Waking Up With a Start to the Alarm: అలారంతో ఉలిక్కిపడి లేస్తున్నారా? గుండెకు తీవ్ర ముప్పు అంటున్న పరిశోధకులు..

Waking Up With a Start to the Alarm: ఉదయాన్నే ఆఫీసుకు వెళ్లాలన్నా, పనులకు ఆలస్యం కాకూడదన్నా చాలామంది స్మార్ట్‌ఫోన్‌లో పెద్ద శబ్దంతో అలారం సెట్ చేసుకుంటారు. ఆ శబ్దానికి గాఢ నిద్రలోంచి ఒక్కసారిగా ఉలిక్కిపడి మేల్కొంటారు. సమయానికి లేవడానికి ఇది సహాయపడుతుందని అనుకుంటారు కానీ, ఈ అలవాటు గుండె ఆరోగ్యానికి, మానసిక స్థితికి తీవ్ర నష్టం కలిగిస్తుందని తాజా వైద్య పరిశోధనలు హెచ్చరిస్తున్నాయి.

స్లీప్ ఇనర్షియా అంటే ఏమిటి?

గాఢ నిద్రలో ఉన్నప్పుడు శరీరం, నాడీ వ్యవస్థ అత్యంత ప్రశాంతమైన స్థితిలో ఉంటాయి. అకస్మాత్తుగా తీవ్రమైన, కర్ణకఠోరమైన శబ్దం వినపడగానే శరీరం 'షాక్' లేదా అప్రమత్తమైన స్థితికి చేరుకుంటుంది. నిద్ర నుండి పూర్తి స్పృహలోకి వచ్చే ఆ పరివర్తన సమయాన్ని స్లీప్ ఇనర్షియా అంటారు. అలారం ఒక్కసారిగా గట్టిగా మోగినప్పుడు ఈ స్లీప్ ఇనర్షియా ప్రభావం తీవ్రమై, తల తిరగడం, అలసట, మగత మరియు రోజంతా తలనొప్పి వంటి లక్షణాలు కనిపిస్తాయి.

గుండె ఆరోగ్యంపై తీవ్ర ప్రభావం

అధ్యయనాల ప్రకారం, తీవ్రమైన అలారం శబ్దంతో ఉలిక్కిపడి లేచినప్పుడు శరీరంలో రక్తపోటు, హృదయ స్పందనల వేగం అకస్మాత్తుగా పెరుగుతాయి.

కార్టిసాల్, అడ్రినలిన్ పెరుగుదల

శరీరంలో ఒత్తిడిని పెంచే స్ట్రెస్ హార్మోన్లు ఒక్కసారిగా విడుదలవుతాయి.

రక్తనాళాలపై ఒత్తిడి: రక్తనాళాలు వేగంగా సంకోచించి, గుండెపై విపరీతమైన భారం పడుతుంది.

దీర్ఘకాలిక సమస్యలు:

రోజూ ఇదే విధంగా ఉలిక్కిపడి మేల్కొనే వారిలో అధిక రక్తపోటు, క్రమం తప్పిన గుండె కొట్టుకోవడం దీర్ఘకాలంలో గుండెపోటు వచ్చే ప్రమాదం కూడా పెరుగుతుందని నిపుణులు చెబుతున్నారు.

నిపుణులు సూచిస్తున్న మార్పులు:

మృదువైన లేదా మెలోడీ రింగ్‌టోన్లు:

తీవ్రమైన, కఠినమైన బీప్‌లకు బదులుగా సంగీతం, ప్రకృతి శబ్దాలు లేదా క్రమంగా శబ్దం పెరిగే టోన్‌లను ఎంచుకోవాలి.

సూర్యకాంతి సహజ అలారం:

కిటికీ కర్టెన్లు తెరిచి ఉంచడం వల్ల ఉదయాన్నే గదిలోకి వచ్చే సహజ కాంతి శరీరంలోని మెలటోనిన్ స్థాయిలను తగ్గించి, శరీరం వాటంతట అదే సాఫీగా మేల్కొనేలా చేస్తుంది.

క్రమబద్ధమైన నిద్ర వేళలు:

ప్రతిరోజూ రాత్రి ఒకే సమయానికి పడుకుని, ఉదయం ఒకే సమయానికి లేవడం అలవాటు చేసుకుంటే శరీరం బయోలాజికల్ క్లాక్ సెట్ అయి అలారం అవసరం లేకుండానే మెలకువ వస్తుంది.

స్నూజ్ బటన్ నొక్కడం ఆపండి:

అలారం పదేపదే స్నూజ్ చేసి మళ్లీ మళ్లీ అరకొర నిద్రలోకి వెళ్లడం శరీరానికి మరింత అలసటను కలిగిస్తుంది.

నిద్ర లేవడమనేది శరీరానికి ఒక సహజ ప్రక్రియగా ఉండాలి తప్ప, గుండెను ఉలిక్కిపడేలా చేసే భయాందోళన కాకూడదని వైద్యులు స్పష్టం చేస్తున్నారు.