Sitting at a Desk All Day: రోజంతా డెస్క్ జాబేనా? మోకాళ్ల నొప్పులు ఎందుకు వస్తాయో తెలుసుకోండి..

Sitting at a Desk All Day: నేటి డిజిటల్ యుగంలో ఎక్కువ మంది రోజూ 8 నుంచి 10 గంటల పాటు ల్యాప్‌టాప్‌లు, కంప్యూటర్ల ముందు కూర్చొనే పనిచేస్తున్నారు. టార్గెట్లు, డెడ్‌లైన్ల ఒత్తిడిలో పడి గంటల తరబడి ఒకే భంగిమలో కూర్చుండిపోతున్నారు. అయితే ఇది కండరాలు, కీళ్లపై తీవ్రమైన భారం మోపుతుందని ఆరోగ్య నిపుణులు హెచ్చరిస్తున్నారు. తగినంత శారీరక శ్రమ లేకపోవడం, కూర్చునే భంగిమ సరిగ్గా లేకపోవడం వల్ల మోకాళ్లు, నడుము, మెడ నొప్పులు క్రమంగా తీవ్ర సమస్యలుగా మారుతున్నాయి.

మోకాళ్లు, వెన్నునొప్పికి ప్రధాన కారణాలు

ఒకే భంగిమలో నిరంతరం కూర్చోవడం:

గంటల తరబడి కదలకుండా కూర్చోవడం వల్ల మోకాళ్ల కీళ్లలోని మృదులాస్థి (కార్టిలేజ్)పై అధిక ఒత్తిడి పడి అది దెబ్బతినే అవకాశం ఉంది.

తప్పుదోవ పట్టించే లక్షణాలు:

కార్టిలేజ్ మృదువుగా మారడం వల్ల వచ్చే నొప్పిని చాలామంది మెనిస్కస్ చిరిగిపోయిందని భావించి భయపడుతుంటారు. దీనివల్ల అనవసరమైన ఎంఆర్‌ఐ స్కాన్లు, ఆపరేషన్ల వరకు వెళ్లే పరిస్థితులు ఎదురవుతున్నాయి. సరైన సమయంలో జీవనశైలి మార్చుకుంటే వీటికి శస్త్రచికిత్స అవసరం ఉండదు.

నరాలపై ఒత్తిడి:

సరిగ్గా కూర్చోకపోవడం వల్ల వెన్నెముక దిగువ భాగంలోని నరాలు నొక్కుకుపోయి నడుము నొప్పి తీవ్రమవుతుంది. అలాగే కండరాల బిగుతు వల్ల మెడ నొప్పులు వస్తాయి.

భవిష్యత్ ముప్పు:

రాబోయే దశాబ్ద కాలంలో ఆర్థరైటిస్, కీళ్ల సమస్యలు రెండింతలు పెరిగే అవకాశం ఉందని, దాదాపు 50 శాతానికి పైగా జనాభా ఏదో ఒక కీళ్ల సమస్యతో బాధపడే ప్రమాదం ఉందని నిపుణులు అంచనా వేస్తున్నారు.

ప్రమాద ఘంటికలు.. ఎప్పుడు అప్రమత్తం కావాలి?

ఈ క్రింది లక్షణాలు కనిపిస్తే వెంటనే సాధారణ నొప్పిగా భావించకుండా వైద్యులను సంప్రదించాలి.

మోకాలిలో నిరంతర నొప్పి లేదా వాపు రావడం

నడుస్తున్నప్పుడు మోకాలు లాక్ అయినట్లు లేదా పట్టేసినట్లు అనిపించడం

కాలుపై శరీర బరువును మోపలేకపోవడం, బ్యాలెన్స్ తప్పడం

విశ్రాంతి తీసుకున్నా నడుము నొప్పి తగ్గకుండా దీర్ఘకాలం వేధించడం

నివారణ మార్గాలు - నిపుణులు సూచిస్తున్న జాగ్రత్తలు

రెగ్యులర్ బ్రేక్స్:

ప్రతి 45 నిమిషాల నుంచి గంటకొకసారి సీటులో నుంచి లేచి కాసేపు అటూ ఇటూ నడవాలి.

సరైన భంగిమ: కుర్చీ, కంప్యూటర్ స్క్రీన్‌ను కంటి చూపునకు, వీపుకు అనుకూలమైన సరైన ఎత్తులో అడ్జస్ట్ చేసుకోవాలి. వీపు నిటారుగా ఉండేలా చూసుకోవాలి.

స్ట్రెచింగ్ - ఎక్సర్‌సైజ్:

వెన్ను, తొడలు, మోకాలి కండరాలను బలోపేతం చేసే తేలికపాటి వ్యాయామాలు చేయాలి. పని మధ్యలో శరీరాన్ని స్ట్రెచ్ చేయడం అలవాటు చేసుకోవాలి.

హైట్ అడ్జస్టబుల్ డెస్క్‌లు:

వీలైతే కూర్చుని, నిలబడి పనిచేయడానికి వీలుగా ఉండే 'స్టాండింగ్ డెస్క్‌ల'ను వాడటం మంచిది.

ఎంత పని ఒత్తిడి ఉన్నప్పటికీ మన శరీర కదలికలకు ప్రాధాన్యత ఇవ్వడం ఎంతో ముఖ్యం. సరైన భంగిమ, చిన్న చిన్న విరామాలు, రోజువారీ స్ట్రెచింగ్ అలవాటు చేసుకుంటే శస్త్రచికిత్సలు, ఖరీదైన చికిత్సలు అవసరం లేకుండానే కీళ్ల ఆరోగ్యాన్ని కాపాడుకోవచ్చు.