Lungs: క్లీనింగ్ ఉత్పత్తులు, రసాయన పదార్థాలతో కూడినవి, మన ఊపిరితిత్తులపై తీవ్ర ప్రభావం చూపిస్తాయి. మీరు ఇల్లు శుభ్రం చేస్తున్నప్పుడు వాటి నుండి వెలువడే కొన్ని రసాయనాలు శ్వాస ద్వారా మన శరీరంలోకి ప్రవేశిస్తాయి.
అమోనియా (Ammonia): ఇది బాత్రూమ్ క్లీనర్స్, గ్లాస్ క్లీనర్స్ ఇతర శుభ్రపరిచే ఉత్పత్తులలో ఉంటుంది. దీని వాసన చాలా తీవ్రంగా ఉంటుంది. ఇది శ్వాస వ్యవస్థలో చికాకును కలిగిస్తుంది, దగ్గు, గొంతులో మంట మరియు ఊపిరితిత్తులలో ఇన్‌ఫ్లమేషన్‌కు దారితీస్తుంది.
క్లోరిన్ (Chlorine): బ్లీచ్ వంటి ఉత్పత్తులలో క్లోరిన్ ప్రధానంగా ఉంటుంది. ఇది అమోనియాతో కలిసినప్పుడు క్లోరమైన్ గ్యాస్ అనే విషపూరితమైన వాయువును విడుదల చేస్తుంది. దీనిని పీల్చడం వల్ల తీవ్రమైన శ్వాసకోశ సమస్యలు, ఊపిరి ఆడకపోవడం మరియు ఛాతీలో నొప్పి కలగవచ్చు.
ఫథలేట్స్ (Phthalates): సువాసన కోసం ఉపయోగించే కొన్ని క్లీనింగ్ ఉత్పత్తులలో ఇది ఉంటుంది. ఇది శ్వాస తీసుకోవడంలో ఇబ్బందులు, ఆస్తమా ఇతర అలర్జీలకు కారణం కావచ్చు.
వోలటైల్ ఆర్గానిక్ కాంపౌండ్స్ (VOCs): ఇవి గాలిలోకి త్వరగా ఆవిరైపోయే రసాయనాలు. ఇవి బ్లీచ్, క్లీనర్స్, పెయింట్స్, సుగంధ క్లీనింగ్ ఉత్పత్తులలో ఉంటాయి. ఈ వాయువులు ఊపిరితిత్తుల ఆరోగ్యాన్ని దెబ్బతీస్తాయి.
ఊపిరితిత్తులపై ప్రభావం ఇలా ఉంటుంది:
ఈ రసాయనాలను అధిక మొత్తంలో పీల్చినప్పుడు దగ్గు, తుమ్ములు, గొంతులో మంట, కళ్ళు ఎర్రబడటం మరియు ఊపిరితిత్తులలో మంట వంటి లక్షణాలు వెంటనే కనిపిస్తాయి. తరచుగా ఈ రసాయనాలకు గురికావడం వల్ల ఊపిరితిత్తుల సామర్థ్యం తగ్గిపోతుంది. ఆస్తమా వంటి శ్వాసకోశ వ్యాధులు ఉన్నవారికి సమస్య మరింత తీవ్రమవుతుంది. ఇది బ్రాంకైటిస్ మరియు ఇతర దీర్ఘకాలిక శ్వాసకోశ వ్యాధులకు దారితీయవచ్చు.
తప్పక పాటించాల్సిన జాగ్రత్తలు:
క్లీనింగ్ చేస్తున్నప్పుడు కిటికీలు, తలుపులు తెరిచి ఉంచండి. గాలి ధారాళంగా ఉండడం వల్ల రసాయనాల ప్రభావం తగ్గుతుంది. రసాయనాలు ఎక్కువగా ఉండే ఉత్పత్తులు వాడుతున్నప్పుడు మాస్క్ ధరించడం వల్ల నేరుగా వాటిని పీల్చకుండా ఉంటారు. ఉత్పత్తులపై ఉన్న హెచ్చరికలు, వాడే విధానం, అందులోని రసాయనాల గురించి తెలుసుకోవడం అవసరం. నిమ్మరసం, వెనిగర్ వంటి సహజమైన పదార్థాలతో కూడా క్లీనింగ్ చేసుకోవచ్చు. ఇది రసాయనాల వాడకాన్ని తగ్గిస్తుంది. శుభ్రపరిచే ఉత్పత్తులు పిల్లలకు అందుబాటులో లేకుండా చూసుకోండి. ఈ జాగ్రత్తలు పాటించడం వల్ల క్లీనింగ్ ఉత్పత్తుల నుంచి వచ్చే హానికరమైన రసాయనాల ప్రభావం నుంచి మీ ఊపిరితిత్తులను కాపాడుకోవచ్చు.
