక్షణ, శిష్టరక్షణ కోసం త్రేతాయుగంలో జన్మించిన ఆంజనేయ స్వామి పుట్టినరోజునే మనం హనుమాన్ జయంతిగా జరుపుకుంటాం. ప్రతి ఏడాది చైత్ర మాస పౌర్ణమి నాడు వచ్చే ఈ పర్వదినం, ఈ ఏడాది (2026) ఏప్రిల్ మొదటి వారంలో రానుంది. భక్తుల కష్టాలను తీర్చి, ధైర్యాన్ని ప్రసాదించే ఆంజనేయుడిని పూజించడానికి ఏ సమయం అనుకూలమో ఇక్కడ తెలుసుకోండి.

ముహూర్తం మరియు తిథి వివరాలు:

ఈ ఏడాది హనుమాన్ జయంతి ఏప్రిల్ 1వ తేదీ పౌర్ణమి ఉదయం ప్రారంభమై, ఏప్రిల్ 2వ తేదీ ఉదయం వరకు ఉంటుంది.

పూజకు అనువైన సమయం:

పౌర్ణమి తిథి ఉన్న ఏప్రిల్ 1వ తేదీ ఉదయం పూట పూజలు, ఆచారాలు నిర్వహించుకోవడం అత్యంత శుభప్రదమని పండితులు చెబుతున్నారు.

పూజా విధానం - నియమాలు:

శుద్ధి: హనుమాన్ జయంతి రోజున ఉదయాన్నే నిద్రలేచి తలస్నానం చేసి, శుభ్రమైన వస్త్రాలు ధరించాలి.

అలంకరణ: స్వామివారికి కుంకుమ, సింధూరం అంటే చాలా ఇష్టం. కాబట్టి ఆంజనేయుడి విగ్రహానికి లేదా పటానికి కుంకుమ అలంకరించి, పువ్వులు మరియు మిఠాయిలను సమర్పించాలి.

పారాయణం: ఈ రోజున హనుమాన్ చాలీసా లేదా సుందరకాండ పఠించడం వల్ల మానసిక బలం పెరుగుతుంది. నెయ్యితో దీపం వెలిగించి హారతి ఇవ్వాలి.

ఉపవాసం: ఈ రోజు ఉపవాసం ఉండటం వల్ల ప్రతికూల శక్తులు తొలగిపోయి, ఆత్మవిశ్వాసం పెరుగుతుందని భక్తుల నమ్మకం.

విశేష నైవేద్యాలు - ఫలితాలు:

హనుమంతుడిని ప్రసన్నం చేసుకోవడానికి కొన్ని ప్రత్యేక మాలలను సమర్పిస్తుంటారు..

వడమాల: జీవితంలోని ఆటంకాలు, కష్టాల నుండి విముక్తి పొందడానికి స్వామివారికి వడమాల సమర్పించడం ఆనవాయితీ.

పోకచెక్క దండ: వ్యాపారంలో విజయం సాధించాలన్నా, తెలివితేటలు పెరగాలన్నా పోకచెక్కలతో చేసిన దండను సమర్పించడం శుభప్రదం.

ఆకుపూజ: తమలపాకులతో పూజ చేయడం వల్ల కార్యసిద్ధి కలుగుతుంది.

వీలైతే సమీపంలోని హనుమాన్ ఆలయాన్ని సందర్శించి ప్రత్యేక ప్రార్థనల్లో పాల్గొనడం వల్ల వాయుపుత్రుడి సంపూర్ణ అనుగ్రహం లభిస్తుంది.