Liver Problems in Children: పిల్లల్లో కాలేయ సమస్యలు.. తల్లిదండ్రులు గమనించాల్సిన కీలక లక్షణాలు ఇవే..

Liver Problems in Children: సాధారణంగా కాలేయ సంబంధిత సమస్యలు లేదా వ్యాధులు పెద్దవారిలోనే ఎక్కువగా కనిపిస్తుంటాయని అనుకుంటారు. కానీ, ప్రస్తుత కాలంలో మారుతున్న జీవనశైలి, ఆహార అలవాట్లు, జన్యుపరమైన కారణాల వల్ల పిల్లలు కూడా లివర్ సమస్యల బారిన పడుతుండటం కలవరపెడుతోంది. పిల్లల్లో కాలేయ వ్యాధులు వస్తే ప్రారంభ దశలోనే వాటిని గుర్తించడం చాలా ముఖ్యం. నిర్లక్ష్యం చేస్తే అవి తీవ్రరూపం దాల్చే ప్రమాదం ఉందని ఆరోగ్య నిపుణులు హెచ్చరిస్తున్నారు. పిల్లల్లో కాలేయ సమస్యలు ఉన్నప్పుడు కనిపించే ప్రధాన లక్షణాలు మరియు తల్లిదండ్రులు తీసుకోవాల్సిన జాగ్రత్తల గురించి వివరంగా తెలుసుకుందాం.

పిల్లల్లో కనిపించే ప్రధాన లక్షణాలు..

కామెర్లు :

కళ్ళు, చర్మం లేదా గోళ్ళు పసుపు రంగులోకి మారడం కాలేయం సరిగ్గా పనిచేయకపోవడానికి ప్రధాన సంకేతం. కామెర్లు ఎక్కువ రోజులు తగ్గకుండా ఉంటే వెంటనే వైద్యుడిని సంప్రదించాలి.

కడుపు ఉబ్బరం లేదా వాపు:

పిల్లల కడుపు భాగం సాధారణం కంటే ఎక్కువగా ఉబ్బినట్లు లేదా గట్టిగా ఉన్నట్లు అనిపిస్తే, కాలేయంలో వాపు లేదా ద్రవం చేరడం కారణం కావచ్చు.

మూత్రం, మలం రంగులో మార్పు:

గాఢమైన పసుపు రంగులో మూత్రం రావడం మరియు మలం లేత రంగులో రావడం కాలేయ సమస్యకు ముఖ్యమైన సూచన.

విపరీతమైన అలసట - ఆకలి మందగించడం:

ఆటపాటలతో ఉత్సాహంగా ఉండాల్సిన పిల్లలు ఎప్పుడూ నిరసంగా ఉండటం, తగినంతగా ఆహారం తీసుకోకపోవడం, బరువు తగ్గడం వంటివి గమనించాలి.

చర్మంపై దురదలు:

కాలేయంలో పిత్త రసం సరిగ్గా ప్రవహించనప్పుడు శరీరంలో వ్యర్థాలు పెరిగి చర్మంపై విపరీతమైన దురదలు రావచ్చు.

శరీరంపై తేలికగా తారసపడే గాయాలు :

చిన్న దెబ్బ తగిలినా చర్మం కింద రక్తం గడ్డకట్టడం లేదా రక్తం త్వరగా గడ్డకట్టకపోవడం వంటివి కూడా లివర్ పనితీరు మందగించడాన్ని సూచిస్తాయి.

తల్లిదండ్రులు చేయవలసినవి:

సమతుల్య ఆహారం:

పిల్లలకు బయటి జంక్ ఫుడ్, ప్రాసెస్ చేసిన ఆహారాలు తగ్గించి, ఇంట్లో వండిన పౌష్టికాహారాన్ని అందించాలి.

వ్యాక్సినేషన్:

హెపటైటిస్ ఎ, హెపటైటిస్ బి వ్యాక్సిన్లను చిన్నతనంలోనే సమయానికి వేయించాలి.

స్వచ్ఛమైన నీరు: పిల్లలకు ఎల్లప్పుడూ కాచి చల్లార్చిన సురక్షితమైన నీటినే తాగించాలి.

డాక్టర్ సలహా లేని మందులు వద్దు:

వైద్యుల సూచన లేకుండా స్వయంగా పిల్లలకు యాంటీబయోటిక్స్ లేదా ఇతర తీవ్రమైన మందులు వాడకూడదు.