Consuming These Foods Along with Tea: టీతో పాటు ఈ పదార్థాలను తింటున్నారా? అయితే మీరు ప్రమాదంలో పడ్డట్టే

Consuming These Foods Along with Tea: భారతీయులకు టీ అంటే కేవలం డ్రింక్ కాదు అదొక ఎమోషన్. పొద్దున్నే వేడి వేడి టీ కప్పు పడాల్సిందే. అయితే టీ తాగేటప్పుడు మనం చేసే కొన్ని పొరపాట్లు మన ఆరోగ్యాన్ని తీవ్రంగా దెబ్బతీస్తాయని మీకు తెలుసా? టీతో పాటు స్నాక్స్ తినడం అందరికీ అలవాటే. కానీ కొన్ని రకాల ఆహార పదార్థాలు టీతో కలిస్తే విషతుల్యంగా మారుతాయని ఆరోగ్య నిపుణులు హెచ్చరిస్తున్నారు. అవేంటో ఇప్పుడు చూద్దాం:

బిస్కెట్లు, రస్క్‌లు: బరువు పెరగడానికి ప్రధాన కారణం

టీలో బిస్కెట్ ముంచుకుని తినడం చాలా మందికి ఇష్టం. కానీ బిస్కెట్లలో ఉండే మైదా, ట్రాన్స్ ఫ్యాట్స్, అధిక చక్కెర.. టీతో కలిసినప్పుడు జీర్ణవ్యవస్థను బలహీనపరుస్తాయి. ఇది గ్యాస్ సమస్యలకు, రక్తంలో చక్కెర స్థాయిలు పెరగడానికి, ఊబకాయానికి దారితీస్తుంది.

వేయించిన స్నాక్స్

వర్షం పడేటప్పుడు వేడి టీ, పకోడీల కాంబినేషన్ అదిరిపోతుంది. కానీ ఈ స్నాక్స్‌లో ఉండే నూనె కొలెస్ట్రాల్ స్థాయిలను పెంచి గుండె ఆరోగ్యానికి ముప్పు కలిగిస్తుంది. ఇది కడుపులో మంటను కూడా కలిగిస్తుంది.

స్వీట్లు - కేకులు

టీతో పాటు తీపి పదార్థాలు తీసుకోవడం వల్ల జీర్ణక్రియ నెమ్మదిస్తుంది. దీనివల్ల కడుపు భారంగా అనిపించడం, ఆమ్లత వంటి సమస్యలు వస్తాయి. అంతేకాకుండా ఇది ఇన్సులిన్ నిరోధకతను పెంచి మధుమేహం వచ్చే ప్రమాదాన్ని పెంచుతుంది.

టీ తాగిన వెంటనే పండ్లు తినకండి

చాలామంది టీ తాగి పండ్లు తింటే ఆరోగ్యకరం అనుకుంటారు, కానీ అది తప్పు. టీలో ఉండే టానిన్లు, పండ్లలోని ఇనుమును శరీరం గ్రహించకుండా అడ్డుకుంటాయి. దీనివల్ల మీరు పండ్లు తిన్నా శరీరానికి పూర్తి పోషకాలు అందవు.

చాక్లెట్లతో జాగ్రత్త

టీ , చాక్లెట్ రెండింటిలోనూ కెఫిన్ ఉంటుంది. ఈ రెండింటిని కలిపి తీసుకోవడం వల్ల హృదయ స్పందన రేటు పెరగడం, కంగారుగా ఉండటం, నిద్రలేమి వంటి సమస్యలు తలెత్తుతాయి.

మందులు వేసుకోవడం పెద్ద తప్పు

నీళ్లు లేవనో లేదా సోమరితనంతోనో టీతో మందులు వేసుకోవడం ప్రమాదకరం. టీలోని కెఫిన్ మందుల ప్రభావాన్ని తగ్గించడమే కాకుండా కొన్నిసార్లు వికటించేలా చేస్తుంది. మందులను ఎప్పుడూ సాధారణ నీటితోనే తీసుకోవాలి. టీని ఆస్వాదించండి, కానీ అది మీ ఆరోగ్యానికి శాపంగా మారకుండా చూసుకోండి. టీ తాగడానికి అరగంట ముందు లేదా తర్వాత మాత్రమే పండ్లు లేదా ఇతర బలమైన ఆహారాన్ని తీసుకోవడం ఉత్తమం.