Ordinary Headache vs Brain Tumor: సాధారణ తలనొప్పి - బ్రెయిన్ ట్యూమర్‌కి తేడా ఏంటీ? ఎప్పుడు భయపడాలి?

Ordinary Headache vs Brain Tumor: ప్రస్తుత ఉరుకుల పరుగుల జీవనశైలిలో తలనొప్పి అనేది చాలా సాధారణ ఆరోగ్య సమస్యగా మారింది. కార్యాలయాల్లో పని ఒత్తిడి, నిద్రలేమి, సరైన ఆహారపు అలవాట్లు లేకపోవడంతో పాటు మొబైల్ ఫోన్లు, ల్యాప్‌టాప్‌లు అధికంగా వాడటం వల్ల చాలామంది తలనొప్పితో బాధపడుతున్నారు. అయితే తలనొప్పి రాగానే చాలామందిలో ఒక తెలియని భయం మొదలవుతుంది. ఎక్కడ తమకు బ్రెయిన్ ట్యూమర్ వచ్చిందోనని ఆందోళన చెందుతుంటారు. కానీ ప్రతి తలనొప్పీ బ్రెయిన్ ట్యూమర్ కాదని, అనవసరంగా భయాందోళనలకు గురికావద్దని న్యూరాలజిస్టులుస్పష్టం చేస్తున్నారు.

సాధారణ తలనొప్పికి.. బ్రెయిన్ ట్యూమర్‌కు తేడా ఏమిటి?

తలనొప్పి రావడమే పెద్ద సమస్య కాదు. దాని తీవ్రత, స్వభావం అకస్మాత్తుగా మారినప్పుడే అప్రమత్తం కావాలి. సీనియర్ న్యూరాలజిస్ట్ డాక్టర్ ప్రవీణ్ గుప్తా వివరించిన ప్రకారం.. తలనొప్పి గతంలో ఎన్నడూ లేని విధంగా భిన్నంగా అనిపించినా, నిరంతరం దాని తీవ్రత పెరుగుతూ పోతున్నా దాన్ని సాధారణ సమస్యగా భావించి నిర్లక్ష్యం చేయకూడదు. మెదడు కణితులతో వచ్చే తలనొప్పులు ఎప్పుడూ ఒంటరిగా రావు, శరీరంలో ఇతర నరాల సంబంధిత మార్పులు కూడా స్పష్టంగా కనిపిస్తాయి.

వెంటనే గమనించాల్సిన ప్రమాదకర సంకేతాలు

క్రింది లక్షణాలు తలనొప్పితో పాటు కనిపిస్తే ఏమాత్రం ఆలస్యం చేయకుండా వైద్యుడిని సంప్రదించాలి:

అకస్మాత్తు తీవ్రత: గతంలో ఎప్పుడూ లేని విధంగా అకస్మాత్తుగా భరించలేని తలనొప్పి రావడం.

నిరంతర పెరుగుదల: రోజురోజుకూ నొప్పి తీవ్రత పెరుగుతూ, వారాల తరబడి తగ్గకపోవడం.

నిద్రలో మెలకువ: తలనొప్పి భరించలేక అర్ధరాత్రి వేళల్లో నిద్ర నుంచి మెలకువ రావడం.

వాంతులు - వికారం: తలనొప్పితో పాటు తీవ్రమైన వాంతులు కావడం.

దృష్టి లోపాలు: కంటిచూపు మసకబారడం లేదా వస్తువులు రెండుగా కనిపించడం.

శరీర బలహీనత: కాళ్లు, చేతుల్లో బలహీనత లేదా మొద్దుబారినట్లు అనిపించడం.

సమతుల్యత కోల్పోవడం: నడుస్తున్నప్పుడు బ్యాలెన్స్ తప్పడం, కండరాల నియంత్రణ తగ్గడం.

మాటల్లో తడబాటు - మూర్ఛ: సరిగ్గా మాట్లాడలేకపోవడం, మూర్ఛ (ఫిట్స్) రావడం.

వైద్య పరీక్షలు ఎప్పుడు అవసరం?

వైద్యులు కేవలం తలనొప్పిని చూసి ఎలాంటి నిర్ణయానికి రారు. రోగి యొక్క పూర్తి ఆరోగ్య చరిత్ర, లక్షణాల వ్యవధి మరియు తీవ్రతను బట్టి నిర్ధారణకు వస్తారు. ఒక వ్యక్తికి అకస్మాత్తుగా తీవ్రమైన తలనొప్పి ప్రారంభమైనా లేదా నరాల సంబంధిత సమస్యలు తలెత్తినా MRI, CT స్కాన్ వంటి ఆధునిక వైద్య పరీక్షల ద్వారా మెదడు పనితీరును క్షుణ్ణంగా పరిశీలిస్తారు.

ఇంటర్నెట్‌లో సమాచారం చదివి సొంతంగా రోగ నిర్ధారణ చేసుకుని భయపడటం సరికాదు. మెదడు కణితులు చాలా అరుదుగా వచ్చే సమస్యలు. తలనొప్పులు పదేపదే వస్తున్నా లేదా వాటి తీరులో మార్పు కనిపించినా, ఆలస్యం చేయకుండా సంబంధిత న్యూరాలజిస్ట్‌ను సంప్రదించి పరీక్షలు చేయించుకోవడం ద్వారా అసలు కారణాన్ని గుర్తించి సరైన చికిత్స పొందవచ్చు.