Pain at the Back of Your Head: తల వెనుక భాగంలో నొప్పి వస్తోందా? అది సైలెంట్ కిల్లర్ సంకేతం కావచ్చు..

Pain at the Back of Your Head: తలనొప్పి అనగానే మనం సాధారణంగా నిద్రలేకపోవడమో లేదా పని ఒత్తిడి అనుకుంటాం. కానీ తల వెనుక భాగంలో వచ్చే నొప్పిని అంత తేలికగా తీసుకోవద్దని వైద్య నిపుణులు హెచ్చరిస్తున్నారు. ముఖ్యంగా ఎటువంటి పాత గాయాలు లేదా మైగ్రేన్ సమస్యలు లేకపోయినా ఈ నొప్పి వస్తుంటే, అది అధిక రక్తపోటు సంకేతం కావచ్చు.

బిపికి, తలనొప్పికి సంబంధం ఏంటి?

రక్తపోటులో స్వల్ప మార్పులు ఉన్నప్పుడు తలనొప్పి పెద్దగా అనిపించకపోవచ్చు. అయితే రక్తపోటు 180/120 mmHg మార్కును దాటినప్పుడు అది మెదడులోని రక్త నాళాలపై తీవ్రమైన ఒత్తిడిని కలిగిస్తుంది. దీనివల్ల తల వెనుక భాగంలో నొప్పి మొదలై, క్రమంగా తల అంతా భారంగా మారుతుంది.

రక్తపోటు 180/120 mmHg కంటే ఎక్కువ ఉంటే దానిని మెడికల్ ఎమర్జెన్సీగా భావించాలి. ఇటువంటి సమయంలో రోగిని ఆలస్యం చేయకుండా ఆసుపత్రికి తరలించడం ప్రాణాపాయం నుంచి కాపాడుతుంది.

లక్షణాలను ఎలా గుర్తించాలి?

అధిక రక్తపోటు వల్ల వచ్చే తలనొప్పి సాధారణ తలనొప్పి కంటే భిన్నంగా ఉంటుంది. ఈ లక్షణాలను గమనించండి:

నొప్పి ప్రధానంగా తల వెనుక భాగంలో మొదలై, భారంగా అనిపించడం.

దృష్టి లోపం: తలనొప్పితో పాటు కళ్లు మసకబారడం లేదా అస్పష్టంగా కనిపించడం.

ఇతర లక్షణాలు: తరచుగా తల తిరగడం, వాంతులు వచ్చినట్లు అనిపించడం.

ఎందుకు నిర్లక్ష్యం చేయకూడదు?

అధిక రక్తపోటును సైలెంట్ కిల్లర్ అని పిలుస్తారు. ఎందుకంటే దీని లక్షణాలు బయటకు స్పష్టంగా కనిపించవు. తల వెనుక వచ్చే నొప్పిని కేవలం అలసటగా భావించి విస్మరిస్తే, అది మెదడులోని రక్తనాళాలు చిట్లిపోయే ప్రమాదానికి దారితీయవచ్చు.

మీకు తరచుగా తల వెనుక భాగంలో నొప్పి వస్తుంటే, వెంటనే రక్తపోటును తనిఖీ చేయించుకోవడం ఉత్తమం. సరైన సమయంలో వైద్యుడిని సంప్రదించి.. అవసరమైన జాగ్రత్తలు తీసుకోవడం ద్వారా పెద్ద ప్రమాదాల నుండి తప్పించుకోవచ్చు.