Wear Yellow Clothes on Thursday: గురువారం రోజు పసుపు రంగు బట్టలు ఎందుకు వేసుకోవాలి? దీని వెనుక ఉన్న అసలు రహస్యం ఇదీ..

Wear Yellow Clothes on Thursday: హిందూ సంప్రదాయంలోనూ, జ్యోతిష్య శాస్త్రంలోనూ వారంలోని ప్రతి రోజుకు ఒక ప్రత్యేక ప్రాముఖ్యత ఉంది. ఆయా రోజులను బట్టి నిర్దిష్ట గ్రహాల అనుగ్రహం కోసం కొన్ని నియమాలను పాటిస్తుంటాం. ఈ క్రమంలోనే గురువారం అనగానే మనకు మొదట గుర్తొచ్చేది పసుపు రంగు. చాలా మంది గురువారాల్లో పసుపు రంగు దుస్తులు ధరించడానికి ప్రాధాన్యత ఇస్తుంటారు. అసలు గురువారానికి, పసుపు రంగుకు ఉన్న సంబంధం ఏంటి? జాతకంలో బలహీనంగా ఉన్న గురు గ్రహాన్ని బలపరచుకోవడానికి ఎలాంటి పరిహారాలు చేయాలో ఇప్పుడు వివరంగా తెలుసుకుందాం.

పసుపు రంగు వెనుక ఉన్న జ్యోతిష్య రహస్యం:

జ్యోతిష్య శాస్త్రం ప్రకారం.. గురువారం గురు గ్రహం చేత పాలించబడుతుంది. నవగ్రహాలలో దేవగురువైన బృహస్పతికి అత్యంత ప్రియమైన రంగు పసుపు. జాతకంలో గురు గ్రహం అనేది జ్ఞానం, ఉన్నత విద్య, అపార సంపద, సంతాన భాగ్యం, వివాహం, ఆధ్యాత్మికతకు కారకుడిగా నమ్ముతారు. గురు దేవుని ఆశీస్సులు ఉంటే జీవితంలో కీర్తి ప్రతిష్టలు, శ్రేయస్సు వాటంతట అవే లభిస్తాయి.

జాతకంలో గురుడు బలహీనంగా ఉంటే చేయాల్సిన సులభమైన పరిహారాలు:

మీ జాతకంలో గురు గ్రహం బలహీనంగా ఉండి, పనుల్లో ఆటంకాలు ఎదురవుతుంటే జ్యోతిష్య నిపుణులు ఈ కింది పరిహారాలను సూచిస్తున్నారు.

పసుపు తిలకం:

గురువారం నాడు ఉదయాన్నే స్నానం చేసిన తర్వాత నుదుటిపై పసుపు చందనం లేదా పసుపుతో తిలకం ధరించడం చాలా శుభప్రదం.

పసుపు వస్తువుల దానం:

ఈ రోజున కందిపప్పు, పసుపు, కుంకుమపువ్వు, బెల్లం, స్వచ్ఛమైన ఆవు నెయ్యి వంటి వస్తువులను దానం చేయడం వల్ల గురు దోషాలు తొలగిపోతాయి.

శుభ ఫలితాలు:

గురువారాల్లో పసుపు రంగు బట్టలు, పసుపు పండ్లు, ఇత్తడి పాత్రలు లేదా బంగారాన్ని దానం చేయడం వల్ల కెరీర్, వ్యాపార రంగాల్లో ఉన్న అడ్డంకులు తొలగిపోయి అదృష్టం వరిస్తుంది.

-శ్రీమహావిష్ణువు ఆరాధన - అరటి చెట్టు పూజ

హిందూ విశ్వాసాల ప్రకారం.. గురువారం సృష్టి స్థితి లయకారుడైన శ్రీమహావిష్ణువుకు అత్యంత ప్రీతికరమైన రోజు. పురాణాల ప్రకారం విష్ణుమూర్తిని పీతాంబరధారి అని పిలుస్తారు. ఈ రోజున విష్ణు పూజలో పసుపు రంగు పువ్వులు, పసుపు అక్షతలు, పసుపు చందనం, బెల్లం నైవేద్యంగా సమర్పించాలి. కుటుంబంలో సంతోషం, ఆర్థికాభివృద్ధి కలగడం కోసం గురువారం నాడు సాయంత్రం వేళల్లో అరటి చెట్టుకు దీపారాధన చేసి పూజించే ఆచారం కూడా ఉంది.

వివాహ ఆలస్యం, వైవాహిక సమస్యలకు చెక్..

చాలా మందికి ఎన్ని సంబంధాలు చూసినా పెళ్లి కుదరకపోవడం లేదా వివాహం ఆలస్యం కావడం వంటి సమస్యలు ఎదురవుతుంటాయి. అలాంటి వారు గురువారం నాడు ప్రత్యేక ఉపవాస నియమాలను పాటిస్తే మంచి ఫలితం ఉంటుంది.

ఈ రోజున పూర్తి భక్తిశ్రద్ధలతో విష్ణుమూర్తిని, గురు రాఘవేంద్ర స్వామిని ఆరాధించి, తప్పనిసరిగా పసుపు రంగు దుస్తులు ధరించాలి. పూజ ముగిసిన తర్వాత పసుపు రంగులో ఉండే సాత్విక ఆహారాన్ని తీసుకోవడం వల్ల వివాహ ఆటంకాలు తొలగిపోయి, త్వరలోనే కళ్యాణ యోగం పడుతుందని నమ్ముతారు.