Rising Thalassemia Cases: పెరుగుతున్న థలసేమియా కేసులు.. పెళ్లికి ముందు ఆ పరీక్ష తప్పనిసరి..

Rising Thalassemia Cases: దేశంలో ఇటీవల కాలంలో థలసేమియా బాధితుల సంఖ్య పెరగడం ఆందోళన కలిగిస్తోంది. ఇది ఒక ప్రమాదకరమైన వంశపారంపర్య రక్త వ్యాధి. సరైన అవగాహన లేకపోవడం వల్ల ఈ వ్యాధి ఒక తరం నుండి మరో తరానికి వేగంగా వ్యాపిస్తోంది. ఈ నేపథ్యంలో దంపతులు పెళ్లికి ముందే రక్త పరీక్షలు చేయించుకోవడం ఎంత ముఖ్యమో వైద్య నిపుణులు స్పష్టం చేస్తున్నారు.

అసలు థలసేమియా అంటే ఏమిటి?

థలసేమియా ఉన్న వారి శరీరంలో హిమోగ్లోబిన్ ఉత్పత్తి తగినంతగా జరగదు. హిమోగ్లోబిన్ తగ్గడం వల్ల శరీర అవయవాలకు ఆక్సిజన్ సరఫరా తగ్గి అనేక ఆరోగ్య సమస్యలు తలెత్తుతాయి. ఇది పూర్తిగా జన్యుపరమైన వ్యాధి. తల్లిదండ్రులు ఇద్దరికీ ఈ వ్యాధి లక్షణాలు ఉంటే, పుట్టబోయే బిడ్డకు తీవ్రమైన థలసేమియా వచ్చే అవకాశం 25% నుండి 50% వరకు ఉంటుంది.

పిల్లల్లో కనిపించే ప్రధాన లక్షణాలు

థలసేమియాతో బాధపడే పిల్లల్లో పుట్టిన కొద్ది నెలల నుండే లక్షణాలు కనిపిస్తాయి..

రక్తహీనత: పాలిపోయిన చర్మం, తీవ్రమైన బలహీనత, అలసట.

పెరుగుదల లోపం: వయస్సుకి తగ్గ ఎత్తు, బరువు పెరగకపోవడం.

శ్వాస సమస్యలు: ఆక్సిజన్ అందక శ్వాస తీసుకోవడంలో ఇబ్బంది పడటం.

ఎముకల ఆకృతి: ముఖంలోని ఎముకల ఆకారంలో అసాధారణ మార్పులు రావడం.

చికిత్స, సవాళ్లు:

తీవ్రమైన థలసేమియా ఉన్న రోగులకు జీవితాంతం క్రమం తప్పకుండా రక్త మార్పిడి చేయాల్సి ఉంటుంది.

ఎముక మజ్జ మార్పిడి దీని ద్వారా కొన్ని కేసుల్లో శాశ్వత నివారణ సాధ్యమవుతుంది, కానీ ఇది ఖరీదైన, క్లిష్టమైన ప్రక్రియ.

అవయవాలపై ప్రభావం: సరైన చికిత్స అందకపోతే గుండె, కాలేయం, ప్లీహం దెబ్బతినే ప్రమాదం ఉంది.

నివారణే మార్గం - నిపుణుల సూచనలు:

ప్రీ-మ్యారేజ్ స్క్రీనింగ్: పెళ్లికి ముందే దంపతులు థలసేమియా పరీక్ష చేయించుకుంటే, పుట్టబోయే పిల్లలకు ఈ వ్యాధి రాకుండా అడ్డుకోవచ్చు.

ఐరన్ పర్యవేక్షణ: రక్త మార్పిడి వల్ల శరీరంలో ఐరన్ స్థాయిలు పెరిగే అవకాశం ఉంటుంది, దీనిని నిరంతరం పర్యవేక్షించాలి.

సమతుల్య ఆహారం: వైద్యుల సూచన మేరకు పోషక విలువలున్న ఆహారం తీసుకోవాలి.

థలసేమియా రహిత సమాజం కోసం ప్రతి ఒక్కరూ బాధ్యతగా వ్యవహరించాలి. చిన్న వయస్సులోనే లక్షణాలను గుర్తించి చికిత్స అందించడం ద్వారా రోగుల జీవిత కాలాన్ని పెంచవచ్చని వైద్యులు సూచిస్తున్నారు.