Jambavantha: జాంబవంతుడు బ్రహ్మదేవుని నుంచి పుట్టినట్టు పురాణాలు చెబుతున్నాయి. విష్ణువు వామనావతారం ఎత్తినప్పుడు బ్రహ్మ ఆవలింత నుంచి జాంబవంతుడు జన్మించినట్లు ఒక కథ ప్రచారంలో ఉంది. రామాయణం, మహాభారతం రెండు పురాణాలలో కూడా జాంబవంతుడు గొప్ప యోధుడిగా ప్రసిద్ధి పొందాడు. జాంబవంతుడు అత్యంత తెలివైనవాడు. లంకా యుద్ధ సమయంలో హనుమంతుని శక్తిని గుర్తు చేసి, సీతను కనుగొనడానికి సముద్రాన్ని దాటమని ప్రేరేపించింది జాంబవంతుడే. రామాయణంలో జాంబవంతుడు భల్లూక రాజుగా, వానర సేనలో అత్యంత వయస్సు గలవాడు, అతను యుద్ధంలో రాముడికి సలహాలు, సూచనలు ఇచ్చేవాడు. ముఖ్యంగా, లంకకు సముద్రం దాటడానికి హనుమంతుడిలో ఉన్న శక్తిని గుర్తుచేసి, అతన్ని ప్రేరేపించింది జాంబవంతుడే. రావణాసురుడి కుమారుడు ఇంద్రజిత్తు వేసిన బ్రహ్మాస్త్రం వల్ల రాముడు, లక్ష్మణుడు వానర సైన్యం స్పృహ కోల్పోయినప్పుడు, జాంబవంతుడు హనుమంతునితో హిమాలయాలకు వెళ్లి సంజీవని మూలికను తీసుకురమ్మని సూచించాడు. ఇక ద్వాపర యుగంలో శ్రీ కృష్ణుడు శమంతకమణిని వెతుకుతూ గుహలోకి ప్రవేశించినప్పుడు, జాంబవంతుడు శ్రీకృష్ణునితో యుద్ధం చేస్తాడు. ఇద్దరూ సుదీర్ఘంగా 21 రోజులు యుద్ధం చేసిన తరువాత, జాంబవంతుడు కృష్ణుడిని శ్రీరామునిగా గుర్తిస్తాడు. ఆ తరువాత, అతను తన కుమార్తె జాంబవతిని శ్రీ కృష్ణుడికి ఇచ్చి వివాహం చేస్తాడు. జాంబవంతుడు విష్ణుమూర్తికి గొప్ప భక్తుడు. శ్రీ కృష్ణుడు, శ్రీరాముడు విష్ణుమూర్తి అవతారాలుగా గుర్తించగలగడం ఆయన గొప్ప భక్తికి నిదర్శనం. జాంబవంతుడు ఏడుగురు చిరంజీవులలో ఒకరని పురాణాలు చెబుతున్నాయి. అందువల్ల, కలియుగంలో కూడా అతను జీవించే ఉంటాడని చెబుతారు.
