Headache or Migraine: తలనొప్పిగా ఉందా లేక మైగ్రేనా? తేడా తెలుసుకోకపోతే ప్రమాదమే..

Headache or Migraine: తలనొప్పి అనేది మనందరికీ వచ్చే ఒక సాధారణ సమస్య. అయితే, చాలామంది తలనొప్పి రాగానే ఒక పెయిన్ కిల్లర్ వేసుకుని లేదా కాసేపు విశ్రాంతి తీసుకుని వదిలేస్తుంటారు. కానీ, పదే పదే తలనొప్పి వస్తుంటే అది కేవలం సాధారణ నొప్పి మాత్రమే కాకపోవచ్చు, అది మైగ్రేన్ అయ్యే అవకాశం ఉందని ఆరోగ్య నిపుణులు హెచ్చరిస్తున్నారు. వీటి మధ్య తేడాలను గుర్తించకపోతే అది మన రోజువారీ జీవితాన్ని అతలాకుతలం చేస్తుంది.

సాధారణ తలనొప్పి vs మైగ్రేన్: తేడాలు ఇవే

సాధారణ తలనొప్పి: ఇది తల లేదా నుదిటిపై ఒత్తిడి లాగా అనిపిస్తుంది. అలసట, ఒత్తిడి, సరిగ్గా నిద్ర లేకపోవడం లేదా ఎక్కువసేపు కంప్యూటర్ స్క్రీన్ చూడటం వల్ల వస్తుంది. ఇది కాసేపు విశ్రాంతి తీసుకుంటే తగ్గిపోతుంది.

మైగ్రేన్: ఇది తలకి ఒక వైపున మాత్రమే తీవ్రమైన నొప్పిని కలిగిస్తుంది. ఈ నొప్పితో పాటు వికారం, వాంతులు, ప్రకాశవంతమైన కాంతిని లేదా పెద్ద శబ్దాలను భరించలేకపోవడం వంటి లక్షణాలు ఉంటాయి. ఈ నొప్పి గంటల నుండి రోజుల తరబడి వేధిస్తుంది.

మైగ్రేన్ నివారణకు చిట్కాలు:

మైగ్రేన్ సమస్య ఉన్నవారు తమ జీవనశైలిలో ఈ మార్పులు చేసుకోవడం తప్పనిసరి:

నిద్ర వేళలు: ప్రతిరోజూ నిర్ణీత సమయానికి నిద్రపోవడం, కనీసం 7-8 గంటల నిద్ర ఉండేలా చూసుకోవాలి.

ప్రేరకాలకు దూరం: పెద్ద శబ్దాలు, మిరుమిట్లు గొలిపే కాంతి, మొబైల, టీవీల వాడకాన్ని తగ్గించాలి.

ఒత్తిడి నిర్వహణ: యోగా, ధ్యానం , లోతైన శ్వాస వ్యాయామాలు ఒత్తిడిని తగ్గించి మైగ్రేన్ రాకుండా చేస్తాయి.

ఆహారం: ఎక్కువసేపు ఆకలితో ఉండకూడదు. కెఫిన్, వేయించిన ఆహారాలు, ప్రాసెస్ చేసిన జంక్ ఫుడ్‌కు దూరంగా ఉండాలి.

సాధారణ తలనొప్పి తగ్గాలంటే:

హైడ్రేషన్: శరీరంలో నీరు తగ్గితే తలనొప్పి వస్తుంది. అందుకే రోజుకు తగినంత నీరు తాగాలి.

కళ్ళకు విశ్రాంతి: కంప్యూటర్ లేదా మొబైల్ చూసేటప్పుడు ప్రతి 20 నిమిషాలకు ఒకసారి కళ్ళకు విశ్రాంతి ఇవ్వండి.

సరైన భంగిమ: కూర్చునేటప్పుడు మెడ, భుజాలపై ఒత్తిడి పడకుండా సరైన భంగిమ పాటించాలి.