Aluminium vs Steel Pressure Cooker: అల్యూమినియం VS స్టీల్ ప్రెషర్ కుక్కర్.. ఆరోగ్యం , వంట విషయాల్లో ఏది బెస్ట్?

Aluminium vs Steel Pressure Cooker: భారతీయ వంటగదిలో ప్రెషర్ కుక్కర్ లేని ఇల్లు ఉండదు. పొద్దున్నే ఆఫీసుకి వెళ్లే హడావిడిలో పప్పు వండాలన్నా, రాత్రికి వేడివేడి అన్నం పెట్టాలన్నా.. అందరికీ గుర్తొచ్చే మొదటి వస్తువు కుక్కరే! అయితే, పాత కుక్కర్ పాడైపోయి కొత్తది కొనాలనుకున్నప్పుడు.. చాలా మందికి వచ్చే పెద్ద డౌట్... అల్యూమినియం కుక్కర్ కొనాలా? లేక స్టెయిన్‌లెస్ స్టీల్ కుక్కర్ కొనాలా?

పైకి చూడ్డానికి రెండు ఒకేలా అనిపించినా, వాడుకలో మాత్రం చాలా తేడాలు ఉన్నాయి. మొదటగా అల్యూమినియం కుక్కర్ విషయానికి వస్తే.. ఇది చాలా బరువు తక్కువగా ఉంటుంది మరియు చాలా వేగంగా వేడెక్కుతుంది. దీనివల్ల ప్రెషర్ (విజిల్) త్వరగా వచ్చి, వంట చాలా ఫాస్ట్‌గా అయిపోతుంది. పొద్దున్నే హడావిడిగా వంట పూర్తి చేయాలనుకునే వారికి ఇది బెస్ట్ ఛాయిస్!

ఇక స్టెయిన్‌లెస్ స్టీల్ కుక్కర్ విషయానికి వస్తే.. ఇది మరింత బలంగా, తుప్పు పట్టని మెటీరియల్‌తో తయారవుతుంది. ఇప్పుడు వస్తున్న కొత్త స్టీల్ కుక్కర్ల అడుగుభాగంలో వేడి సమానంగా అందడానికి అల్యూమినియం లేదా ఇండక్షన్ ప్లేట్‌ను వాడుతున్నారు. ఇది వేడెక్కడానికి అల్యూమినియం కంటే కొంచెం ఎక్కువ సమయం తీసుకుంటుంది, కానీ వేడిని ఎక్కువ సేపు పట్టి ఉంచుతుంది.

మరి ఆరోగ్యం, సేఫ్టీ విషయంలో ఏది సేఫ్? బ్రాండెడ్ కంపెనీల అల్యూమినియం, స్టీల్ కుక్కర్లు రెండూ సురక్షితమే అయినప్పటికీ.. లాంగ్ రన్‌లో చూస్తే స్టెయిన్‌లెస్ స్టీల్ కుక్కరే అత్యంత సురక్షితం. ఎందుకంటే అల్యూమినియం కుక్కర్లలో టమాటో, చింతపండు వంటి పులుపు వస్తువులు వండినప్పుడు.. ఆ పులుపు అల్యూమినియంతో రియాక్ట్ అయ్యే అవకాశం ఉంటుంది. కానీ స్టీల్ కుక్కర్‌తో ఆ భయం అస్సలు ఉండదు. పైగా స్టీల్ కుక్కర్‌కు గీతలు పడటం, అరిగిపోవడం, తుప్పు పట్టడం వంటి సమస్యలు ఉండవు కాబట్టి ఇది ఎక్కువ కాలం మన్నుతుంది.

చివరగా చెప్పాలంటే.. మీకు తక్కువ బడ్జెట్‌లో, వేగంగా వంట అయిపోవాలంటే అల్యూమినియం కుక్కర్ వైపు వెళ్ళవచ్చు. కానీ ఆరోగ్యం, మన్నిక, లాంగ్ లైఫ్ ముఖ్యం అనుకుంటే మాత్రం కొంచెం ఎక్కువ ఖర్చయినా స్టెయిన్‌లెస్ స్టీల్ కుక్కర్ కొనడమే మంచిది!