TTD Warns: శ్రీవారి దర్శనాలు, వసతి కోసం దళారులను నమ్మి మోసపోవద్దు : టీటీడీ

TTD Warns: కలియుగ దైవం శ్రీ వేంకటేశ్వరస్వామి వారి దర్శనం, తిరుమలలో వసతి గదులు ఇప్పిస్తామంటూ ఇటీవల కొందరు దళారులు భక్తులను మోసం చేస్తున్న సంఘటనలు ఎక్కువవుతున్నాయి. ఈ నేపథ్యంలో మధ్యవర్తులు, దళారుల మాటలను అస్సలు నమ్మవద్దని తిరుమల తిరుపతి దేవస్థానం (టీటీడీ) భక్తులకు మరోసారి గట్టిగా విజ్ఞప్తి చేసింది. భక్తులను మోసం చేస్తున్న ఇలాంటి వారిపై టీటీడీ ప్రత్యేక దృష్టి పెట్టి కఠిన చర్యలు తీసుకుంటున్నప్పటికీ, కొందరు దళారులు మోసపూరితమైన మాటలతో భక్తులను నమ్మించి, వారి వద్ద నుండి డబ్బులు తీసుకుని పారిపోతున్నారు. శ్రీవారిపై ఉన్న భక్తితో, స్వామి దర్శనం కోసం ఆరాటపడే భక్తుల బలహీనతను ఆసరాగా చేసుకుని మోసాలకు పాల్పడే వారు ఎంతటి వారైనా సరే వారిపై చాలా కఠినంగా వ్యవహరిస్తామని టీటీడీ హెచ్చరించింది. ఒకవేళ ఎవరైనా దర్శనం లేదా గదుల పేరుతో మిమ్మల్ని మోసం చేయడానికి సంప్రదిస్తే, వెంటనే టీటీడీ టోల్ ఫ్రీ నెంబర్ 155257 కు ఫోన్ చేసి ఫిర్యాదు చేయాలని భక్తులను కోరింది.

మరోవైపు తిరుమలలో వయోవృద్ధుల (సీనియర్ సిటిజన్స్) దర్శనానికి సంబంధించి గత కొంతకాలంగా సోషల్ మీడియాలో కొన్ని తప్పుడు వార్తలు, పుకార్లు విపరీతంగా చక్కర్లు కొడుతున్నాయి. ఈ వార్తల్లో ఎలాంటి నిజం లేదని, అవన్నీ పూర్తిగా అవాస్తవాలని టీటీడీ స్పష్టం చేసింది. వయోవృద్ధులు, దివ్యాంగుల సౌకర్యార్థం టీటీడీ ప్రతిరోజూ 1000 మంది కోసం మూడు నెలల ముందుగానే ఆన్‌లైన్‌లో ప్రత్యేక కోటాను విడుదల చేస్తోంది. ఈ కోటా ద్వారా టికెట్ పొందిన భక్తులకు కేవలం యాభై రూపాయలకే ఒక లడ్డూను కూడా ఉచితంగా అందజేస్తారు. టికెట్లు ఉన్న భక్తులను తిరుమలలోని తిరుమల నంబి ఆలయానికి ఆనుకుని ఉన్న సీనియర్ సిటిజన్ లేదా పిహెచ్‌సి ప్రత్యేక లైన్ ద్వారా ప్రతిరోజూ మధ్యాహ్నం 3 గంటలకు శ్రీవారి దర్శనానికి అనుమతిస్తారు.

కాబట్టి సోషల్ మీడియాలో ప్రచారం అవుతున్న ఎలాంటి తప్పుడు వార్తలను లేదా వదంతులను నమ్మవద్దని టీటీడీ భక్తులకు మరోమారు విజ్ఞప్తి చేస్తోంది. శ్రీవారి దర్శనం, వసతి, ఇతర సేవల గురించిన సరైన మరియు అధికారిక సమాచారం కోసం భక్తులు కేవలం టీటీడీ అధికారిక వెబ్‌సైట్లు అయిన www.tirumala.org లేదా https://ttdevastanams.ap.in లను మాత్రమే సంప్రదించాలని కోరింది. దళారులు, మధ్యవర్తుల మాయమాటలు నమ్మి డబ్బులు పోగొట్టుకుని మోసపోవద్దని భక్తులకు గట్టిగా సూచించింది.