Mistaking a Heart Attack for Gas: గ్యాస్ అనుకుని గుండెపోటును విస్మరిస్తున్నారా? ఈ ముందస్తు హెచ్చరికలతో ప్రాణాలు కాపాడుకోండి

Mistaking a Heart Attack for Gas: ఆధునిక ఉరుకుల పరుగుల జీవనశైలిలో గుండెపోటు అనేది వయసుతో సంబంధం లేకుండా అత్యంత ప్రమాదకరమైన ఆరోగ్య సమస్యగా మారింది. అయితే, చాలామంది గుండెపోటు ప్రారంభ లక్షణాలను సాధారణ అలసట, గ్యాస్ ట్రబుల్, అజీర్ణం లేదా మానసిక ఒత్తిడిగా భావించి ప్రాణాంతకమైన తప్పు చేస్తుంటారు. శరీరం ముందుగానే ఇచ్చే ఈ హెచ్చరిక సంకేతాలను సకాలంలో గుర్తిస్తే ప్రాణాపాయాన్ని నివారించవచ్చు.

గుండెపోటు ఎందుకు వస్తుంది?

గుండెకు రక్తాన్ని చేరవేసే ధమనులలో కొలెస్ట్రాల్ ఫలకాలు పేరుకుపోయినప్పుడు రక్త ప్రవాహం మందగిస్తుంది. ఈ ఫలకాలు చిట్లి రక్తం గడ్డకట్టినప్పుడు గుండె కండరాలకు ఆక్సిజన్ సరఫరా నిలిచిపోయి గుండెపోటుకు దారితీస్తుంది.

ముఖ్యమైన ముందస్తు హెచ్చరిక సంకేతాలు

ఛాతీలో అసౌకర్యం: ఛాతీ భాగంలో ఏదో బరువు పెట్టినట్లు, ఒత్తిడిగా, పట్టేసినట్లు లేదా మంటగా అనిపించడం. ఈ నొప్పి కాసేపు తగ్గి మళ్లీ రావచ్చు.

శరీర ఇతర భాగాల్లో నొప్పి: నొప్పి కేవలం ఛాతీకే పరిమితం కాదు. భుజాలు, ఎడమ చేయి (లేదా రెండు చేతులు), మెడ, దవడ, దంతాలు, వీపు లేదా పొత్తికడుపు వరకు ఈ అసౌకర్యం వ్యాపించవచ్చు. చాలామంది దీనిని సాధారణ కండరాల నొప్పి లేదా గ్యాస్ అనుకుంటారు.

విపరీతమైన అలసట, ఆయాసం: తగినంత విశ్రాంతి తీసుకున్నా తగ్గని నీరసం, కొద్ది దూరం నడిచినా లేదా చిన్న పనులు చేసినా విపరీతమైన ఆయాసం రావడం ప్రధాన సంకేతం. ఈ లక్షణం మహిళల్లో ఎక్కువగా కనిపిస్తుంది

.

చల్లని చెమటలు - తలతిరగడం: ఎండ లేకపోయినా అకస్మాత్తుగా చల్లని చెమటలు పట్టడం, కళ్లు తిరగడం, వికారం, వాంతులు లేదా స్పృహ తప్పడం వంటివి గుండె ప్రమాదంలో పడిందనడానికి నిదర్శనం.

తీవ్రమైన ఆందోళన: ఎటువంటి కారణం లేకుండానే విపరీతమైన భయం, చంచలత్వం కలగడం కూడా దీని పరిధిలోకి వస్తుంది.

ఎవరికి ప్రమాదం ఎక్కువ?

మధుమేహం (షుగర్), అధిక రక్తపోటు (బీపీ), ఊబకాయం మరియు అధిక కొలెస్ట్రాల్ ఉన్నవారు ఈ లక్షణాలు కనిపించినప్పుడు ఏమాత్రం అలసత్వం ప్రదర్శించకూడదు.

ఎప్పుడు అత్యవసర చికిత్స అవసరం?

ఛాతీలో ఒత్తిడి, శ్వాస తీసుకోవడంలో ఇబ్బంది, అధిక చెమటలు లేదా దవడ, చేతుల్లో నొప్పి వంటి లక్షణాలు 5 నిమిషాల కంటే ఎక్కువ సమయం కొనసాగితే ఏమాత్రం ఆలస్యం చేయకుండా వెంటనే సమీపంలోని ఆసుపత్రికి తరలించాలి. గుండెపోటు విషయంలో ప్రతీ క్షణం ఎంతో విలువైనది శరీర సంకేతాలను గుర్తించి, సకాలంలో స్పందించి విలువైన ప్రాణాలను కాపాడుకోండి.