Kidney Stones vs Urinary Tract Infection: కిడ్నీ స్టోన్స్ vs యూరినరీ ఇన్ఫెక్షన్: లక్షణాల్లో తేడాలేంటి? ఎలా గుర్తించాలి?

Kidney Stones vs Urinary Tract Infection: మూత్రవిసర్జన సమయంలో తీవ్రమైన మంట, పొత్తికడుపు లేదా నడుము భాగంలో విపరీతమైన నొప్పి రావడం చాలామందిలో తరచూ కనిపించే సమస్య. అయితే ఈ లక్షణాలు కనిపించినప్పుడు అది కిడ్నీలో రాళ్ల వల్ల వస్తోందా లేక యూరినరీ ట్రాక్ట్ ఇన్ఫెక్షన్ వల్ల వస్తోందా అనే విషయంలో చాలామంది గందరగోళానికి గురవుతుంటారు. ఈ రెండు సమస్యలకు దగ్గరి పోలికలు ఉన్నప్పటికీ, వాటికి దారితీసే కారణాలు, శరీరంలో కలిగే నొప్పుల తీవ్రతలో స్పష్టమైన తేడాలుంటాయి. సరైన సమయంలో సమస్యను గుర్తించి చికిత్స తీసుకోకపోతే మూత్రపిండాల పనితీరుపై తీవ్ర ప్రభావం పడే అవకాశం ఉంది.

కిడ్నీ స్టోన్స్ ప్రధానంగా మన జీవనశైలి, ఆహారపు అలవాట్లలో లోపాలు, శరీరానికి అవసరమైనంత నీరు అందకపోవడం వల్ల ఏర్పడతాయి. శరీరంలో పేరుకుపోయే కాల్షియం, ఆక్సలేట్, యూరిక్ యాసిడ్ వంటి ఖనిజ లవణాలు మూత్రంలో సరిగ్గా కరిగిపోక స్పటికాలుగా మారి, కాలక్రమేణా గట్టి రాళ్లుగా రూపాంతరం చెందుతాయి. మరోవైపు యూరినరీ ఇన్ఫెక్షన్ అనేది బ్యాక్టీరియా వల్ల మూత్ర వ్యవస్థకు సోకే సంక్రమణం. వ్యక్తిగత పరిశుభ్రత లోపించడం, మూత్ర విసర్జనను ఎక్కువ సమయం ఆపుకోవడం వల్ల బ్యాక్టీరియా మూత్రనాళం ద్వారా లోపలికి ప్రవేశించి ఈ ఇన్ఫెక్షన్‌ను కలిగిస్తుంది. కొన్నిసార్లు ఇన్ఫెక్షన్ తీవ్రమై మూత్రపిండాల వరకు పాకితే, అది కూడా రాళ్లు ఏర్పడటానికి దారితీసే ప్రమాదం ఉంది.

ఈ రెండింటి మధ్య ప్రధాన వ్యత్యాసాన్ని నొప్పి స్వభావాన్ని బట్టి సులభంగా గుర్తించవచ్చు. కిడ్నీలో రాళ్లు ఉన్నప్పుడు వీపు వెనుక భాగంలో, పక్కటెముకల క్రింద లేదా పొత్తికడుపులో భరించలేనంత పదునైన నొప్పి అకస్మాత్తుగా మొదలవుతుంది. ఈ నొప్పి తరంగాలులా పెరుగుతూ తగ్గుతూ గజ్జల వైపు పాకుతుంది. అంతేకాకుండా మూత్రంలో రక్తం పడటం, తీవ్రమైన వికారం, వాంతులు రావడం వంటివి కిడ్నీ స్టోన్స్ ప్రధాన లక్షణాలుగా కనిపిస్తాయి. అదే యూరినరీ ఇన్ఫెక్షన్ బారిన పడినప్పుడు పొత్తికడుపు కింది భాగంలో బరువుగా, మందకొడిగా నొప్పి ఉంటుంది. మూత్రవిసర్జన సమయంలో భరించలేని మంట, కొద్దికొద్దిగా మాటిమాటికీ మూత్రానికి వెళ్లాలనిపించడం, మూత్రం దుర్వాసన రావడం మరియు చలిజ్వరం వంటివి ప్రధానంగా కనిపిస్తాయి.

ఈ రెండు సమస్యల నుంచి ఉపశమనం పొందడానికి శరీరంలో నీటి శాతాన్ని ఎప్పుడూ సమతుల్యంగా ఉంచుకోవడం అత్యంత ముఖ్యం. రోజూ కనీసం రెండున్నర నుంచి మూడు లీటర్ల నీరు తాగడం వల్ల లవణాలు గడ్డకట్టకుండా మూత్రం ద్వారా బయటకు కొట్టుకుపోతాయి, అలాగే బ్యాక్టీరియా కూడా లోపల చేరకుండా శుభ్రపడుతుంది. ఆహారంలో అధిక ఉప్పు, జంక్ ఫుడ్‌ను తగ్గించడంతో పాటు వ్యక్తిగత పరిశుభ్రతను ఖచ్చితంగా పాటించాలి. మూత్రంలో మంట లేదా నడుము నొప్పి తీవ్రంగా వేధిస్తున్నప్పుడు ఎలాంటి సొంత వైద్యం చేసుకోకుండా, వెంటనే యూరిన్ కల్చర్ లేదా అల్ట్రాసౌండ్ స్కాన్ వంటి పరీక్షలు చేయించుకుని వైద్యుల సలహా మేరకు మాత్రమే మందులు వాడాలి.