Quit Smoking: సిగరెట్ మానేస్తే.. శరీరంలో మార్పులు ఇలా

Quit Smoking: సిగరెట్ తాగడం ఆరోగ్యానికి హానికరమని తెలిసినా చాలామంది ఆ అలవాటును మానుకోలేకపోతున్నారు. పొగతాగడం వల్ల గుండె, ఊపిరితిత్తులు సహా శరీరంలోని చాలా భాగాలపై ప్రభావం పడుతుంది. క్యాన్సర్, గుండె జబ్బులు, స్ట్రోక్, ఊపిరితిత్తుల సమస్యలు వచ్చే ప్రమాదం పెరుగుతుంది.

అయితే సిగరెట్ మానేసిన తర్వాత శరీరంలో మంచి మార్పులు మొదలవుతాయని ప్రపంచ ఆరోగ్య సంస్థ చెబుతోంది. సిగరెట్ మానేసిన 20 నిమిషాల్లోనే గుండె వేగం, బీపీ తగ్గడం మొదలవుతుంది. 12 గంటల్లో రక్తంలోని కార్బన్ మోనాక్సైడ్ స్థాయి సాధారణ స్థాయికి చేరుతుంది.

రెండు నుంచి 12 వారాల్లో రక్త ప్రసరణ మెరుగుపడుతుంది. ఊపిరితిత్తుల పనితీరు కూడా పెరుగుతుంది. ఒకటి నుంచి తొమ్మిది నెలల్లో దగ్గు, ఊపిరి తీసుకోవడంలో ఇబ్బంది తగ్గే అవకాశం ఉంటుంది.

సిగరెట్ మానేసి ఏడాది పూర్తయిన తర్వాత గుండెకు సంబంధించిన కొన్ని సమస్యలు వచ్చే ప్రమాదం సిగరెట్ తాగే వారితో పోలిస్తే దాదాపు సగానికి తగ్గుతుంది. ఐదు నుంచి 15 ఏళ్లలో స్ట్రోక్ వచ్చే ప్రమాదం కూడా తగ్గుతూ ఉంటుంది.

పదేళ్ల తర్వాత ఊపిరితిత్తుల క్యాన్సర్ వచ్చే ప్రమాదం సిగరెట్ తాగే వారితో పోలిస్తే దాదాపు సగానికి తగ్గుతుంది. 15 ఏళ్ల తర్వాత గుండె జబ్బుల ముప్పు సిగరెట్ తాగని వ్యక్తి స్థాయికి చేరుతుంది.

సిగరెట్ మానేయడం కష్టంగా అనిపిస్తే వైద్యుల సహాయం తీసుకోవచ్చు. కౌన్సెలింగ్, అవసరమైన చికిత్సతో సిగరెట్ మానేసే అవకాశం మరింత పెరుగుతుందని WHO చెబుతోంది.