Tirumala: తిరుమలలో పెరిగిన భక్తుల రద్దీ.. సర్వదర్శనానికి 12 గంటల నిరీక్షణ

Tirumala: తిరుమల శ్రీ వేంకటేశ్వరస్వామి వారి దర్శనానికి భక్తుల రద్దీ పెరిగింది. సర్వదర్శనం కోసం వచ్చిన భక్తులు సుమారు 12 గంటలు వేచి ఉండాల్సి వస్తోంది.

సోమవారం సాయంత్రం 5 గంటల వరకు ఉన్న సమాచారం ప్రకారం వైకుంఠం క్యూకాంప్లెక్స్-2లోని 31 కంపార్ట్‌మెంట్లు, నారాయణగిరిలోని 9 షెడ్లు సర్వదర్శన భక్తులతో నిండిపోయాయి. క్యూలైన్ కృష్ణతేజ సర్కిల్ వరకు విస్తరించింది. అదే సమయంలో వైకుంఠం క్యూకాంప్లెక్స్-1లో 6 కంపార్ట్‌మెంట్లలో టైం స్లాట్ భక్తులు వేచి ఉన్నారు.

గత శని, ఆదివారాల్లో మొత్తం 1.58 లక్షల మంది భక్తులు శ్రీవారిని దర్శించుకున్నారు. ఈ రెండు రోజుల్లో హుండీ ఆదాయం రూ.7.35 కోట్లు నమోదైంది. అలాగే 52 వేల మంది భక్తులు శ్రీవారికి తలనీలాలు సమర్పించారు.

తిరుమలలో రద్దీ పెరుగుతున్న నేపథ్యంలో టీటీడీ అధికారులు భక్తులకు అనుకూలంగా అన్ని ఏర్పాట్లు చేస్తున్నారు. భక్తులు సమయానికి రావాలని, అవసరమైన సమాచారం కోసం అధికారిక మూలాలను సంప్రదించాలని సూచిస్తున్నారు.