Use Mouthwash Daily: రోజూ మౌత్ వాష్ వాడితే ఏమవుతుందో తెలుసా?

Use Mouthwash Daily: ఈ మధ్యకాలంలో మౌత్ వాష్ వాడకం బాగా పెరిగింది. నోటిని శుభ్రం చేయడానికి, దుర్వాసనను పోగొట్టడానికి మౌత్ వాష్‌ను ఉపయోగిస్తారు. ఇందులో ఉండే యాంటీ బ్యాక్టీరియల్ ఏజెంట్లు, ఫ్లోరైడ్ వంటివి బ్యాక్టీరియాను తగ్గించి, కావిటీస్ నుంచి రక్షణ ఇస్తాయి. అయితే చాలా మందికి తెలియని విషయం ఏమిటంటే... ప్రతిరోజూ మౌత్ వాష్ వాడటం అందరికీ అవసరం లేదు. రోజుకు రెండుసార్లు సరిగ్గా బ్రష్ చేయడం, ఫ్లాసింగ్ చేయడం, డాక్టర్‌ను కలవడం చాలు. మరి మౌత్ వాష్ ఎందుకు వాడాలి..? రోజూ వాడితే వచ్చే నష్టాలు ఏంటి..? నిపుణులు ఏం చెబుతున్నారో తెలుసుకుందాం.

మౌత్ వాష్ వల్ల కలిగే 4 ప్రయోజనాలు

మౌత్ వాష్ వాడటం వల్ల కొన్ని సందర్భాల్లో ఈ ప్రయోజనాలు ఉంటాయి:

1. నోటి దుర్వాసన నుండి ఉపశమనం: ఇది తక్షణమే నోటికి తాజాదనాన్ని ఇచ్చి, దుర్వాసనను తాత్కాలికంగా తగ్గిస్తుంది.

2. బ్యాక్టీరియా తగ్గింపు: యాంటీ బ్యాక్టీరియల్ మౌత్ వాష్ కొంత సమయం వరకు నోటిలో బ్యాక్టీరియా పెరుగుదలను నిరోధిస్తుంది.3. చిగుళ్ల ఆరోగ్యం: కొన్ని మౌత్ వాష్‌లు చిగుళ్ల వాపు, రక్తం కారడం తగ్గించడంలో సహాయపడతాయి.

4. కావిటీస్ నుండి రక్షణ: ఫ్లోరైడ్ కలిగిన మౌత్ వాష్ కావిటీస్‌ను నివారించడానికి తోడ్పడుతుంది.

నిపుణుల అభిప్రాయం ప్రకారం, మౌత్ వాష్‌ను తరచుగా వాడటం వల్ల మంచి కంటే కీడే ఎక్కువ జరిగే అవకాశం ఉంది:

నోరు పొడిబారడం : చాలా మౌత్ వాష్‌లలో ఆల్కహాల్ ఉంటుంది. ఇది లాలాజలాన్ని తగ్గిస్తుంది. నోటిని పొడిబారేలా చేస్తుంది. లాలాజలం తగ్గితే, మళ్లీ బ్యాక్టీరియా పెరిగే అవకాశం పెరుగుతుంది.

మంచి బ్యాక్టీరియా నష్టం: మన నోటిలో మంచి, చెడు బ్యాక్టీరియాలు రెండూ ఉంటాయి. రోజువారీ యాంటీ బ్యాక్టీరియల్ మౌత్ వాష్ వాడటం వల్ల మంచి బ్యాక్టీరియా కూడా నశించి, నోటి ఆరోగ్యంపై దీర్ఘకాలిక ప్రభావం పడుతుంది.

తాత్కాలిక ఉపశమనం: మీకు నోటి దుర్వాసన ఉంటే మౌత్ వాష్ కేవలం తాత్కాలిక తాజాదనాన్ని ఇస్తుంది. ఆ దుర్వాసనకు అసలు కారణం కడుపు, చిగుళ్లు లేదా దంతాలలో ఉండవచ్చు, అది అలాగే ఉండిపోతుంది.

అలెర్జీలు, చికాకు: మౌత్ వాష్‌ను తరచుగా వాడటం వల్ల కొంతమందిలో నోటి పూతల, చిగుళ్ల చికాకు లేదా అలెర్జీలు వచ్చే ప్రమాదం ఉంది.

మౌత్ వాష్ ఎప్పుడు వాడాలి?

నోటిని శుభ్రంగా ఉంచుకోవడానికి బ్రషింగ్, ఫ్లాసింగ్ అత్యంత ముఖ్యం. మౌత్ వాష్ అనేది ఒక అనుబంధ చర్య మాత్రమే. మీకు తరచుగా చిగుళ్ల పూతల, నిరంతర దుర్వాసన లేదా తీవ్రమైన ప్లేక్ వంటి సమస్యలు ఉంటేనే వైద్యులు మౌత్ వాష్‌ను సిఫార్సు చేస్తారు. అప్పుడే దాన్ని ఉపయోగించాలి.

వాడే పద్ధతి:

వైద్యులు సిఫార్సు చేసిన కాలం వరకు మాత్రమే వాడండి.

ఎల్లప్పుడూ 20 నుండి 30 సెకన్ల పాటు నోటిలో తిప్పండి.

ఎట్టి పరిస్థితుల్లోనూ మింగకండి.

చిన్న పిల్లలకు మౌత్ వాష్ ఇవ్వకూడదు.

ఆల్కహాల్ లేని మౌత్ వాష్‌ను ఎంచుకోవడం మంచిది.