Vinayaka Chavithi 2026: వినాయక చవితి 2026.. ఇంట్లో బొజ్జ గణపయ్య ప్రతిష్ఠాపన.. వాస్తు ప్రకారం పాటించాల్సిన ముఖ్య నియమాలు
ముఖ్య నియమాలు
Vinayaka Chavithi 2026: భాద్రపద శుద్ధ చవితి వేళ సమస్త విఘ్నాలను తొలగించి, సకల శుభాలను అందించే గణనాథుడిని భక్తులు అత్యంత భక్తిశ్రద్ధలతో ఇళ్లకు ఆహ్వానించేందుకు సిద్ధమవుతున్నారు. ఈ ఏడాది సెప్టెంబర్ 14న వినాయక చవితి పర్వదినం ప్రారంభం కానుంది. అయితే ఇంట్లో గణపతిని కొలువుదీర్చేటప్పుడు పూజా విధానాలతో పాటు సరైన వాస్తు నియమాలను పాటించడం వల్ల ఇంట్లో సుఖసంతోషాలు, సిరిసంపదలు వెల్లివిరుస్తాయని ఆధ్యాత్మిక నిపుణులు చెబుతున్నారు.
ప్రతిష్ఠాపనకు శ్రేష్ఠమైన దిశ ఏది?
వాస్తు రీత్యా దైవారాధనకు ఈశాన్య మూల అత్యుత్తమ స్థానం. గణపతి విగ్రహాన్ని ఈశాన్యంలో ఉంచడం వల్ల ఇంట్లోకి సానుకూల శక్తులు ప్రవేశిస్తాయి. ఒకవేళ ఇంట్లో ఈశాన్య భాగంలో స్థలం అనుకూలించకపోతే, ఉత్తర లేదా పశ్చిమ దిశలలో కూడా విగ్రహాన్ని ప్రతిష్ఠించుకోవచ్చు.
స్వామి ముఖం, వీపు ఎటువైపు ఉండాలి?
గణపతిని ప్రతిష్ఠించే సమయంలో ఆయన ముఖం ఎల్లప్పుడూ ఇంటి లోపలి భాగాన్ని చూస్తున్నట్లుగా ఉండాలి. పురాణాల ప్రకారం, విఘ్నేశ్వరుడి ముందు భాగంలో లక్ష్మీదేవి కొలువై ఉంటుందని, ఆయన వెనుక భాగంలో దారిద్ర్యం ఉంటుందని ఒక విశ్వాసం. అందువల్ల స్వామివారి వీపు భాగం ఎప్పుడూ ఇంటి గోడను ఆనుకుని ఉండాలి తప్ప, ప్రధాన గదులు, హాల్ లేదా బహిరంగ ప్రదేశాల వైపు నేరుగా కనిపించకుండా జాగ్రత్తపడాలి.
విగ్రహం ఎంపిక - ఏర్పాటు చేసే స్థలం
మట్టి విగ్రహానికే తొలి ప్రాధాన్యం
పర్యావరణ పరిరక్షణతో పాటు శాస్త్రోక్తంగా నిమజ్జనం చేయడానికి వీలుగా ఉండే సహజసిద్ధమైన మట్టి గణపతినే ఇంటికి తీసుకురావడం అత్యంత శ్రేయస్కరం.
పీఠంపైనే ప్రతిష్ఠించాలి:
వినాయకుడి విగ్రహాన్ని ఎట్టిపరిస్థితుల్లోనూ నేరుగా నేలపై పెట్టకూడదు. పరిశుభ్రమైన చెక్క పీట లేదా ప్రత్యేక వేదికను సిద్ధం చేసి, దానిపై కొత్త వస్త్రాన్ని పరిచి స్వామివారిని ఆసీనులను చేయాలి.
పూజా సమయంలో పాటించాల్సిన ఆచారాలు
చవితి నాడు ప్రాతఃకాలంలోనే తలస్నానమాచరించి, మడి వస్త్రాలు ధరించి పూజా మందిరాన్ని శుద్ధి చేసుకోవాలి. నిర్ణీత ముహూర్తంలో గణపతిని ఆవాహన చేసి, స్వామికి ప్రీతిపాత్రమైన గరిక, మోదకాలు, ఉండ్రాళ్ళు, రంగురంగుల పుష్పాలతో షోడశోపచార పూజ చేయాలి. గణపతి ఇంట్లో కొలువై ఉన్న అన్ని రోజులూ ఉదయం, సాయంత్రం వేళల్లో విధిగా ధూపదీప నైవేద్యాలు సమర్పించి, కర్పూర హారతి ఇవ్వాలి. పూజా స్థలంలో పవిత్రత, పరిశుభ్రత లోపించకుండా నిరంతరం చూసుకోవాలి.
