Dark Skin Around the Neck and Persistent Acne: మెడ చుట్టూ నలుపు, తగ్గని మొటిమలా? అది థైరాయిడ్ కావచ్చు జాగ్రత్త..

Dark Skin Around the Neck and Persistent Acne: చాలామంది చర్మంపై వచ్చే మార్పులను కేవలం పైపైన చూసి, అవి కేవలం చర్మ సమస్యలేనని పొరబడుతుంటారు. మెడపై నల్లటి మచ్చలు వస్తే తొలగించుకోవడానికి ఖరీదైన క్రీములు వాడుతుంటారు, ముఖంపై మొటిమలు వేధిస్తుంటే బ్యూటీ పార్లర్ల చుట్టూ తిరుగుతూ ఫేషియల్స్ వంటి తాత్కాలిక చికిత్సలు చేయించుకుంటారు. అయితే ఈ చికిత్సలు చేయించుకున్న కొన్ని రోజులకే ఆ మచ్చలు, మొటిమలు మళ్లీ కనిపిస్తున్నాయా? అయితే సమస్య చర్మం పైన కాదు.. శరీరం లోపల ఉందని అర్థం చేసుకోవాలి..

అకస్మాత్తుగా మెడ చుట్టూ చర్మం నల్లబడటం, ముఖంపై తగ్గని మొండి మొటిమలు రావడం వంటివి మన శరీరంలోని ప్రధాన హార్మోన్ల మార్పులకు, ముఖ్యంగా థైరాయిడ్ లేదా పీసీఓఎస్ వంటి సమస్యలకు మొదటి సంకేతాలు కావచ్చని వైద్య నిపుణులు హెచ్చరిస్తున్నారు.

మెడ నల్లబడటానికి కారణం ఏమిటి?

మెడ చంకల చుట్టూ చర్మం అకస్మాత్తుగా ముదురు నలుపు రంగులోకి మారడాన్ని వైద్య పరిభాషలో అకాంతోసిస్ నిగ్రికాన్స్ అంటారు. శరీరంలో ఇన్సులిన్ హార్మోన్ స్థాయిలు పెరిగినప్పుడు చర్మంపై ఈ ముదురు రంగు ఏర్పడుతుంది. ముఖ్యంగా'హైపోథైరాయిడిజం ఉన్నవారిలో థైరాయిడ్ గ్రంథి పనితీరు మందగించడం వల్ల శరీర జీవక్రియ నెమ్మదిస్తుంది. ఇది ఇన్సులిన్ రెసిస్టెన్స్‌కు దారితీసి, మెడ చుట్టూ నల్లటి వలయాలుగా మారుతుంది.

దవడ చుట్టూ తగ్గని మొండి మొటిమలు

వయసు పెరిగిన తర్వాత కూడా దవడ చుట్టూ, ముఖంపై మొండి మొటిమలు వేధిస్తుంటే దానికి హార్మోన్ల అసమతుల్యతే ప్రధాన కారణం. థైరాయిడ్ హార్మోన్లు శరీరంలోని ఈస్ట్రోజెన్, ప్రొజెస్టెరాన్, ఆండ్రోజెన్ వంటి ఇతర హార్మోన్లతో నేరుగా సంబంధం కలిగి ఉంటాయి. థైరాయిడ్ గ్రంథిలో లోపాల వల్ల చర్మంలో 'సెబమ్' ఉత్పత్తి పెరిగిపోతుంది లేదా చర్మం విపరీతంగా పొడిబారుతుంది. దీనివల్ల చర్మ రంధ్రాలు మూసుకుపోయి, బ్యాక్టీరియా చేరి తీవ్రమైన మొటిమలకు దారితీస్తుంది.

చర్మం పొడిబారడం

థైరాయిడ్ హార్మోన్ లోపం వల్ల చర్మ కణాల పునరుత్పత్తి ప్రక్రియ దెబ్బతింటుంది. చర్మం విపరీతంగా పొడిబారడం, పగలడం, ముఖంపై గోధుమ లేదా నల్లటి మచ్చలు ఏర్పడటం వంటివి హైపోథైరాయిడిజం యొక్క స్పష్టమైన లక్షణాలు.

నిపుణులు సూచిస్తున్న పరిష్కారాలు ఇవే..

మీకు కూడా ఇలాంటి లక్షణాలు కనిపిస్తుంటే, కేవలం సౌందర్య ఉత్పత్తులపై ఆధారపడకుండా అసలు కారణాన్ని గుర్తించి చికిత్స తీసుకోవడం ముఖ్యం.

వైద్య పరీక్షలు: ఈ లక్షణాలు సుదీర్ఘకాలం కొనసాగితే వెంటనే డాక్టర్ సలహా మేరకు థైరాయిడ్ ప్రొఫైల్ (T3, T4, TSH) పరీక్షతో పాటు అవసరమైతే 'ఫాస్టింగ్ ఇన్సులిన్' పరీక్ష కూడా చేయించుకోవాలి.

ఆహారంలో మార్పులు: థైరాయిడ్ లక్షణాలు ఉన్నవారు చక్కెర పదార్థాలు, మైదా వంటి పిండి పదార్థాల వినియోగాన్ని బాగా తగ్గించాలి. పీచు పదార్థాలు ఎక్కువగా ఉండే ఆహారాలు, ఆకుకూరలు, కూరగాయలను నిత్యం తీసుకోవాలి.

క్రమం తప్పకుండా వ్యాయామం:

రోజూ వ్యాయామం చేయడం వల్ల శరీరంలో హార్మోన్ల సమతుల్యత పునరుద్ధరించబడుతుంది. ఇన్సులిన్ నిరోధకత తగ్గి బరువు అదుపులోకి వస్తుంది.

చర్మ సంరక్షణ: చర్మం పొడిబారకుండా ఉండేందుకు మంచి మాయిశ్చరైజర్‌ను వాడాలి. అలాగే ఎండలోకి వెళ్లేటప్పుడు సన్‌స్క్రీన్ లోషన్ రాయడం అస్సలు మర్చిపోకూడదు.