Always Feeling Tired and Low on Energy: ఎప్పుడూ అలసట, నీరసంగా ఉంటుందా? శరీరానికి తక్షణ శక్తినిచ్చే 5 పోషకాహారాలు ఇవే..

Always Feeling Tired and Low on Energy: ఉదయం నిద్రలేవగానే బద్ధకం, రోజంతా అలసట, చిన్న పని చేసినా ఒంట్లో శక్తి లేనట్లు అనిపించడం.. ప్రస్తుత ఉరుకుల పరుగుల జీవనశైలిలో చాలామంది ఎదుర్కొంటున్న ప్రధాన సమస్య. దీనికి నిద్రలేమి, తగినంత నీరు తాగకపోవడం మాత్రమే కాకుండా శరీరానికి అవసరమైన కీలక పోషకాలు అందకపోవడం కూడా ప్రధాన కారణం కావచ్చని నిపుణులు చెబుతున్నారు. శరీరంలో శక్తి స్థాయిలను పెంచడానికి రోజువారీ ఆహారంలో చేర్చుకోవాల్సిన 5 ముఖ్యమైన పోషకాలు, వాటి లభ్యత వివరాలు ఇక్కడ చూద్దాం.

బి-కాంప్లెక్స్ విటమిన్లు

మనం తీసుకునే ఆహారం శరీరంలో శక్తిగా మారే జీవక్రియల్లో బి విటమిన్లు కీలక పాత్ర పోషిస్తాయి. వీటి లోపం వల్ల శరీరం త్వరగా అలసిపోతుంది.

లభించే పదార్థాలు: గుడ్లు, పాలు, పెరుగు, పాలకూర లాంటి ఆకుకూరలు, పప్పుధాన్యాలు, బ్రౌన్ రైస్, బాదం, వేరుశనగలు.

విటమిన్ డి

ఎముకల బలానికే కాకుండా రోగనిరోధక శక్తికి, శరీర చురుకుదనానికి విటమిన్-డి ఎంతో అవసరం.

లభించే పదార్థాలు:

ఉదయపు సూర్యరశ్మి దీనికి సహజ మూలం. ఆహార రూపంలో గుడ్డు పచ్చసొన, పుట్టగొడుగులు, ఫోర్టిఫైడ్ పాల ఉత్పత్తుల ద్వారా ఇది లభిస్తుంది.

ఐరన్ సమృద్ధిగా ఉండే ఆహారాలు

శరీర కణాలకు ఆక్సిజన్‌ను మోసుకెళ్లే హిమోగ్లోబిన్ తయారీకి ఐరన్ తప్పనిసరి. ఐరన్ తగ్గితే రక్తహీనత ఏర్పడి తీవ్రమైన నీరసం, ఆయాసం వస్తాయి.

లభించే పదార్థాలు: ఆకుకూరలు, రాగులు, నువ్వులు, పప్పులు, ఖర్జూరం, ఎండు ద్రాక్ష వంటి డ్రై ఫ్రూట్స్.

చిట్కా: మనం తీసుకునే ఐరన్‌ను శరీరం వేగంగా గ్రహించాలంటే, దాంతో పాటు నిమ్మరసం లేదా ఉసిరి వంటి విటమిన్ సి అధికంగా ఉండే ఆహారాలను జతచేయాలి.

మెగ్నీషియం

మెగ్నీషియం శరీరంలోని నాడీ వ్యవస్థ పనితీరుకు, కండరాల విశ్రాంతికి, జీవక్రియలకు తోడ్పడుతుంది.

లభించే పదార్థాలు:

గుమ్మడి గింజలు, బాదం, జీడిపప్పు, అరటిపండ్లు, ఆకుపచ్చని కూరగాయలు.

కోఎంజైమ్ క్యూ10

శరీర కణాలలో శక్తి ఉత్పత్తికి ఈ ఎంజైమ్ దోహదపడుతుంది.

లభించే పదార్థాలు: చేపలు, సోయాబీన్స్, బ్రకోలి, క్యాలీఫ్లవర్, పల్లీలు.

గుర్తుంచుకోవాల్సిన ముఖ్యమైన విషయాలు

నీరు - నిద్ర:

కేవలం సరైన ఆహారంతోనే సరిపోదు. రోజుకు కనీసం 7–8 గంటల నాణ్యమైన నిద్ర, తగినంత మోతాదులో నీరు తాగడం అంతే ముఖ్యం.

జంక్ ఫుడ్స్ దూరం పెట్టండి:

అధిక చక్కెరలు, ప్రాసెస్డ్ ఫుడ్స్ తక్షణమే శక్తిని ఇచ్చినట్లు అనిపించినా, వెంటనే నీరసానికి గురిచేస్తాయి.

వైద్యుల సలహా:

నిరంతర అలసట, మైకం, ఆయాసం లేదా తలతిరుగుడు వంటి లక్షణాలు కొనసాగితే.. థైరాయిడ్ లేదా తీవ్రమైన రక్తహీనత వంటి కారణాలు ఉండవచ్చు కాబట్టి సొంత వైద్యం చేసుకోకుండా వైద్యులను సంప్రదించి పరీక్షలు చేయించుకోవడం ఉత్తమం.