Swine Flu: దేశంలో పెరుగుతున్న స్వైన్ ఫ్లూ..కేంద్ర ఆరోగ్య శాఖ ఉన్నత స్థాయి సమీక్ష

Swine Flu: దేశ రాజధాని ఢిల్లీతో పాటు పలు ప్రాంతాల్లో హెచ్1ఎన్1 కేసులు పెరుగుతుండటంతో కేంద్ర ప్రభుత్వం అప్రమత్తమైంది. పరిస్థితిని సమీక్షించేందుకు కేంద్ర ఆరోగ్య శాఖ మంత్రి జేపీ నడ్డా ఉన్నతాధికారులతో అత్యవసర సమావేశం నిర్వహించారు. ఆసుపత్రుల సన్నద్ధత, రోగ నిర్ధారణ పరీక్షలు, అవసరమైన, మందులు, చికిత్సా సదుపాయాలపై అధికారులకు కీలక ఆదేశాలు జారీ చేశారు.

ఏమిటీ స్వైన్ ఫ్లూ? ఎలా వ్యాపిస్తుంది?

స్వైన్ ఫ్లూ అనేది ఇన్‌ఫ్లుయెంజా-A వైరస్ వల్ల శ్వాసకోశ వ్యవస్థపై ప్రభావం చూపే తీవ్రమైన ఇన్ఫెక్షన్. వ్యాధి సోకిన వ్యక్తి దగ్గినప్పుడు, తుమ్మినప్పుడు లేదా మాట్లాడినప్పుడు గాలిలోకి వచ్చే తుంపర్ల ద్వారా ఇది ఇతరులకు సోకుతుంది. వైరస్ ఉన్న ఉపరితలాలను తాకి ముఖాన్ని ముట్టుకున్నా ఇది వ్యాపిస్తుంది.

ముఖ్య గమనిక: లక్షణాలు బయటపడటానికి ఒక రోజు ముందు నుంచే ఈ వైరస్ ఇతరులకు వ్యాపించే ప్రమాదం ఉంది. పంది మాంసం తినడం వల్ల ఈ వ్యాధి రాదు.

ప్రధాన లక్షణాలు

తీవ్రమైన జ్వరం, దగ్గు, గొంతు నొప్పి

ముక్కు కారడం లేదా ముక్కు దిబ్బడ

ఒళ్ళు నొప్పులు, తీవ్రమైన తలనొప్పి, నీరసం

తీసుకోవాల్సిన జాగ్రత్తలు

చేతుల పరిశుభ్రత: సబ్బుతో కనీసం 20 సెకన్ల పాటు చేతులను తరచుగా శుభ్రం చేసుకోవాలి.

మాస్క్ - దూరం: దగ్గు లేదా తుమ్ము వచ్చినప్పుడు టిష్యూ లేదా మోచేతిని అడ్డుపెట్టుకోవాలి. అనారోగ్య లక్షణాలు ఉన్నవారికి దూరంగా ఉండాలి.

వ్యాక్సినేషన్: వైద్యుల సలహాతో వార్షిక ఫ్లూ వ్యాక్సిన్ తీసుకోవడం ద్వారా రక్షణ పొందవచ్చు.

ఐసోలేషన్: లక్షణాలు కనిపిస్తే ఇంట్లోనే ఉంటూ విశ్రాంతి తీసుకోవడం మంచిది.

వైద్యుడిని ఎప్పుడు సంప్రదించాలి?

కింది తీవ్రమైన లక్షణాలు కనిపిస్తే ఆలస్యం చేయకుండా వెంటనే ఆసుపత్రికి వెళ్లాలి:

శ్వాస తీసుకోవడంలో తీవ్ర ఇబ్బంది లేదా ఛాతీ నొప్పి

నిరంతర తలతిరగడం, తీవ్రమైన డీహైడ్రేషన్

గర్భిణులు, పిల్లలు, వృద్ధులు, ఆస్తమా, మధుమేహం, గుండె జబ్బులు ఉన్న దీర్ఘకాలిక రోగుల్లో లక్షణాలు కనిపిస్తే వెంటనే వైద్య సహాయం తీసుకోవాలి