Nosebleeds in Summer: వేసవిలో ముక్కు నుండి రక్తం కారుతోందా? ఏం చేయాలో తెలుసా..?

Nosebleeds in Summer: వేసవి తీవ్రత పెరిగేకొద్దీ వడదెబ్బతో పాటు ముక్కు నుండి రక్తం కారే సమస్య చాలా మందిలో కనిపిస్తుంది. ఇది శరీరంలోని అసమతుల్యతకు సంకేతమని, దీనిని ఏమాత్రం నిర్లక్ష్యం చేయరాదని వైద్యులు హెచ్చరిస్తున్నారు.

కారణాలు ఏమిటి?

వేసవిలో ఈ సమస్య రావడానికి ప్రధానంగా కొన్ని కారణాలు ఉన్నాయి..

పొడి గాలి: తీవ్రమైన ఎండ, పొడి గాలి వల్ల ముక్కులోని సున్నితమైన పొరలు పొడిబారి, లోపల ఉండే రక్తనాళాలు బలహీనపడి పగిలిపోతాయి.

డీహైడ్రేషన్ : శరీరంలో తగినంత నీటి శాతం లేకపోవడం వల్ల కూడా ఈ సమస్య తలెత్తుతుంది..

ఇతర కారణాలు: అలర్జీలు, తరచుగా ముక్కును తుడుచుకోవడం లేదా ఏదైనా చిన్నపాటి గాయం కావడం వల్ల కూడా రక్తస్రావం జరగవచ్చు.

ముందుగా కనిపించే లక్షణాలు:

రక్తం కారడానికి ముందు ముక్కు లోపల పొడిబారినట్లు అనిపించడం, వాపు లేదా దురద వంటివి సంభవిస్తాయి. కొంతమందిలో తలనొప్పి లేదా స్వల్పంగా కళ్లు తిరగడం వంటి లక్షణాలు కూడా కనిపిస్తాయి.

రక్తస్రావం జరిగినప్పుడు వెంటనే ఏం చేయాలి?

ముక్కు నుండి రక్తం కారుతున్నప్పుడు కంగారు పడకుండా ఈ క్రింది జాగ్రత్తలు పాటించాలి..

కూర్చునే విధానం: వెంటనే ఒక చోట కూర్చుని, తలను కొద్దిగా ముందుకు వంచాలి.

ఒత్తిడి ఇవ్వడం: ముక్కుపై మెల్లగా నొక్కి పట్టుకుని కొన్ని నిమిషాల పాటు అలాగే ఉంచాలి.

ముఖ్య గమనిక: తలను వెనక్కి అస్సలు వంచకూడదు. అలా చేయడం వల్ల రక్తం గొంతులోకి వెళ్లే ప్రమాదం ఉంది.

నివారణ మార్గాలు:

ఈ సమస్య దరిచేరకుండా ఉండాలంటే..

హైడ్రేషన్:

రోజంతా పుష్కలంగా నీరు త్రాగాలి. నిమ్మరసం, మజ్జిగ వంటి ద్రవ పదార్థాలను తీసుకోవడం ద్వారా శరీరాన్ని చల్లగా ఉంచుకోవాలి.

ఎండ నుండి రక్షణ: తీవ్రమైన ఎండలో బయట తిరగడం తగ్గించాలి. ఒకవేళ బయటకు వెళ్లాల్సి వస్తే తలకు టోపీ లేదా క్లాత్ కప్పుకోవాలి.

ఆహారం: పుచ్చకాయ వంటి నీటి శాతం అధికంగా ఉండే పండ్లను తీసుకోవాలి..