Parkinson’s Rising Even Among Youth: యువతలోనూ పార్కిన్సన్స్ అలజడి.. ప్రారంభ లక్షణాలు విస్మరిస్తే అంతే సంగతులు..

Parkinson’s Rising Even Among Youth: పార్కిన్సన్స్ వ్యాధి సాధారణంగా వృద్ధులలో వచ్చే సమస్యగా పరిగణిస్తారు. కానీ ఇటీవల కాలంలో 20, 30, 40 ఏళ్ల యువతలో కూడా దీని ప్రారంభ సంకేతాలు కనిపించడం ఆందోళన కలిగిస్తోంది. నిపుణులు చెబుతున్న దాని ప్రకారం.. ప్రపంచంలోనే అత్యధిక సంఖ్యలో పార్కిన్సన్ రోగులు మన దేశంలోనే ఉన్నారు. ముఖ్యంగా, భారతదేశంలో 40 నుండి 45 శాతం మంది రోగులు కేవలం 22 నుండి 49 సంవత్సరాల మధ్య వయస్సులో లక్షణాలను చూపించడం ప్రారంభిస్తున్నారు.

ఈ ప్రారంభ సంకేతాలు తరచుగా ఒత్తిడి లేదా అలసట లక్షణాలను పోలి ఉండటం వలన చాలామంది వీటిని విస్మరిస్తున్నారు. కానీ ఈ లక్షణాలను ముందుగానే గుర్తించడం వల్ల రోగ నిర్ధారణ మరియు చికిత్సలో పెద్ద మార్పు తీసుకురావచ్చని నిపుణులు గట్టిగా నొక్కి చెబుతున్నారు.

యువతలో కనిపించే 4 కీలక ప్రారంభ లక్షణాలు

చేతిరాత పరిమాణంలో మార్పు:

చేతిరాత పరిమాణం అకస్మాత్తుగా, వివరించలేని విధంగా చిన్నదిగా మారడం ప్రధాన సంకేతం. ఇది చేతి కదలికలపై నియంత్రణ కోల్పోవడాన్ని సూచిస్తుంది.

కదలికలలో మార్పులు :

నడక నెమ్మదిగా మారడం, కండరాల బలహీనత లేదా నడుస్తున్నప్పుడు ఒక కాలును అసాధారణంగా లాగుతున్నట్లు అనిపించడం వంటివి గమనించవచ్చు.

స్వరంలో మార్పు (సాఫ్ట్ వాయిస్):

మాట్లాడేటప్పుడు స్వర తీవ్రత తగ్గడం, స్వరం మృదువుగా లేదా నెమ్మదిగా మారడం. ఇది ప్రసంగ కండరాలు ప్రభావితమవుతున్నాయని సూచిస్తుంది.

వణుకు (ట్రెమర్):

విశ్రాంతి తీసుకునే సమయంలో ముఖ్యంగా చేతిలో లేదా వేళ్లలో స్వల్ప వణుకు లేదా కదలిక కనిపించడం. ఇది చిన్నదిగా ఉన్నప్పటికీ దీనిపై శ్రద్ధ చూపడం చాలా ముఖ్యం.

పార్కిన్సన్స్ వంటి వ్యాధిని ముందుగానే గుర్తించడం వలన చికిత్స సకాలంలో ప్రారంభించడానికి, లక్షణాలను సమర్థవంతంగా నిర్వహించడానికి సహాయపడుతుంది. ఒత్తిడి లేదా అలసట కారణంగా అని భావించి ఈ లక్షణాలను తేలికగా తీసుకోకూడదని వైద్య నిపుణులు హెచ్చరిస్తున్నారు.