Morning Walk: మార్నింగ్ వాక్‌లో ఈ తప్పులు చేస్తున్నారా..? ఆరోగ్యానికి హాని తప్పదు.
ఆరోగ్యానికి హాని తప్పదు.
Morning Walk: నడక అనేది ఒక అద్భుతమైన వ్యాయామం. ఇది బరువు తగ్గడానికి, మానసిక స్థితి మెరుగుపడటానికి, గుండె ఆరోగ్యానికి ఎంతగానో తోడ్పడుతుంది. ముఖ్యంగా ఉదయం పూట స్వచ్ఛమైన గాలిలో నడవడం వల్ల అదనపు ప్రయోజనాలు లభిస్తాయి. అయితే, ఉదయం నడక సమయంలో మనం చేసే కొన్ని పొరపాట్లు ఆరోగ్యంపై ప్రతికూల ప్రభావం చూపుతాయని నిపుణులు హెచ్చరిస్తున్నారు. అవేంటో తెలుసుకుందాం.
మార్నింగ్ వాక్‌లో చేయకూడని తప్పులు :
నీళ్లు తాగకుండా వెళ్లడం : చాలామంది నీళ్లు తాగకుండానే నడకకు వెళ్తుంటారు. దీనివల్ల శరీరం త్వరగా అలసిపోవడమే కాకుండా, డీహైడ్రేషన్‌కు గురవుతుంది. నడకకు వెళ్లే 15-20 నిమిషాల ముందు ఒక గ్లాసు గోరువెచ్చని నీరు తాగడం ఉత్తమం.
ఖాళీ కడుపుతో ఎక్కువసేపు నడవడం: ఉదయం ఖాళీ కడుపుతో ఎక్కువసేపు నడిస్తే రక్తంలో చక్కెర స్థాయిలు పడిపోతాయి. ఇది తల తిరగడం, అలసట, తలనొప్పి వంటి సమస్యలకు దారితీస్తుంది. 20 నిమిషాల కంటే ఎక్కువ నడవాలనుకుంటే, ముందుగా అరటిపండు, నానబెట్టిన వేరుశెనగలు లేదా కొన్ని ఎండిన పండ్ల వంటి తేలికపాటి ఆహారం తీసుకోవాలి.
వార్మ్-అప్ చేయకపోవడం: నడకకు ముందు శరీరానికి వార్మ్-అప్ చాలా ముఖ్యం. వార్మ్-అప్ చేయకుండా నేరుగా నడవడం వల్ల కండరాలు, కీళ్లపై ఒత్తిడి పడుతుంది. కనీసం 2-5 నిమిషాలు శరీరాన్ని వేడెక్కించడం మంచిది.
ఖాళీ కడుపుతో కాఫీ తాగడం: కొంతమంది ఉత్సాహం కోసం నడకకు ముందు కాఫీ తాగుతుంటారు. ఖాళీ కడుపుతో కెఫిన్ తీసుకోవడం వల్ల అసిడిటీ, గుండెల్లో మంట వంటి సమస్యలు రావొచ్చు. నడక పూర్తయిన తర్వాత తేలికపాటి అల్పాహారం తీసుకుని కాఫీ తాగడం మంచిది.
టాయిలెట్‌కు వెళ్లకుండా నడకకు వెళ్లడం: నడకకు ముందు వాష్‌రూమ్‌కు వెళ్లకపోతే కడుపు సమస్యలు, యూరినరీ ట్రాక్ట్ ఇన్‌ఫెక్షన్ (UTI) వంటివి వచ్చే అవకాశం ఉంది. అందుకే, నడకకు వెళ్లే ముందు కచ్చితంగా వాష్‌రూమ్‌కు వెళ్లడం వల్ల ప్రశాంతంగా, ఏకాగ్రతతో నడవవచ్చు.
ఈ చిన్నపాటి జాగ్రత్తలు తీసుకోవడం ద్వారా ఉదయం నడక వల్ల లభించే ప్రయోజనాలను పూర్తిస్థాయిలో పొందవచ్చని నిపుణులు సూచిస్తున్నారు.
