Always Feeling Tired and Low on Energy: ఎప్పుడు నీరసంగా ఉంటోందా? కారణాలేంటి.. ఆయుర్వేదం ఏం చెబుతోంది?

Always Feeling Tired and Low on Energy: రాత్రి వేళ 8 గంటల పాటు నిద్రపోయినా ఉదయం లేవగానే ఒంట్లో సత్తువ లేనట్లు, తీవ్రమైన అలసటగా అనిపిస్తోందా? అలసిపోయినప్పుడు కొద్దిసేపు విశ్రాంతి తీసుకుంటే సర్దుకోవడం సహజం; కానీ విశ్రాంతి తీసుకున్నా తగ్గని నిరంతర నిస్సత్తువను వైద్య పరిభాషలో క్రానిక్ ఫెటీగ్ అంటారు. ఇది మన శరీరంలో ఏదో సమస్య తలెత్తుతోందని ఇచ్చే హెచ్చరిక సంకేతం.

మన పూర్వీకులు శారీరకంగా ఎంతో కష్టపడి పనిచేసినా అలసట దరిచేరేది కాదు. కానీ నేటి జీవనశైలిలో శారీరక శ్రమ బాగా తగ్గిపోయినప్పటికీ, మానసిక ఒత్తిడి, నిద్రలేమి, ఆహారపు అలవాట్ల వల్ల అత్యధికులు తీవ్ర అలసటతో సతమతమవుతున్నారు. ఉడుపి ఎస్‌డీఎం ఆయుర్వేద ఫార్మసీ జనరల్ మేనేజర్ డాక్టర్ మురళీధర బల్లాళ్ దీనికి గల కారణాలు, పరిష్కారాలను వివరించారు.

గణాంకాలు ఏం చెబుతున్నాయి?

మహిళల్లో అధికం:

దేశంలో నిర్వహించిన అధ్యయనాల ప్రకారం సుమారు 12 శాతం మంది మహిళలు దీర్ఘకాలిక అలసటతో బాధపడుతున్నారు.

కార్పొరేట్ ఉద్యోగులపై ప్రభావం:

2019 నాటి ఒక నివేదిక ప్రకారం, కార్పొరేట్ రంగంలో పనిచేసేవారిలో దాదాపు 80 శాతం మంది ఒక మోస్తరు నుంచి తీవ్రస్థాయి అలసటను ఎదుర్కొంటున్నారు.

ఆధునిక వైద్యశాస్త్రం ప్రకారం రక్తహీనత, విటమిన్ B12, విటమిన్ D లోపం, అలాగే థైరాయిడ్ సమస్యలు దీనికి ప్రధాన కారణాలుగా ఉంటాయి. అయితే రక్త పరీక్షల నివేదికలు సాధారణంగా ఉన్నప్పటికీ చాలామందిలో అలసట మాత్రం తగ్గదు.

ఆయుర్వేద దృక్పథం: ప్రధాన కారణాలు

శరీర శక్తి, త్రిదోషాల సమతుల్యత, జీర్ణవ్యవస్థపై ఆధారపడి ఆయుర్వేదం ఈ అలసటను విశ్లేషిస్తుంది:

మందాగ్ని: జఠరాగ్ని బలహీనపడినప్పుడు ఆహారం సరిగ్గా జీర్ణం కాదు. దీనివల్ల శరీరంలో ఆమం పేరుకుపోయి ఆకలి మందగించడం, కడుపుబ్బరం, మలబద్ధకం, నీరసం ఏర్పడతాయి.

ఓజక్షయం: ఆయుర్వేదంలో ఓజస్సు అంటే శరీర అంతర్గత తేజస్సు, శక్తి. నిరంతర మానసిక ఒత్తిడి, సరిపడా నిద్ర లేకపోవడం వల్ల ఓజస్సు క్షీణించి శరీరం త్వరగా అలసిపోతుంది.

అలసటను తగ్గించే సహజసిద్ధమైన చిట్కాలు

శొంఠి - ధనియాల నీరు:

ఉదయాన్నే బెడ్ కాఫీ లేదా టీ తాగే అలవాటు ఉంటే దానికి బదులుగా ఈ నీటిని తాగవచ్చు. లీటరు నీటిలో పావు చెంచా శొంఠి పొడి, ఒక చెంచా ధనియాల గింజలు వేసి మరిగించి, వడకట్టి రోజంతా కొద్దికొద్దిగా తాగాలి. శొంఠి శరీరంలోని టాక్సిన్లను కరిగించేందుకు, ధనియాలు శరీర వేడిని సమతుల్యం చేసేందుకు దోహదపడతాయి.

ఉసిరి - తేనె మిశ్రమం:

రోజుకు ఒక చెంచా ఉసిరి పొడిని (ఆమ్లా) స్వచ్ఛమైన తేనెతో కలిపి తీసుకోవాలి. విటమిన్ సి, యాంటీఆక్సిడెంట్లు పుష్కలంగా ఉండే ఉసిరి రోగనిరోధక శక్తిని, చైతన్యాన్ని పెంచుతుంది.

పసుపు, అశ్వగంధ పాలు:

రాత్రి పడుకునే ముందు గోరువెచ్చని పాలలో చిటికెడు పసుపు, యాలకుల పొడి కలిపి తాగాలి. వైద్యుల సలహా మేరకు అశ్వగంధ పొడిని చేర్చుకోవడం వల్ల మానసిక ప్రశాంతత లభించి మంచి నిద్ర పడుతుంది.

జీవనశైలిలో చేసుకోవాల్సిన మార్పులు

నిర్ణీత నిద్ర వేళలు:

ప్రతిరోజూ ఒకే సమయానికి పడుకోవడం, ఉదయాన్నే ఒకే సమయానికి మేల్కొనే అలవాటు చేసుకోవాలి.

తేలికపాటి రాత్రి భోజనం:

పడుకోవడానికి కనీసం 2-3 గంటల ముందే తేలికగా జీర్ణమయ్యే ఆహారాన్ని తీసుకోవాలి.

డిజిటల్ డిటాక్స్:

నిద్రపోయే ముందు మొబైల్, ల్యాప్‌టాప్ స్క్రీన్లను చూడటం పూర్తిగా తగ్గించాలి.

వ్యాయామం - హైడ్రేషన్:

రోజూ కనీసం నడక లేదా తేలికపాటి వ్యాయామం చేయడంతో పాటు తగినంత నీరు తాగాలి.