Shani Jayanti Special: శని జయంతి స్పెషల్: మీ కర్మల ప్రకారమే ఫలితాలిచ్చే కర్మ ప్రదాత.. శని దేవుని ఆగ్రహం తగ్గాలంటే ఈ చిన్న పరిహారాలు చేయండి..

Shani Jayanti Special: హిందూ క్యాలెండర్ ప్రకారం జ్యేష్ఠ అమావాస్య రోజున శని జయంతిని జరుపుకుంటారు. నవగ్రహాలలో శని దేవుడిని కర్మ ఫలదాత అని పిలుస్తారు. మనం చేసే మంచి, చెడు కర్మల ఆధారంగానే శని దేవుడు మనకు ఫలితాలను ఇస్తాడు. ఒక రకంగా చెప్పాలంటే మనిషిని తప్పుడు మార్గం నుండి సరైన మార్గంలోకి మళ్లించి, మంచి వ్యక్తిగా తీర్చిదిద్దడమే శని దేవుని ముఖ్య ఉద్దేశం. అందుకే ఈ పవిత్రమైన రోజున శని దేవుడిని భక్తితో ఆరాధిస్తే జాతకంలోని దోషాలు తొలగిపోయి, జీవితంలో సుఖశాంతులు కలుగుతాయని వేద పండితులు చెబుతున్నారు.

శని జయంతి రోజున శని దేవుని అనుగ్రహం కోసం, జాతకంలో శని దుష్ప్రభావాలను తగ్గించుకోవడానికి సాయంత్రం పూట చేయాల్సిన కొన్ని ముఖ్యమైన పరిహారాలు ఇక్కడ ఉన్నాయి..

హనుమంతుడిని పూజించండి – శని దోషాలకు తక్షణ విరుగుడు

శని దేవుని ఆగ్రహం నుండి తప్పించుకోవడానికి హనుమదారాధన అత్యంత శ్రేష్టమైన మార్గం.

వాగ్దానం: తనను (ఆంజనేయుడిని) పూజించే భక్తులను తాను ఎప్పటికీ ఇబ్బంది పెట్టనని శని దేవుడు స్వయంగా హనుమంతునికి వాగ్దానం చేసినట్లు పురాణాలు చెబుతున్నాయి.

పరిహారం: ప్రతి శనివారం లేదా మంగళవారం హనుమాన్ ఆలయాన్ని సందర్శించి, హనుమాన్ చాలీసా పఠించాలి. స్వామివారికి సింధూరం మరియు మల్లె నూనె సమర్పించడం వల్ల శని దోషాల తీవ్రత తక్షణమే తగ్గుతుంది.

మర్రి చెట్టు పూజ

మర్రి చెట్టును పూజించడం వల్ల శని దేవుడు ప్రసన్నుడవుతాడు. శని జయంతి రోజున ప్రశాంతమైన మనస్సుతో మర్రి చెట్టు చుట్టూ ఏడుసార్లు (7 సార్లు) ప్రదక్షిణలు చేయాలి. ఆ సమయంలో "ఓం శం శనైశ్చరాయ నమః" అనే మంత్రాన్ని మనసులో జపించడం వల్ల కీడు తొలగిపోయి మేలు జరుగుతుంది.

మంచి పనులు - దానధర్మాలు

శని దేవుడు కేవలం పూజలకే కాదు.. మనం చేసే సత్కర్మలకు మాత్రమే లొంగుతాడు.

ఉద్దేశపూర్వకంగా ఎవరికీ హాని చేయకుండా ఉండటం, ఇతరులను క్షమించే గుణాన్ని అలవర్చుకోవడం చాలా ముఖ్యం.

పేదరికంతో బాధపడుతున్న వారికి, అనాథలకు, శారీరక వికలాంగులకు మీ శక్తి కొలది సహాయం చేయడం, నల్లటి వస్తువులు లేదా అన్నదానం చేయడం వల్ల శని దేవుని అనుగ్రహం లభిస్తుంది.

జపించవలసిన శక్తివంతమైన మంత్రం

శని దేవుని మంత్రాలను పఠించడం వల్ల మనసులోని భయాలు తొలగిపోయి ఆత్మవిశ్వాసం పెరుగుతుంది.

మంత్రం: "ఓం శం శనైశ్చరాయ నమః"

శనివారం రోజున లేదా శని జయంతి రోజున కనీసం ఒక్కసారైనా రుద్రాక్ష మాలను ఉపయోగించి ఈ మంత్రాన్ని జపించాలి. దీనిని 108 సార్లు జపించడం అత్యంత ఉత్తమమైన ఫలితాలను ఇస్తుంది.