Sudden Spike in Blood Pressure: అకస్మాత్తుగా బీపీ పెరిగిందా? తక్షణమే అదుపులోకి తెచ్చే 5 సింపుల్ టిప్స్..
5 సింపుల్ టిప్స్..
Sudden Spike in Blood Pressure: చిన్న వాదనలు, అకస్మాత్తుగా వచ్చే కోపం లేదా తీవ్ర ఆందోళన వల్ల శరీరంలో అడ్రినలిన్ హార్మోన్ ఒక్కసారిగా విడుదలవుతుంది. దీనివల్ల గుండె వేగంగా కొట్టుకుని రక్తపోటు అకస్మాత్తుగా పెరుగుతుంది. ఇలాంటి సమయాల్లో కంగారు పడకుండా ఇంట్లోనే పాటించాల్సిన కొన్ని సులభమైన ప్రథమ చికిత్స పద్ధతుల ద్వారా బీపీని తక్షణమే అదుపులోకి తీసుకురావచ్చు.
4-7-8 శ్వాస పద్ధతి
కోపం లేదా ఆందోళనలో ఉన్నప్పుడు శ్వాస వేగవంతమై బీపీ మరింత పెరుగుతుంది. ముక్కు ద్వారా 4 సెకన్ల పాటు నెమ్మదిగా శ్వాసను లోపలికి పీల్చుకోవాలి.7 సెకన్ల పాటు శ్వాసను లోపలే బిగపట్టాలి. ఆ తర్వాత నోటి ద్వారా 8 సెకన్ల పాటు శ్వాసను నెమ్మదిగా బయటకు వదలాలి. ఈ ప్రక్రియను 4-5 సార్లు పునరావృతం చేస్తే నాడీ వ్యవస్థ శాంతించి, హృదయ స్పందన స్థిరపడి బీపీ తగ్గుముఖం పడుతుంది.
ఒక గ్లాసు చల్లటి నీరు తాగడం
ఒకచోట ప్రశాంతంగా కూర్చుని నెమ్మదిగా ఒక గ్లాసు చల్లటి నీరు తాగాలి. ఇది శరీర ఉష్ణోగ్రతను తగ్గించి, నరాలను శాంతపరుస్తుంది. దీంతో గుండె వేగం తగ్గి రక్తపోటు నియంత్రణలోకి వస్తుంది.
నిశ్శబ్దమైన, చీకటి గదిలోకి వెళ్లడం
చుట్టూ ఎక్కువ శబ్దం, వెలుతురు లేదా జనం ఉంటే ఒత్తిడి మరింత పెరుగుతుంది. వెంటనే ప్రశాంతమైన, నిశ్శబ్ద గదిలోకి వెళ్లి లైట్లు ఆపివేయాలి. కళ్లు మూసుకుని కాసేపు విశ్రాంతి తీసుకోవడం వల్ల మెదడుపై ఒత్తిడి తగ్గుతుంది.
ముఖంపై చల్లటి నీళ్లు చల్లుకోవడం
ముఖాన్ని చల్లటి నీటితో కడుక్కోవడం లేదా నుదురు, మెడ వెనుక భాగంలో చల్లటి తడి గుడ్డను ఉంచడం చేయాలి. ఇది శరీరంలోని వేగస్ నాడిని ఉత్తేజపరిచి, గుండె వేగాన్ని, బీపీని వెంటనే తగ్గించడంలో శాస్త్రీయంగా సహాయపడుతుంది.
కాళ్లు కిందకు వేలాడదీసి కూర్చోవడం
మంచం లేదా కుర్చీపై నిటారుగా కూర్చొని, కాళ్లను కిందకు వేలాడదీయాలి. శరీరం వంగకుండా నిటారుగా ఉంచడం వల్ల శరీరంలో రక్త ప్రసరణ క్రమబద్ధీకరించబడుతుంది.
ఎప్పుడు వెంటనే ఆసుపత్రికి వెళ్లాలి?
ఇవన్నీ కేవలం తాత్కాలిక ప్రథమ చికిత్స చర్యలు మాత్రమే. ఒకవేళ రక్తపోటు పెరిగినప్పుడు క్రింది ప్రమాదకర లక్షణాలు కనిపిస్తే ఆలస్యం చేయకుండా వెంటనే అత్యవసర వైద్య సహాయం పొందాలి..
ఛాతీలో తీవ్రమైన నొప్పి లేదా విపరీతమైన బరువుగా అనిపించడం.
తలతిరగడం, తీవ్రమైన తలనొప్పి లేదా వాంతులు కావడం.
శ్వాస తీసుకోవడంలో తీవ్ర ఇబ్బంది రావడం.
చూపు మసకబారడం లేదా మాట తడబడటం.
