Leg Pain Without Any Obvious Reason: కారణం లేకుండానే కాళ్ల నొప్పులా? నిర్లక్ష్యం చేస్తే ముప్పే..

Leg Pain Without Any Obvious Reason: ఎలాంటి దెబ్బ తగలకపోయినా, కింద పడకపోయినా కొందరిలో కాళ్ల నొప్పులు తరచూ వేధిస్తుంటాయి. అలసట వల్లనే నొప్పి వస్తోందని భావించి చాలామంది పెయిన్ కిల్లర్లతో సరిపెట్టుకుంటారు. అయితే, కారణం లేకుండా వచ్చే కాళ్ల నొప్పులు అంతర్గత అనారోగ్య సమస్యలకు సంకేతం కావచ్చని నిపుణులు హెచ్చరిస్తున్నారు.

కాళ్ల నొప్పుల వెనుక దాగి ఉండే ప్రధాన కారణాలు

రక్త ప్రసరణ లోపాలు:

కాళ్లకు రక్తాన్ని సరఫరా చేసే ధమనులలో కొవ్వు పేరుకుపోయినప్పుడు రక్త ప్రవాహం తగ్గుతుంది. దీనివల్ల కొద్ది దూరం నడవగానే కాళ్లు తీవ్రంగా లాగడం, పిక్కల్లో విపరీతమైన నొప్పి రావడం జరుగుతుంది. కాసేపు విశ్రాంతి తీసుకోగానే నొప్పి తగ్గుతుంటుంది.

రక్తం గడ్డకట్టడం :

కాలు లోపలి సిరల్లో రక్తం గడ్డకట్టినప్పుడు ఒక కాలులో తీవ్రమైన నొప్పి, వాపు, చర్మం ఎర్రబడటం లేదా ఆ భాగం వేడిగా అనిపించడం వంటివి కనిపిస్తాయి. ఇది ప్రమాదకరమైన పరిస్థితి; వెంటనే చికిత్స తీసుకోకపోతే ఆ రక్తం గడ్డ ఊపిరితిత్తులకు చేరే ప్రమాదం ఉంది.

పోషకాల కొరత :

శరీరంలో విటమిన్ డి, విటమిన్ బి12, కాల్షియం, పొటాషియం లేదా మెగ్నీషియం లోపించినప్పుడు కండరాల పనితీరు దెబ్బతింటుంది. దీని కారణంగా పిక్కలు పట్టేయడం, సూదులతో గుచ్చినట్లు అనిపించడం వంటి సమస్యలు వస్తాయి.

నరాల సమస్యలు - సయాటికా

వెన్నెముకలోని నరాలపై ఒత్తిడి పడినప్పుడు నడుము నుంచి పిరుదుల మీదుగా కాలి చివరి వరకూ తీవ్రమైన నొప్పి, తిమ్మిర్లు పాకుతాయి. అలాగే మధుమేహం నియంత్రణలో లేనివారిలో కూడా పెరిఫెరల్ న్యూరోపతి వల్ల కాళ్లలో మంటలు, స్పర్శ తగ్గడం వంటి లక్షణాలు కనిపిస్తాయి.

డీహైడ్రేషన్ - ఎలక్ట్రోలైట్ల సమతుల్యత లోపించడం

శరీరంలో నీటి శాతం తగ్గడం లేదా ఎక్కువ సమయం ఒకే భంగిమలో కూర్చోవడం వల్ల రాత్రివేళ కండరాలు బిగుసుకుపోయి తీవ్ర నొప్పి వస్తుంది.

ఎప్పుడు వైద్యుడిని సంప్రదించాలి?

నొప్పి రోజురోజుకూ పెరుగుతున్నప్పుడు.

కాలు అకస్మాత్తుగా వాచి, ఎరుపుదనం లేదా వేడి కనిపించినప్పుడు.

నడిచేటప్పుడు తీవ్రమైన నొప్పి వచ్చి, నడవలేని పరిస్థితి ఏర్పడినప్పుడు.

కాళ్ల నొప్పితో పాటు ఆయాసం లేదా శ్వాస తీసుకోవడంలో ఇబ్బంది తలెత్తినప్పుడు.