Tirumala Venkateswara Temple: మార్చి 17న తిరుమలలో వీఐపీ బ్రేక్ దర్శనాలు రద్దు!

Tirumala Venkateswara Temple: తిరుమల శ్రీ వేంకటేశ్వరస్వామి వారి ఆలయంలో మార్చి 19న జరగనున్న 'ఉగాది ఆస్థానాన్ని' పురస్కరించుకుని, మార్చి 17వ తేదీ మంగళవారం నాడు 'కోయిల్‌ ఆళ్వార్‌ తిరుమంజనం' అత్యంత వైభవంగా నిర్వహించనున్నారు. సాధారణంగా ఉగాది, ఆణివార ఆస్థానం, బ్రహ్మోత్సవాలు మరియు వైకుంఠ ఏకాదశి వంటి పర్వదినాలకు ముందు వచ్చే మంగళవారం నాడు ఆలయ శుద్ధి కార్యక్రమాన్ని (తిరుమంజనం) నిర్వహించడం ఆనవాయితీగా వస్తోంది.

ఈ ప్రత్యేక కార్యక్రమాల నేపథ్యంలో తిరుమల తిరుపతి దేవస్థానం (TTD) భక్తుల సౌకర్యార్థం మరియు ఆలయ నిర్వహణ కోసం కొన్ని దర్శనాలను రద్దు చేసింది:

మార్చి 17 (మంగళవారం): కోయిల్ ఆళ్వార్ తిరుమంజనం కారణంగా వీఐపీ బ్రేక్ దర్శనాలు, అష్టదళ పాదపద్మారాధన సేవలను రద్దు చేశారు. దీనివల్ల మార్చి 16వ తేదీన ప్రోటోకాల్ ప్రముఖులకు మినహా మిగిలిన వారికి వీఐపీ బ్రేక్ దర్శనాల సిఫార్సు లేఖలు స్వీకరించబడవు.

మార్చి 19 (గురువారం): ఉగాది ఆస్థానం సందర్భంగా కేవలం ప్రోటోకాల్ ప్రముఖులకు మాత్రమే అనుమతి ఉంటుంది. మిగిలిన అందరికీ వీఐపీ బ్రేక్ దర్శనాలు రద్దు చేయడమైనది. ఈ నేపథ్యంలో మార్చి 18వ తేదీన ఎలాంటి సిఫార్సు లేఖలను స్వీకరించరు.

ఈ రెండు రోజుల్లో తిరుమలకు వెళ్లే భక్తులు ఈ మార్పులను గమనించి తమ ప్రయాణాన్ని ప్లాన్ చేసుకోవాలని టీటీడీ సూచించింది. సామాన్య భక్తులకు సర్వదర్శనం యథావిధిగా కొనసాగుతుంది.