Knee Pain in Your 20s or 30s: 20–30 ఏళ్లకే మోకాళ్ల నొప్పులా? యువత చేస్తున్న ఈ తప్పులే ప్రధాన కారణం..

Knee Pain in Your 20s or 30s: ఒకప్పుడు మోకాళ్ల నొప్పులు, కీళ్ల సమస్యలు అంటే వృద్ధాప్యంలో వచ్చే వ్యాధులుగా భావించేవారు. కానీ ప్రస్తుత కాలంలో 20 నుంచి 30 ఏళ్ల లోపు యువత కూడా తీవ్రమైన మోకాళ్ల నొప్పులు, అసౌకర్యంతో ఆసుపత్రుల బాట పడుతున్నారు. ఇది కేవలం వయసు సంబంధిత కీళ్ల అరుగుదల మాత్రమే కాదని.. ఆధునిక జీవనశైలి, శారీరక అలవాట్లలో చేస్తున్న చిన్నపాటి పొరపాట్లే యువతలో మోకాళ్ల ఆరోగ్యాన్ని దెబ్బతీస్తున్నాయని వైద్య నిపుణులు హెచ్చరిస్తున్నారు.

యువతలో మోకాళ్ల నొప్పులకు ప్రధాన కారణాలు

వీకెండ్ వారియర్ అలవాటు

వారమంతా డెస్క్ లేదా ల్యాప్‌టాప్ ముందు కదలకుండా కూర్చుని పనిచేసే యువత.. వారాంతాల్లో మాత్రం ఒక్కసారిగా తీవ్రమైన వ్యాయామాలు, క్రికెట్, ఫుట్‌బాల్ లేదా భారీ జిమ్ వర్కౌట్లలో పాల్గొంటున్నారు. క్రమం తప్పకుండా వ్యాయామం చేయని కండరాలు ఈ ఆకస్మిక భారాన్ని తట్టుకోలేక మోకాలి కీళ్లపై తీవ్ర ఒత్తిడి పడుతుంది.

సరైన వార్మప్ లేకుండా ఆటలు – స్పోర్ట్స్ ఇంజ్యూరీలు:

క్రికెట్, బ్యాడ్మింటన్, ఫుట్‌బాల్ వంటి క్రీడల్లో వేగంగా పరుగెత్తడం, ఆకస్మికంగా దిశ మార్చడం, దూకడం వంటి కదలికలు ఉంటాయి. సరైన వార్మప్, ఫిట్‌నెస్ లేకుండా ఆడే సమయంలో మోకాలి లిగమెంట్లు బెణకడం లేదా దెబ్బతినడం జరుగుతుంది. చిన్నపాటి మలుపులు లేదా జారడం కూడా దీర్ఘకాలిక సమస్యలకు దారితీయవచ్చు.

అధిక శరీర బరువు

శరీర భారాన్ని మోసే అత్యంత కీలకమైన కీళ్లలో మోకాలు ఒకటి. బరువు పెరిగే కొద్దీ నడిచేటప్పుడు, మెట్లు ఎక్కేటప్పుడు మోకాళ్లపై ఒత్తిడి రెట్టింపు అవుతుంది. ఈ నిరంతర ఒత్తిడి వల్ల లేత వయసులోనే కీళ్లలోని కార్టిలేజ్ అరిగిపోయే ప్రమాదం పెరుగుతోంది.

తప్పుడు పద్ధతుల్లో వర్కౌట్లు:

సరైన గైడెన్స్ లేకుండా బరువులు ఎత్తడం, కాళ్ల కండరాలను బలోపేతం చేయకుండా అతిగా వ్యాయామం చేయడం, తగినంత విశ్రాంతి తీసుకోకపోవడం వల్ల మోకాళ్లపై ఒత్తిడి పెరుగుతుంది.

నిర్లక్ష్యం చేయకూడని ప్రమాదకర సంకేతాలు:

విశ్రాంతి తీసుకున్నా తగ్గకుండా నిరంతరం మోకాళ్ల నొప్పి వేధించడం.

మోకాలి చుట్టూ తరచూ వాపు, వెచ్చదనం కనిపించడం.

నడుస్తున్నప్పుడు మోకాలు లాక్ అయినట్లు లేదా జారినట్లు అనిపించడం.

కాలుపై శరీర బరువును మోపలేకపోవడం.

నిపుణులు సూచిస్తున్న జాగ్రత్తలు:

క్రమబద్ధమైన వ్యాయామం:

వ్యాయామం లేదా ఆటలు ఆడే ముందు తప్పనిసరిగా వార్మప్, స్ట్రెచింగ్ చేయాలి.

కండరాల బలోపేతం:

మోకాళ్లకు రక్షణగా ఉండే తొడ కండరాలు బలపడేలా తేలికపాటి వ్యాయామాలు చేయాలి.

బరువు నియంత్రణ:

బరువును అదుపులో ఉంచుకుంటే మోకాళ్లపై ఒత్తిడి గణనీయంగా తగ్గుతుంది.

నొప్పి తీవ్రంగా ఉంటే సొంత చికిత్సలతో కాలయాపన చేయకుండా వెంటనే ఆర్థోపెడిక్ వైద్యుడిని సంప్రదించి పరీక్షలు చేయించుకోవాలి.