Drinking Water from Clay Pot: మండుతున్న ఎండలు, ఉక్కిరిబిక్కిరి చేసే వేడి.. వేసవి వచ్చిందంటే చాలు మన శరీరం చల్లదనాన్ని కోరుకుంటుంది. దాహం తీర్చుకోవడానికి మనం రకరకాల శీతల పానీయాలు, ఫ్రిజ్ నీటి వైపు వెళ్తుంటాం. కానీ, మన పూర్వీకుల కాలం నుండి వస్తున్న 'మట్టి కుండ' ఇచ్చే చల్లదనం, ఆరోగ్యం మరేదీ ఇవ్వలేదు. మట్టి కుండలోని నీరు కేవలం దాహాన్ని తీర్చడమే కాదు, శరీరంలోని ఉష్ణోగ్రతను సహజంగా నియంత్రిస్తుంది. అయితే, ఆ నీరు మనకు పూర్తి ఆరోగ్యాన్ని ఇవ్వాలంటే, కుండ శుభ్రత విషయంలో మనం కొన్ని ప్రత్యేక జాగ్రత్తలు పాటించాలి.
చాలామంది కొత్త కుండను మార్కెట్ నుండి తెచ్చిన వెంటనే నీరు నింపి వాడుతుంటారు. కానీ నిపుణులు ఏం చెబుతున్నారంటే.. కొత్త కుండను వాడే ముందు కనీసం ఒక రోజంతా మంచినీటిలో నానబెట్టాలి. ఇలా చేయడం వల్ల మట్టిలోని దుమ్ము కణాలు పోవడమే కాకుండా, కుండకున్న సూక్ష్మ రంధ్రాలు తెరుచుకుంటాయి. ఈ రంధ్రాల ద్వారానే నీరు ఆవిరవుతూ, లోపల ఉన్న నీటిని సహజంగా చల్లబరుస్తుంది. అందుకే ఈ మొదటి అడుగు చాలా ముఖ్యం.
ఇక రోజువారీ శుభ్రత విషయానికి వస్తే.. కుండలో నీరు నిరంతరం ఉండటం వల్ల పాచి పట్టే అవకాశం ఉంది. అందుకే ప్రతిరోజూ నీటిని మార్చాలి. కుండను కడిగేటప్పుడు గోరువెచ్చని నీటిని వాడటం అలవాటు చేసుకోండి. దీనివల్ల హానికరమైన బాక్టీరియా చేరకుండా ఉంటుంది.
ఇక్కడ మనం చేసే అతి పెద్ద తప్పు ఏమిటంటే.. పాత్రలు కడిగే సబ్బును లేదా డిటర్జెంట్ లిక్విడ్ను వాడటం. మట్టి కుండకు ఉండే రంధ్రాలు ఆ సబ్బులోని రసాయనాలను పీల్చుకుంటాయి. ఇది నీటి రుచిని మార్చడమే కాకుండా, మన ఆరోగ్యానికి కూడా హానికరం. మరి కుండను ఉప్పు లేదా బేకింగ్ సోడా. కొద్దిగా ఉప్పును లేదా బేకింగ్ సోడాను ఉపయోగించి మెత్తని స్క్రబ్బర్తో రుద్దితే కుండ తళతళలాడుతుంది. ఎటువంటి రసాయనాలు లేకుండా సహజంగా శుభ్రపడుతుంది.
