Excess Alcohol Consumption: అధికంగా మద్యం సేవించడం యువత ఆరోగ్యానికి పెను ప్రమాదంగా పరిణమిస్తోందని తాజా అధ్యయనాలు హెచ్చరిస్తున్నాయి. ముఖ్యంగా యునైటెడ్ స్టేట్స్ (US)లో నిర్వహించిన ఒక అధ్యయనం ప్రకారం, విపరీతంగా ఆల్కహాల్ తీసుకునే వారికి చిన్న వయసులోనే తీవ్రమైన మెదడు రక్తస్రావం వచ్చే ప్రమాదం ఉందని ప్రముఖ వైద్య నిపుణులు వెల్లడించారు. భారీగా మద్యం సేవించడం వల్ల శరీరంలో రక్తం గడ్డకట్టడానికి అవసరమైన ప్లేట్‌లెట్స్ సాధారణ పనితీరు తీవ్రంగా దెబ్బతింటుంది. ప్లేట్‌లెట్స్ పనిచేయకపోవడం వల్ల రక్తం గడ్డకట్టే సామర్థ్యం తగ్గిపోతుంది. ఈ బలహీనత కారణంగా, మెదడులో లేదా శరీరంలోని ఇతర భాగాలలో చిన్న గాయం లేదా పగిలిన రక్తనాళం నుంచి కూడా నియంత్రించలేని పెద్ద రక్తస్రావాలు సంభవిస్తాయి. ఆల్కహాల్ తీసుకున్నప్పుడు ఏకాగ్రత, దృష్టి లోపిస్తాయి. సరైన, తార్కిక నిర్ణయాలు తీసుకునే సామర్థ్యం క్షీణిస్తుంది. ఈ కారణంగా ప్రమాదకరమైన చర్యలు తీసుకోవడం, రోడ్డు ప్రమాదాలకు గురికావడం వంటివి పెరుగుతాయి. ఈ ప్రమాదకర పరిణామాలను దృష్టిలో ఉంచుకుని అసలు ఆల్కహాల్ తీసుకోకపోవడమే ఉత్తమమైనది సురక్షితమైనదని చెబుతున్నారు. ఈ హెచ్చరిక యువత తమ ఆరోగ్య అలవాట్లపై దృష్టి పెట్టాల్సిన అవసరాన్ని నొక్కి చెబుతోంది.
