Excess Vitamin A: విటమిన్ -ఎ అతిగా తీసుకుంటే ప్రాణానికే ప్రమాదమా?

Excess Vitamin A: శరీరానికి విటమిన్లు అవసరమే, కానీ అవి మోతాదు దాటితే అమృతం కూడా విషంగా మారుతుంది. ఈ రోజు మనం విటమిన్- ఎ గురించి, అది మితిమీరితే కలిగే ప్రమాదాల గురించి తెలుసుకుందాం. మన కంటి చూపు మెరుగుపడాలన్నా, రోగనిరోధక వ్యవస్థ బలంగా ఉండాలన్నా, శరీరంలోని కీలక అవయవాలు సక్రమంగా పనిచేయాలన్నా విటమిన్-ఎ ఎంతో తోడ్పడుతుంది. అయితే, దీని విషయంలోనే మనం చాలా జాగ్రత్తగా ఉండాలి.

సాధారణంగా మన శరీరం విటమిన్ -ఎ ని సహజంగానే నిల్వ చేసుకుంటుంది. అవసరానికి మించి దీన్ని మరింత ఎక్కువగా పోగుపడేలా చేయడం వల్ల కాలేయ సంబంధిత సమస్యలు తలెత్తుతాయి. విటమిన్ -ఎ శరీరంలో మితిమీరితే.. విపరీతమైన తలనొప్పి, వికారం, తల తిరగడం వంటి ఇబ్బందులు ఎదురవుతాయి. అంతటితో ఆగకుండా, ఇది కాలేయం తీవ్రంగా దెబ్బతినడానికి కూడా దారితీస్తుంది. ముఖ్యంగా విటమిన్ -ఎ రూపమైన 'బీటా-కెరటిన్' మాత్రలను పెద్ద మొత్తంలో వాడితే, అది కాలేయ క్యాన్సర్‌కు దారితీసే ప్రమాదం ఉందని నిపుణులు హెచ్చరిస్తున్నారు.

ఈ ముప్పు అందరిలో ఒకేలా ఉండదు. ముఖ్యంగా పొగ తాగే అలవాటు ఉన్నవారికి, గతంలో పొగతాగే అలవాటు ఉండి మానేసిన వారికి ఈ విటమిన్-ఎ సప్లిమెంట్ల వల్ల ముప్పు ఎక్కువగా ఉంటుంది. అలాగే ఆస్‌బెస్టాస్ ప్రభావానికి గురయ్యేవారు కూడా ఈ విషయంలో చాలా అప్రమత్తంగా ఉండాలి. కృత్రిమంగా మాత్రల రూపంలో విటమిన్-ఎ తీసుకోవడం కంటే, సహజ సిద్ధమైన ఆహారం ద్వారా పొందడమే అత్యంత సురక్షితమైన మార్గం. డాక్టర్లు కూడా ఎప్పుడూ మాత్రల కంటే పోషకాహారానికే తొలి ప్రాధాన్యత ఇస్తుంటారు.

మరి విటమిన్- ఎ సురక్షితంగా ఎలా లభిస్తుంది? మన చుట్టూ ఉండే ఆహార పదార్థాలే ఇందుకు సమాధానం. చేపలు, పాలకూర, క్యారెట్లు, అప్రికాట్లు విటమిన్-ఎ కి నిలయాలు. ఆకుపచ్చ, నారింజ, పసుపు రంగుల్లో ఉండే కూరగాయలు, పండ్లను మన డైట్‌లో చేర్చుకోవడం వల్ల సహజంగానే మన శరీరానికి కావలసిన విటమిన్ అందుతుంది. ఒకవేళ డాక్టర్ సలహా మేరకు మాత్రలు వేసుకోవాల్సి వస్తే, వారు సూచించిన మోతాదుకు మించకుండా జాగ్రత్త పడాలి.