Low Platelet Count: ప్లేట్‌లెట్లు పడిపోయాయా? వారం రోజుల్లో పెంచే సహజ ఆహారాలివే..
సహజ ఆహారాలివే..
Low Platelet Count: వర్షాకాలం, చలికాలాల్లో డెంగ్యూ, మలేరియా, చికున్‌గున్యా వంటి విషజ్వరాలు వేగంగా విస్తరిస్తుంటాయి. వీటిలో ప్రధానంగా డెంగ్యూ బారిన పడినప్పుడు శరీరంలో రక్తకణాలు ప్రమాదకర స్థాయికి పడిపోతుంటాయి. సాధారణంగా రక్తంలో ప్లేట్‌లెట్ల సంఖ్య 1.5 లక్షల నుంచి 4.5 లక్షల వరకు ఉండాలి. కానీ డెంగ్యూ వైరస్ ప్రభావం వల్ల ఈ సంఖ్య వేలల్లోకి పడిపోతుంది. సరైన సమయంలో అప్రమత్తమై ఆహార నియమాలు, చికిత్స తీసుకోకపోతే అంతర్గత రక్తస్రావం జరిగి ప్రాణాలకే ముప్పు వాటిల్లే ప్రమాదం ఉంది. వైద్యుల పర్యవేక్షణతో పాటు ఇంట్లోనే లభించే సహజ ఆహారాలు, ఆయుర్వేద చిట్కాల ద్వారా ప్లేట్‌లెట్ల సంఖ్యను వేగంగా మెరుగుపరుచుకోవచ్చు.
ప్లేట్‌లెట్లను పెంచే అద్భుత సహజ ఆహారాలు.
బొప్పాయి ఆకు రసం - పచ్చి బొప్పాయి
డెంగ్యూ చికిత్సలో బొప్పాయి ఆకు రసం అత్యంత శక్తిమంతమైన ఔషధంగా పనిచేస్తుందని పలు పరిశోధనల్లో తేలింది. తాజా బొప్పాయి ఆకుల రసం రోజుకు రెండు చెంచాలు తీసుకోవడం వల్ల ప్లేట్‌లెట్లు వేగంగా పెరుగుతాయి. అలాగే పచ్చి బొప్పాయిని ఆహారంలో భాగం చేసుకోవడం వల్ల కూడా మంచి ఫలితం ఉంటుంది.
గిలోయ్
ఆయుర్వేదంలో గిలోయ్‌కు అమృత సమానమైన గుర్తింపు ఉంది. ఇది శరీరంలో రోగనిరోధక శక్తిని పెంచడంతో పాటు ఇన్ఫెక్షన్లతో పోరాడుతుంది. తాజా తిప్పతీగ కాషాయం లేదా మార్కెట్లో లభించే గిలోయ్ రసాన్ని తీసుకుంటే వారం రోజుల్లోనే ప్లేట్‌లెట్లలో స్పష్టమైన మార్పు కనిపిస్తుంది.
కివీ పండు - దానిమ్మ
కివీ పండులో విటమిన్ సి, ఫైబర్, యాంటీఆక్సిడెంట్లు పుష్కలంగా ఉంటాయి. ఇవి శరీరం ఇన్ఫెక్షన్ నుంచి త్వరగా కోలుకోవడానికి సహకరిస్తాయి. ఇక దానిమ్మ రక్తంలో హిమోగ్లోబిన్ శాతాన్ని పెంచడంతో పాటు అలసట, నీరసాన్ని తగ్గిస్తుంది.
గోధుమ గడ్డి, కలబంద రసం
తాజా వీట్‌గ్రాస్ , అలోవెరా రసాలు రక్తాన్ని శుద్ధి చేయడమే కాకుండా తెల్ల రక్తకణాలు, ప్లేట్‌లెట్ల ఉత్పత్తిని పెంచుతాయి. వీటికితోడు గుమ్మడి గింజలు, అత్తి పండ్లు కూడా ప్లేట్‌లెట్లను మెరుగుపరచడంలో అద్భుతంగా పనిచేస్తాయి.
కొబ్బరి నీళ్లు - పుష్కలమైన ద్రవాలు
డెంగ్యూ తీవ్రత ఉన్నప్పుడు శరీరం డీహైడ్రేషన్‌కు గురికాకుండా చూసుకోవడం ముఖ్యం. రోజూ పుష్కలంగా నీరు తాగడంతో పాటు ఒకటి లేదా రెండు కొబ్బరి నీళ్లు తాగడం వల్ల ఎలక్ట్రోలైట్ల సమతుల్యత దెబ్బతినకుండా ఉంటుంది. తేనెతో కలిపిన మిల్క్ థిస్టిల్ రసం తీసుకోవడం కూడా కాలేయ ఆరోగ్యానికి, రక్తకణాల వృద్ధికి దోహదపడుతుంది.
ఆహార నియమాలు ప్లేట్‌లెట్లను పెంచడంలో సహాయకారిగా మాత్రమే పనిచేస్తాయి. ప్లేట్‌లెట్ల సంఖ్య 20 వేల కంటే తక్కువకు పడిపోయినా, శరీరంలో ఎక్కడైనా రక్తస్రావం కనిపించినా, తీవ్రమైన కడుపునొప్పి లేదా వాంతులు ఉన్నా ఏమాత్రం నిర్లక్ష్యం చేయకుండా తక్షణమే ఆసుపత్రిలో చేరి వైద్యుల సూచన మేరకు చికిత్స పొందాలి.
