Air conditioners(ACs): ఎయిర్‌ కండిషనర్లు (ACs) ఎక్కువ వాడటం వల్ల కళ్లపై ప్రతికూల ప్రభావం ఉంటుందని తాజా అధ్యయనాలు వెల్లడిస్తున్నాయి. ఏసీలు గాలి నుండి తేమను తొలగిస్తాయి, దానివల్ల గదిలో పొడి వాతావరణం ఏర్పడుతుంది. ఈ పొడి గాలి కళ్ళను రక్షించే కన్నీటి పొరను త్వరగా ఆవిరి చేస్తుంది. దీనివల్ల కళ్ళు పొడిబారే సమస్య పెరుగుతుంది.
ఏసీ ఎక్కువ వాడటం వల్ల కళ్ళలో కనిపించే ముఖ్య లక్షణాలు:
కళ్లు పొడిబారడం: ముఖ్యంగా 30-50 ఏళ్ల మధ్య వయస్కులలో, ఎక్కువ స్క్రీన్ టైమ్ ఉన్న ఉద్యోగులలో ఈ సమస్య అధికంగా కనిపిస్తోంది.
మంట లేదా దురద: కళ్ళలో మంటగా అనిపించడం, లేదంటే దురదగా ఉండటం.
కళ్లు ఎర్రబడటం: కళ్ళు ఎర్రగా మారడం.
దృష్టి మసకబారడం : దృష్టి స్పష్టంగా లేకపోవడం.
నీళ్లు కారడం: కళ్లు పొడిబారడానికి ప్రతిస్పందనగా, కళ్ల నుండి అధికంగా నీళ్లు కారవచ్చు.
కాంతిని చూడలేకపోవడం: కాంతిని నేరుగా చూడలేకపోవడం.
తీసుకోవాల్సిన జాగ్రత్తలు
ఏసీ ఉష్ణోగ్రత: ఏసీని అతి తక్కువ ఉష్ణోగ్రతల వద్ద ఉంచకుండా జాగ్రత్తపడాలి.
గాలి నేరుగా తగలకుండా: ఏసీ గాలి నేరుగా కళ్ళకు లేదా శరీరానికి తాకకుండా చూసుకోవాలి.
హ్యూమిడిఫైయర్‌: గదుల్లో తేమ కోసం హ్యూమిడిఫైయర్‌లను ఉపయోగించడం మంచిది.
తరచూ రెప్పవేయడం: స్క్రీన్ టైమ్‌లో తరచూ రెప్పవేస్తుండాలి.
నీరు తాగడం: శరీరం డీహైడ్రేషన్ కాకుండా తగినంత నీరు తాగాలి.
వైద్యుల సలహా: సమస్య తీవ్రమైతే సొంత చికిత్స చేయకుండా వైద్యులను సంప్రదించాలి.
