Blood in Urine: మూత్రంలో రక్తం కనిపిస్తోందా? అయితే అది కిడ్నీ క్యాన్సర్ కావచ్చు.. ఎప్పుడు జాగ్రత్తపడాలి?
ఎప్పుడు జాగ్రత్తపడాలి?
Blood in Urine: మన శరీరంలో మూత్రపిండాలు చేసే పని చాలా కీలకం. అయితే మూత్ర విసర్జన సమయంలో రక్తం కనిపించడాన్ని చాలా మంది వేడి చేయడం వల్లనో లేదా సాధారణ సమస్య అనుకుని నిర్లక్ష్యం చేస్తుంటారు. కానీ ఇలాంటి లక్షణాలను విస్మరించడం ప్రాణాంతకమైన కిడ్నీ క్యాన్సర్కు దారితీయవచ్చని ఢిల్లీలోని సఫ్దర్జంగ్ హాస్పిటల్ నిపుణులు డాక్టర్ దీపక్ కుమార్ సుమన్ హెచ్చరిస్తున్నారు.
ఎప్పుడు ఆందోళన చెందాలి?
మూత్రంలో రక్తం కనిపించడం అనేది ప్రతిసారీ క్యాన్సర్ కాకపోవచ్చు. ఇది ఇన్ఫెక్షన్లు లేదా మూత్రపిండాల్లో రాళ్ల వల్ల కూడా జరగవచ్చు. అయితే ఈ పరిస్థితుల్లో మాత్రం అప్రమత్తంగా ఉండాలి. ఒకటి లేదా రెండు సార్లు రక్తం కనిపించి తగ్గిపోతే పెద్దగా ఆందోళన అవసరం లేదు, కానీ ఇది రెండు రోజుల కంటే ఎక్కువ కాలం కొనసాగితే వెంటనే డాక్టర్ను కలవాలి.
నొప్పి లేని రక్తస్రావం: ఎలాంటి నొప్పి లేకుండా మూత్రంలో రక్తం పడటం మరింత ప్రమాదకరం.
అనుబంధ లక్షణాలు: రక్తంతో పాటు తరచుగా మూత్ర విసర్జన, విపరీతమైన బరువు తగ్గడం, వీపులో ఒకవైపు నిరంతరంగా నొప్పి ఉండటం వంటివి కిడ్నీ క్యాన్సర్ సంకేతాలు కావచ్చు.
నిర్లక్ష్యం చేసే ఇతర లక్షణాలు:
చాలా మంది మూత్రం దుర్వాసన రావడం లేదా మూత్ర విసర్జన సమయంలో మంటను సాధారణమైనవిగా భావిస్తారు. కానీ ఇవి కిడ్నీలు ఆపదలో ఉన్నాయని చెప్పే ప్రాథమిక సంకేతాలు. వ్యాధిని ప్రారంభ దశలోనే గుర్తిస్తే చికిత్స సులభమవుతుందని వైద్యులు చెబుతున్నారు.
వైద్య పరీక్షలు - నివారణ:
లక్షణాల తీవ్రతను బట్టి వైద్యులు ప్రధానంగా ఈ పరీక్షలు నిర్వహిస్తారు:
యూరిన్ టెస్ట్ - అల్ట్రాసౌండ్: ప్రాథమికంగా సమస్యను గుర్తించడానికి.
సిస్టోస్కోపీ: సమస్య తీవ్రంగా ఉన్నప్పుడు లోతైన విశ్లేషణ కోసం.
కిడ్నీల రక్షణ కోసం తీసుకోవాల్సిన జాగ్రత్తలు:
నీరు: రోజుకు కనీసం 7 నుండి 8 గ్లాసుల నీరు తప్పనిసరిగా త్రాగాలి.
మూత్రాన్ని ఆపుకోకండి: ఎక్కువ సేపు మూత్రాన్ని ఆపుకోవడం వల్ల ఇన్ఫెక్షన్లు పెరిగి కిడ్నీలపై ఒత్తిడి పడుతుంది.
సకాలంలో చికిత్స: ఏవైనా ఇన్ఫెక్షన్ లక్షణాలు కనిపిస్తే వెంటనే వైద్యుడిని సంప్రదించాలి.
ఆరోగ్యం విషయంలో చిన్న మార్పు కనిపించినా నిర్లక్ష్యం చేయవద్దు. సకాలంలో స్పందించడం వల్ల కిడ్నీ క్యాన్సర్ వంటి భయంకరమైన వ్యాధుల నుండి మనల్ని మనం కాపాడుకోవచ్చు.
