Planning Pregnancy After 35: 35 ఏళ్ల తర్వాత ప్రెగ్నెన్సీ ప్లాన్ చేస్తున్నారా? గైనకాలజిస్ట్ చెబుతున్న ఈ ముఖ్యమైన రూల్స్ తప్పక తెలుసుకోండి..

Planning Pregnancy After 35: మారుతున్న కాలంలో కెరీర్, సెటిల్‌మెంట్ కారణాల వల్ల చాలా మంది మహిళలు ఆలస్యంగా పెళ్లిళ్లు చేసుకోవడం, ముప్పై ఏళ్లు దాటిన తర్వాత పిల్లల గురించి ప్లాన్ చేసుకోవడం సాధారణంగా మారిపోయింది. అయితే, మెడికల్ సైన్స్ ప్రకారం 35 ఏళ్ల తర్వాత గర్భం దాల్చడాన్ని అడ్వాన్స్‌డ్ మెటర్నల్ ఏజ్ గా పరిగణిస్తారు. ఈ వయసులో ప్రెగ్నెన్సీ ప్లాన్ చేసుకునేటప్పుడు కొన్ని ఆరోగ్యపరమైన సవాళ్లు ఎదురయ్యే అవకాశం ఉన్నందున, గైనకాలజిస్టులు కొన్ని కీలకమైన జాగ్రత్తలను సూచిస్తున్నారు. ఆలస్యంగా తల్లి కావాలనుకునే వారు ఎలాంటి నియమాలు పాటించాలో ఇప్పుడు వివరంగా తెలుసుకుందాం..

ముందుగా ప్రీ-కన్సెప్షన్ చెకప్

35 ఏళ్లు దాటిన తర్వాత గర్భం దాల్చాలనుకునే వారు నేరుగా ప్రయత్నించే కంటే ముందుగా ఒక మంచి గైనకాలజిస్ట్‌ను సంప్రదించి ప్రీ-కన్సెప్షన్ స్క్రీనింగ్ చేయించుకోవడం చాలా ముఖ్యం.

ఈ వయసులో థైరాయిడ్, మధుమేహం , రక్తపోటుశరీరంలో హార్మోన్ల సమతుల్యత ఎలా ఉందో పరీక్షల ద్వారా తెలుసుకోవాలి. ఏవైనా సమస్యలు ఉంటే ముందే చికిత్స తీసుకోవడం వల్ల గర్భధారణ సమయంలో కాంప్లికేషన్స్ రాకుండా ఉంటాయి.

ఫోలిక్ యాసిడ్ సప్లిమెంట్స్ ప్రారంభించడం

వైద్యుల సలహాతో గర్భం దాల్చడానికి కనీసం ఒకట్రెండు నెలల ముందు నుండే ఫోలిక్ యాసిడ్ సప్లిమెంట్లను తీసుకోవడం ప్రారంభించాలి. ఇది పుట్టబోయే బిడ్డలో ఎలాంటి నరాల లోపాలు లేదా జన్యుపరమైన లోపాలు తలెత్తకుండా రక్షిస్తుంది.

ఆరోగ్యకరమైన బరువు, జీవనశైలి

వయసు పెరిగే కొద్దీ మెటబాలిజం నెమ్మదిస్తుంది. అందుకే ప్రెగ్నెన్సీ ప్లాన్ చేసే ముందే మహిళలు తమ ఎత్తుకు తగ్గ బరువు ఉండేలా చూసుకోవాలి.

డైట్: మీ రోజువారీ ఆహారంలో ఆకుకూరలు, డ్రై ఫ్రూట్స్, తాజా పండ్లు, మరియు తృణధాన్యాలు ఉండేలా చూసుకోవాలి. జంక్ ఫుడ్స్, ప్రాసెస్డ్ ఫుడ్స్‌కు పూర్తిగా దూరంగా ఉండాలి.

వ్యాయామం:

ప్రతిరోజూ కనీసం 30 నిమిషాల పాటు వాకింగ్ లేదా తేలికపాటి యోగా చేయడం వల్ల శారీరక దృఢత్వం పెరుగుతుంది.

35 ఏళ్ల తర్వాత గర్భధారణలో అస్సలు చేయకూడని పనులు

సొంత వైద్యం వద్దు:

వైద్యుల ప్రిస్క్రిప్షన్ లేకుండా ఎలాంటి పెయిన్ కిల్లర్స్ లేదా ఇతర ఇంగ్లీష్ మందులను వాడకూడదు. ఇది గర్భధారణ అవకాశాలపై ప్రభావం చూపుతుంది.

ఒత్తిడికి దూరంగా ఉండాలి:

వయసు పెరిగింది కదా పిల్లలు పుడతారో లేదో అనే అనవసరమైన ఆందోళన, ఒత్తిడికి లోనవ్వకూడదు. మానసిక ఒత్తిడి వల్ల హార్మోన్ల అసమతుల్యత ఏర్పడి ప్రెగ్నెన్సీ ఆలస్యమవుతుంది.

కెఫిన్ మోతాదు తగ్గించాలి:

కాఫీ, టీలు ఎక్కువగా తాగే అలవాటు ఉంటే దానిని తగ్గించుకోవాలి. అధిక కెఫిన్ శాతం గర్భస్రావం అయ్యే ప్రమాదాన్ని పెంచుతుంది.

ముఖ్య ముఖ్యాంశాలు..

35 ఏళ్ల తర్వాత ప్రెగ్నెన్సీ ప్లాన్ చేసే ముందు బీపీ, షుగర్, థైరాయిడ్ టెస్టులు తప్పనిసరి.

పుట్టబోయే బిడ్డ ఆరోగ్యంగా ఉండటానికి ముందే ఫోలిక్ యాసిడ్ వాడటం మంచిది.

అధిక బరువు, మానసిక ఒత్తిడి, కెఫిన్ వినియోగానికి దూరంగా ఉండాలి.