Stroke Risk Rises in Winter: చలికాలంలో స్ట్రోక్ ప్రమాదం.. ఈ జాగ్రత్తలు తప్పనిసరి..

Stroke Risk Rises in Winter: వాతావరణం మారుతోంది. వర్షాలు తగ్గి చలి మొదలైంది. ఈ చల్లని వాతావరణం మన ఆరోగ్యంపై, ముఖ్యంగా గుండె, మెదడుపై తీవ్ర ప్రభావం చూపుతుందని వైద్య నిపుణులు హెచ్చరిస్తున్నారు. చలికాలంలో స్ట్రోక్ వచ్చే ప్రమాదం గణనీయంగా పెరుగుతుందని అనేక అధ్యయనాలు చెబుతున్నాయి. సాధారణంగా ఉష్ణోగ్రత 13 డిగ్రీల సెల్సియస్ కంటే తక్కువగా పడిపోయినప్పుడు స్ట్రోక్ కేసులు పెరుగుతాయి. చలి వాతావరణం మన రక్త ప్రసరణ వ్యవస్థను ప్రభావితం చేయడం దీనికి ప్రధాన కారణం.

చలికాలంలో స్ట్రోక్ ఎందుకు పెరుగుతుంది?

రక్తనాళాలు కుంచించుకుపోతాయి:

చలిగా ఉన్నప్పుడు మన శరీరం వేడిని కాపాడుకోవడానికి ప్రయత్నిస్తుంది. దీనివల్ల రక్త నాళాలు చిన్నగా కుంచించుకుపోతాయి. దీని ఫలితంగా రక్తపోటు పెరుగుతుంది. ఇది స్ట్రోక్‌కు ప్రధాన ప్రమాద కారకం.

రక్తం చిక్కబడుతుంది:

లికాలంలో రక్తం కొద్దిగా చిక్కగా మారుతుంది. దీనివల్ల రక్తం గడ్డకట్టే ప్రమాదం పెరుగుతుంది. ఈ గడ్డలు మెదడుకు రక్త ప్రవాహాన్ని అడ్డుకుంటే, *ఇస్కీమిక్ స్ట్రోక్* వస్తుంది.

శారీరక శ్రమ తగ్గుతుంది

చలి కారణంగా ప్రజలు వ్యాయామం, నడక తగ్గించి, ఇంట్లోనే ఉంటారు. శారీరక శ్రమ లేకపోవడం వల్ల బరువు పెరగడం, అధిక కొలెస్ట్రాల్, రక్తపోటు పెరుగుతాయి. ఇవన్నీ స్ట్రోక్ ప్రమాదాన్ని పెంచుతాయి.

డీహైడ్రేషన్

చలిలో దాహం తక్కువగా అనిపించడం వల్ల చాలా మంది నీరు తక్కువగా తాగుతారు. దీనివల్ల డీహైడ్రేషన్ కు గురై రక్తం మరింత గడ్డకట్టడానికి దారితీస్తుంది.

చలిలో అధిక శ్రమ:

చలిలో ఉన్నప్పుడు బరువులు ఎత్తడం లేదా మరీ కఠినమైన పనులు చేయడం వల్ల హృదయ స్పందన రేటు, రక్తపోటు పెరుగుతాయి. ఇది స్ట్రోక్ ప్రమాదాన్ని పెంచుతుంది.

సీజనల్ ఇన్‌ఫెక్షన్లు:

శీతాకాలంలో వచ్చే ఫ్లూ, శ్వాసకోశ ఇన్‌ఫెక్షన్ల వల్ల శరీరంలో వాపు పెరుగుతుంది. ఈ వాపు రక్త నాళాలను దెబ్బతీసి, రక్తపోటును మరింత పెంచుతుంది.

స్ట్రోక్ ప్రమాదం తగ్గించుకోవడానికి ఏం చేయాలి?

చలికాలంలో స్ట్రోక్ రాకుండా ఉండటానికి ఈ క్రింది జాగ్రత్తలు తీసుకోవాలని డాక్టర్లు సూచిస్తున్నారు:

వెచ్చగా ఉండండి: మందపాటి దుస్తులు ధరించి, గది ఉష్ణోగ్రతను స్థిరంగా ఉంచుకోండి.

చురుకుగా ఉండండి: ఇంట్లోనే తేలికపాటి వ్యాయామాలు చేయండి. అతిగా శ్రమ పడకండి.

నీరు ఎక్కువగా తాగండి: దాహం లేకపోయినా, పుష్కలంగా నీరు త్రాగడం మర్చిపోవద్దు.

వ్యాధులు నియంత్రించండి: రక్తపోటు, షుగర్ (మధుమేహం), కొలెస్ట్రాల్‌లను అదుపులో ఉంచుకోండి.

మానండి: ధూమపానం, మద్యం సేవించడం పూర్తిగా మానుకోండి.

ఫ్లూ వ్యాక్సిన్: శ్వాసకోశ ఇన్‌ఫెక్షన్లు రాకుండా ఫ్లూ టీకా తీసుకోవడం మంచిది.

ముఖ్య గమనిక: చల్లని వాతావరణంలో మీకు సమతుల్యత కోల్పోవడం, ముఖం ఒక పక్కకు వాలిపోవడం, చేయి లేదా కాలులో తిమ్మిరి లేదా మాటలు అస్పష్టంగా ఉంటే, అది స్ట్రోక్ లక్షణం కావచ్చు. వెంటనే దగ్గరలోని ఆసుపత్రికి వెళ్లండి.