Sravana Somvar: శ్రావణ మాసంలో సోమవారాలు పరమేశ్వరుడికి అత్యంత ప్రీతికరమైనవి. ఈ రోజున శివుడిని పూజించడం వల్ల సకల శుభాలు కలుగుతాయని, కోరికలు నెరవేరుతాయని నమ్ముతారు. శ్రావణ సోమవారం నాడు ఎలాంటి పూజలు చేయాలి, ఏ నియమాలు పాటించాలి అనే వివరాలు ఇప్పుడు తెలుసుకుందాం.
శ్రావణ సోమవారం పూజా విధానం
శ్రావణ సోమవారం రోజున సూర్యోదయానికి ముందే నిద్రలేచి తలస్నానం చేయాలి. శుభ్రమైన వస్త్రాలు ధరించి, పూజకు ముందు ఉపవాస సంకల్పాన్ని చెప్పుకోవాలి. పూజా మందిరాన్ని శుభ్రం చేసి, శివపార్వతుల పటాన్ని లేదా శివలింగాన్ని ప్రతిష్టించాలి. వినాయకుడు, సుబ్రహ్మణ్యస్వామి ఫోటోలు కూడా పూజా మందిరంలో ఉంచుకోవచ్చు.
శివలింగానికి పంచామృతాలతో (పాలు, పెరుగు, నెయ్యి, తేనె, చక్కెర) అభిషేకం చేయాలి. ఆ తర్వాత శుద్ధ జలంతో అభిషేకం చేయాలి. అభిషేకం చేసేటప్పుడు "ఓం నమఃశివాయ" అనే పంచాక్షరీ మంత్రాన్ని జపించాలి. రాగి లేదా ఇత్తడి పాత్రలను అభిషేకానికి ఉపయోగించాలి. ప్లాస్టిక్ లేదా స్టీల్ పాత్రలు వాడకూడదు.
అభిషేకం తర్వాత శివలింగానికి బిల్వ పత్రాలు (మారేడు దళాలు), ఉమ్మెత్త పువ్వులు, కలువ పువ్వులు, తుమ్మి పువ్వులు సమర్పించాలి. శివుడికి తులసీ దళాలు సమర్పించకూడదు. గంధం, విభూది, అక్షతలు సమర్పించి, ధూప దీపాలు వెలిగించాలి. శివ అష్టోత్తరం లేదా శివ సహస్రనామాలు పఠించాలి. శివ స్తోత్రాలు, శ్లోకాలు పారాయణం చేయాలి. శివపురాణం పఠించడం లేదా వినడం చాలా మంచిది. శివుడికి ప్రీతికరమైన నైవేద్యాలు సమర్పించాలి. పండ్లు, పాలు, పంచదార, బెల్లం వంటివి నైవేద్యంగా సమర్పించవచ్చు. చివరిగా హారతి ఇచ్చి, పూజను ముగించాలి.
శ్రావణ సోమవారం రోజున చాలా మంది భక్తులు ఉపవాసం ఉంటారు. ఉపవాసం ఉండే వారు రోజంతా ఆహారం తీసుకోకుండా ఉంటారు. కొందరు పండ్లు, పాలు, పెరుగు, సాబుదాన, నట్స్, బంగాళదుంపలు వంటి వాటిని తీసుకోవచ్చు. ధాన్యాలు, తృణధాన్యాలు (గోధుమలు, బియ్యం), మాంసాహారం, ఉప్పును నివారించాలి. ఉపవాసం ఉండలేని వారు ఒక పూట మాత్రమే భోజనం (ఏకభుక్తం) చేయవచ్చు శ్రావణ మాసంలో దానధర్మాలు చేయడం చాలా పుణ్యకరం. శివ భక్తులకు పూజా వస్తువులు, వేద గ్రంథాలు, నల్ల నువ్వులు వంటివి దానం చేయవచ్చు.
శ్రావణ సోమవారం ప్రాముఖ్యత
శ్రావణ సోమవారం నాడు శివుడిని పూజించడం వల్ల గ్రహ దోషాలు తొలగిపోతాయి. వివాహంలో ఏర్పడే ఆటంకాలు తొలగి, మంచి జీవిత భాగస్వామి లభిస్తారు. సుఖ సంతోషాలు, శ్రేయస్సు కలుగుతాయి. ఆరోగ్యం, ఐశ్వర్యం ప్రాప్తిస్తాయి. ఈ విధంగా శ్రావణ సోమవారం నాడు నియమ నిష్టలతో శివుడిని పూజించి, ఆయన అనుగ్రహాన్ని పొందవచ్చు.
