బాదం, వాల్‌నట్స్ వంటి ఇతర డ్రై ఫ్రూట్స్ మాదిరిగానే, అంజీర్ పండ్లు కూడా మన ఆరోగ్యానికి అనేక ప్రయోజనాలను అందిస్తాయి. పోషకాలతో సమృద్ధిగా ఉండే అంజీర్లలో ఫైబర్, యాంటీఆక్సిడెంట్లు పుష్కలంగా ఉంటాయి. వీటిని నేరుగా తినవచ్చు లేదా నీటిలో నానబెట్టి తీసుకోవచ్చు. అయితే, ఆయుర్వేదం, పోషకాహార నిపుణుల అభిప్రాయం ప్రకారం, అంజీర్‌లను రాత్రిపూట నీటిలో నానబెట్టి, ఉదయం ఖాళీ కడుపుతో తినడం వల్ల మరిన్ని ప్రయోజనాలు లభిస్తాయి.
ఆరోగ్య ప్రయోజనాలు
మలబద్ధకాన్ని తగ్గిస్తుంది: అంజీర్ పండ్లలో అధిక మొత్తంలో ఉండే ఫైబర్, యాంటీఆక్సిడెంట్లు మలబద్ధకం సమస్యను నివారించడంలో సహాయపడతాయి. ఆరోగ్య నిపుణులు కూడా మెరుగైన పేగు ఆరోగ్యం కోసం అంజీర్‌లను తీసుకోవాలని సిఫార్సు చేస్తున్నారు. మలబద్ధకంతో బాధపడేవారు నానబెట్టిన అంజీర్‌లను క్రమం తప్పకుండా తీసుకుంటే మంచి ఫలితాలు ఉంటాయి.
బరువు తగ్గడానికి సహాయం: అంజీర్‌లను ఖాళీ కడుపుతో తినడం బరువు తగ్గడానికి ఒక సులభమైన మార్గం. వీటిలో ఉండే ఫైబర్ కడుపు నిండిన భావన కలిగించి, అనవసరమైన ఆహారం తీసుకోవడాన్ని తగ్గిస్తుంది.
రక్తంలో చక్కెర స్థాయిలను నియంత్రిస్తుంది: అంజీర్లలో పొటాషియం పుష్కలంగా ఉంటుంది. ఇది రక్తంలో చక్కెర స్థాయిలను నియంత్రించడంలో సహాయపడుతుంది. అలాగే, వీటిలో ఉండే క్లోరోజెనిక్ ఆమ్లం గ్లూకోజ్ స్థాయిలను తగ్గించడంలో సహాయపడుతుందని పలు అధ్యయనాలు రుజువు చేశాయి.
ఎముకల బలోపేతం: అంజీర్ పండ్లలో కాల్షియం అధికంగా ఉంటుంది. ఎముకల ఆరోగ్యానికి, వాటిని బలోపేతం చేయడానికి ఇవి ఎంతగానో ఉపయోగపడతాయి. ప్రతి ఉదయం ఖాళీ కడుపుతో నానబెట్టిన అంజీర్‌లను తినడం వల్ల ఎముకలు దృఢంగా తయారవుతాయి.
రక్తపోటును నియంత్రణ: అంజీర్లలో ఉండే పొటాషియం రక్తపోటును అదుపులో ఉంచుతుంది. అలాగే, యాంటీఆక్సిడెంట్లు కొలెస్ట్రాల్‌ను తగ్గించి, గుండె జబ్బుల ప్రమాదాన్ని కూడా తగ్గిస్తాయి.
