Visiting a Temple: ఆలయానికి వెళ్లినప్పుడు మనం కొన్ని నియమాలు పాటించడం చాలా ముఖ్యం. దీనివల్ల మన భక్తి దేవుడికి చేరుతుందని, ఆలయ పవిత్రతకు భంగం కలగకుండా ఉంటుందని పెద్దలు చెబుతారు. ఆలయం లోపల చెప్పులు ధరించకూడదు. వాటిని బయట నిర్దేశించిన స్థలంలో ఉంచాలి. ఇది ఆలయ పవిత్రతకు చిహ్నం.
ఆలయానికి శుభ్రమైన దుస్తులు ధరించి వెళ్లాలి. మాంసాహారం తిన్న తర్వాత, లేదా అశుద్ధమైన స్థితిలో గుడికి వెళ్ళడం తప్పు. ఆలయానికి వెళ్లేటప్పుడు సంప్రదాయబద్ధమైన దుస్తులు ధరించాలి. పొట్టి దుస్తులు, చేతులు, భుజాలు కనిపించే దుస్తులు ధరించడం మంచిది కాదు. ఆలయంలో ఉన్నప్పుడు దేవుడిపై ధ్యాస పెట్టాలి. అనవసరమైన మాటలు, పెద్దగా నవ్వడం, అల్లరి చేయడం, ఫోన్‌లో మాట్లాడటం వంటివి చేయకూడదు. ఇది ఇతరుల భక్తికి ఆటంకం కలిగిస్తుంది. ఆలయంలో లేదా దాని పరిసర ప్రాంతాల్లో మద్యం సేవించడం, ధూమపానం చేయడం, గుట్కా నమలడం వంటివి పూర్తిగా నిషేధం.
దేవాలయంలో ఉన్న వస్తువులను తాకడం, వాటికి నష్టం కలిగించడం, అశుభ్రం చేయడం చేయకూడదు. అలాగే విగ్రహాలను తాకకూడదు. దేవుడి విగ్రహానికి ఎదురుగా కూర్చుని కాళ్ళు చాపడం అగౌరవంగా భావిస్తారు. అలాగే, విగ్రహానికి వెన్ను చూపించి కూర్చోవడం కూడా తప్పు. ప్రదక్షిణలు చేసేటప్పుడు దేవుడికి వ్యతిరేక దిశలో తిరగకూడదు. ఎప్పుడూ సవ్యదిశలో (కుడి వైపు నుండి) మాత్రమే తిరగాలి. ఆలయానికి వెళ్ళినప్పుడు కనీసం పూలు లేదా పళ్ళు వంటివి తీసుకెళ్లడం మంచిది. ఖాళీ చేతులతో వెళ్లకూడదు. ఈ నియమాలను పాటించడం ద్వారా ఆలయం యొక్క పవిత్రతను కాపాడటంతో పాటు, మన మనసును దైవ భక్తిపై కేంద్రీకరించవచ్చు.
