Thulabharam at Tirumala: కలియుగ ప్రత్యక్ష దైవం శ్రీ వేంకటేశ్వర స్వామిని దర్శించుకునేందుకు ఏడు కొండలకు వచ్చే భక్తులు తమ కోరికలు తీరిన తరువాత రకరకాల మొక్కులు చెల్లించుకుంటారు. వాటిలో 'తులాభారం' అనేది ఒక ప్రత్యేకమైన, పురాతనమైన సంప్రదాయం. సంస్కృతంలో 'తుల' అంటే త్రాసు అని అర్థం. ఈ తులాభారం ద్వారా భక్తులు తమ శరీర బరువుకు సమానమైన ధనాన్ని లేదా వస్తువులను స్వామివారికి సమర్పించడం అనాదిగా వస్తున్న ఆచారం.
భక్తులు సాధారణంగా ఏదైనా అనారోగ్యం బారిన పడినప్పుడు, ముఖ్యంగా సంతానం కలగాలని కోరుకున్నప్పుడు శ్రీవారిని వేడుకుంటారు. "తమ కోరిక నెరవేరితే, లేదా తమకు పుట్టిన బిడ్డ బరువుకు సమానమైన బెల్లం/పంచదార/నాణేలను సమర్పిస్తామని" మొక్కుకుంటారు. ఆ కోరిక తీరిన తరువాత, కృతజ్ఞతగా తమ మొక్కుబడిని తులాభారం రూపంలో చెల్లిస్తారు. అంటే, ఇది దేవుడికి భక్తుడు తన నమ్మకాన్ని, కృతజ్ఞతను వ్యక్తం చేసే ఒక పద్ధతి.
తులాభారం అనే సంప్రదాయం ద్వాపర యుగం నుంచే ఉందని పురాణాలు చెబుతున్నాయి. ముఖ్యంగా శిబి చక్రవర్తి తన శరణు వేడిన పావురాన్ని రక్షించడానికి, ఆ డేగకు బరువుకు సమానమైన మాంసాన్ని తులభారంగా త్రాసులో పెట్టి దానం చేసిన వృత్తాంతం దీనికి ఒక ఉదాహరణ. అలాగే, శ్రీ కృష్ణుడు, సత్యభామల 'శ్రీకృష్ణ తులాభారం' కథ కూడా ఈ ఆచారానికి ప్రాధాన్యతను పెంచింది. ఈ ఉదాహరణలన్నీ, తన శక్తికి మించిన భక్తిని, త్యాగాన్ని సూచిస్తాయి.
తిరుమల శ్రీవారి ఆలయంలోని మహాద్వారం దాటిన తరువాత రంగనాయక మండపం ముందు భాగాన తులాభారం వేయడానికి టీటీడీ ప్రత్యేకంగా ఏర్పాటు చేసింది. భక్తులు తాము మొక్కుకున్న వ్యక్తిని ఒకవైపున కూర్చోబెట్టి, మరోవైపున వారి బరువుకు సరిపడా బెల్లం, పంచదార, పటిక బెల్లం, నాణేలు లేదా బియ్యం వంటి వస్తువులను కొలుస్తారు. ఈ వస్తువులకు సంబంధించిన డబ్బును టీటీడీకి చెల్లించి, రసీదు తీసుకుని హుండీలో వేయవచ్చు.
