Making These Puja Mistakes: పూజ చేసేటప్పుడు ఈ పొరపాట్లు చేస్తున్నారా? ఈ 6 పవిత్ర వస్తువులను నేరుగా నేలపై ఉంచితే దోషం తప్పదు

Making These Puja Mistakes: హిందూ సంప్రదాయంలో నిత్య పూజలకు, మతపరమైన ఆచారాలకు అత్యంత ప్రాముఖ్యత ఉంది. అయితే, పూజలు చేసే విధానంలో కొన్ని శాస్త్ర నియమాలను పాటించడం తప్పనిసరి. మనం ఉపయోగించే పవిత్ర వస్తువులను ఎక్కడ పడితే అక్కడ ఉంచడం దోషంగా పరిగణించబడుతుంది. ముఖ్యంగా కొన్ని పవిత్రమైన వస్తువులను, దేవుడి ప్రతిమలను నేరుగా నేలపై పెట్టడం వల్ల ఇంట్లో ప్రతికూల శక్తులు ప్రవేశించి, దారిద్య్రానికి దారితీస్తుందని విశ్వసిస్తారు. అందుకే వాటిని ఎల్లప్పుడూ ఒక పీఠం, పళ్లెం లేదా పవిత్ర వస్త్రంపైనే ఉంచాలని శాస్త్రాలు చెబుతున్నాయి.

ఆ 6 పవిత్ర వస్తువులు ఏమిటి? వాటిని ఎలా భద్రపరచాలో పరిశీలిస్తే...

దేవతా విగ్రహాలు - చిత్రపటాలు

పూజ గదిలో దేవుడి విగ్రహాలను ఎట్టిపరిస్థితుల్లోనూ నేరుగా నేలపై పెట్టకూడదు. వాటిని శుభ్రమైన చెక్క పీఠం, ఎత్తైన వేదిక లేదా రాగి, వెండి పళ్లాలలో మాత్రమే ఉంచి పూజించాలి.

పవిత్ర శంఖం

శంఖాన్ని సాక్షాత్తూ లక్ష్మీదేవి, నారాయణుడి స్వరూపంగా భావిస్తారు. పూజకు ఉపయోగించే శంఖాన్ని నేలపై ఉంచడం లక్ష్మీదేవిని అగౌరవపరచడమే అవుతుంది. పూజ పూర్తయ్యాక దాన్ని శుభ్రమైన ఎర్రటి వస్త్రంపై లేదా ప్రత్యేక పళ్లెంలో ఉంచడం శ్రేయస్కరం.

వెలిగించిన దీపం

దీపం పరబ్రహ్మ స్వరూపం, సానుకూలతకు ప్రతీక. పూజ సమయంలో లేదా తర్వాత వెలుగుతున్న దీపాన్ని నేరుగా నేలపై పెట్టకూడదు. దీపం కింద కొన్ని అక్షతలు (బియ్యం), తమలపాకు, చెక్క పీట లేదా చిన్న పళ్లెం ఉంచి దానిపై మాత్రమే దీపాన్ని ప్రతిష్ఠించాలి.

శాలిగ్రామం - శివలింగం

శాలిగ్రామం, శివలింగం అపారమైన దైవశక్తి కలిగిన ప్రతీకలు. వీటిని ఇంట్లో పూజించేవారు నేలను తాకించకూడదు. ఎల్లప్పుడూ రాగి, ఇత్తడి లేదా వెండి పాత్రలను అర్ఘ్యపాత్రగా ఉపయోగించి, పీఠంపై ఉంచాలి.

పవిత్ర గ్రంథాలు

భగవద్గీత, రామాయణం, మహాభారతం వంటి ధార్మిక గ్రంథాలు జ్ఞానానికి చిహ్నాలు. పారాయణం చేసేటప్పుడు వాటిని చేతుల్లో పట్టుకోవడం లేదా ప్రత్యేకమైన చెక్క స్టాండ్‌ (వ్యాసపీఠం), శుభ్రమైన వస్త్రంపై ఉంచి చదవాలి తప్ప నేలపై పెట్టకూడదు.

బంగారు ఆభరణాలు

బంగారాన్ని లక్ష్మీదేవి ప్రత్యక్ష రూపంగా కొలుస్తారు. నగలను తీసిన వెంటనే నేలపై లేదా కింద పడేయడం వల్ల సిరిసంపదలు తరిగిపోతాయని నమ్ముతారు. వాటిని ఎల్లప్పుడూ శుభ్రమైన డబ్బాలో లేదా మెత్తని వస్త్రంలో భద్రపరచాలి.

పొరపాటున కింద పడితే ఏం చేయాలి?

ఒకవేళ పూజ గదిని శుభ్రం చేసేటప్పుడో లేదా చేయి జారో ఈ పవిత్ర వస్తువులు నేలపై పడితే ఆందోళన చెందాల్సిన పనిలేదు. వెంటనే వాటిని చేతుల్లోకి తీసుకుని, గంగాజలం లేదా పవిత్ర జలంతో ప్రోక్షించాలి. మనసులోనే భగవంతుడిని క్షమాపణ కోరుకుని, యథావిధిగా పీఠంపై ఉంచి పూజా కార్యక్రమాలు కొనసాగించవచ్చు.