Turmeric Never Be Offered to a Shiva Lingam: శివలింగానికి పొరపాటున కూడా పసుపు ఎందుకు సమర్పించకూడదు? దీని వెనుక ఉన్న అసలు కారణాలు ఇవే..

Turmeric Never Be Offered to a Shiva Lingam: హిందూ సంప్రదాయంలో శివారాధనకు అత్యంత విశిష్టమైన స్థానం ఉంది. లయకారుడైన పరమశివుడిని భోళాశంకరుడు అని పిలుచుకుంటారు. ఎందుకంటే ఆయన కేవలం కొద్దిగా గంగాజలం, బిల్వపత్రాలు సమర్పిస్తేనే ఎంతో సంతోషించి భక్తుల కోరికలను నెరవేరుస్తాడని నమ్ముతారు. అయితే, శివపూజ చేసేటప్పుడు కొన్ని నియమాలను కచ్చితంగా పాటించాలని శాస్త్రాలు చెబుతున్నాయి. సాధారణంగా అన్ని శుభకార్యాలలో, దేవుళ్ల పూజలలో పసుపును విరివిగా ఉపయోగిస్తాం. కానీ, శివలింగానికి మాత్రం పసుపు సమర్పించడం నిషిద్ధం. శివలింగానికి పసుపు పూయడం వల్ల మహాశివునికి ఆగ్రహం కలుగుతుందని పండితులు చెబుతుంటారు. అసలు శివలింగానికి పసుపు ఎందుకు సమర్పించకూడదో మతపరమైన, శాస్త్రీయ కారణాలను ఇప్పుడు వివరంగా తెలుసుకుందాం.

పురుష తత్వానికి ప్రతీకగా శివలింగం..

పౌరాణిక, మతపరమైన విశ్వాసాల ప్రకారం, శివలింగం అనేది విశ్వశక్తికి మరియు పురుష తత్వానికి ప్రతీక. మరోవైపు, పసుపు అనేది ప్రధానంగా స్త్రీ సౌందర్యానికి, అలంకరణకు, స్త్రీత్వానికి చిహ్నంగా పరిగణించబడుతుంది. పసుపు పూర్తిగా స్త్రీ సౌందర్యానికి సంబంధించిన పదార్థం కావడంతో.. పురుష తత్వానికి ప్రతీక అయిన శివలింగానికి దానిని అలంకరించడం లేదా సమర్పించడం ఆచార నియమాలకు విరుద్ధం.

పసుపు యొక్క వేడి స్వభావం - శివుని శాంత గుణం..

జ్యోతిష్య, ఆయుర్వేద శాస్త్రాల ప్రకారం పసుపు చాలా వేడి గుణాన్ని కలిగి ఉంటుంది. కానీ పరమశివుడు ఎల్లప్పుడూ ప్రశాంతమైన, చల్లని వాతావరణాన్ని మరియు చల్లని పదార్థాలను ఇష్టపడతాడు.

హాలాహల వృత్తాంతం: సముద్ర మథనం సమయంలో వెలువడిన ప్రాణాంతకమైన హాలాహల విషాన్ని విశ్వాన్ని కాపాడటం కోసం శివుడు మింగాడు. ఆ సమయంలో ఆయన శరీరం విపరీతమైన వేడెక్కింది. ఆ వేడిని తగ్గించి శివుడిని శాంతింపజేయడానికి దేవతలందరూ ఆయనకు గంగాజలం, ఆవు పాలు, తమలపాకులు, చందనం వంటి అత్యంత చల్లని పదార్థాలను సమర్పించారు. పసుపు వేడి గుణాన్ని కలిగి ఉంటుంది కాబట్టి, శివునికి మళ్లీ ఉష్ణోగ్రత పెరగకుండా ఉండేందుకు శివలింగ పూజలో దీనిని పూర్తిగా దూరం పెడతారు.

హరి - హర పూజా విధానాలలో వ్యత్యాసం..

శ్రీమహావిష్ణువు (హరి), జ్ఞానకారకుడైన బృహస్పతి (గురువు) పూజలలో పసుపు వాడకానికి అత్యంత ప్రాముఖ్యత ఉంది. విష్ణుమూర్తి పూజలో పసుపును శుభానికి, లక్ష్మీప్రదానికి చిహ్నంగా వాడతారు. అయితే, సకల ప్రాపంచిక సుఖాలను త్యజించి, శ్మశానవాసిగా, వైరాగ్యానికి ప్రతిరూపంగా నిలిచే శివుని (హర) పూజా విధానాలు విష్ణు పూజకు పూర్తిగా భిన్నంగా ఉంటాయి. ఈ వ్యత్యాసం కారణంగానే శివలింగానికి పసుపును ఉపయోగించరు.

జలధారి (పానీవట్టం) వద్ద పసుపును సమర్పించవచ్చా?

శివలింగం పైభాగంలో పసుపు పెట్టడం నిషిద్ధమైనప్పటికీ.. శివలింగం కింద ఉండే నీటి పాత్ర లేదా పానీవట్టం వద్ద పసుపును సమర్పించవచ్చు.

కారణం: ఆధ్యాత్మిక విశ్వాసాల ప్రకారం శివలింగం పైభాగం శివస్వరూపమైతే.. దాని కింద ఉండే పీఠం లేదా నీటి పాత్ర జగన్మాత అయిన పార్వతీ దేవి స్వరూపం.

పార్వతీ దేవి ఆదిశక్తి, స్త్రీత్వానికి ప్రతిరూపం కాబట్టి అమ్మవారిని ప్రసన్నం చేసుకోవడానికి ఆమె ఆశీస్సులు పొందడానికి భక్తులు ఆ జలధారి భాగంలో పసుపును సమర్పించి పూజించవచ్చు.

శివారాధనలో తెలియక చేసే తప్పుల వల్ల పూజా ఫలితం దక్కకపోవచ్చు. కాబట్టి శివలింగానికి పసుపు, కుంకుమలు నేరుగా పూయకుండా.. కేవలం చందనం (గంధం), విభూతి, బిల్వపత్రాలు, చల్లని పాలు, గంగాజలంతో అభిషేకం చేయడం ద్వారా ఆ భోళాశంకరుని సంపూర్ణ అనుగ్రహాన్ని పొందవచ్చు.