Monsoon: వర్షాకాలంలో ఈ ఆహారాలకు దూరంగా ఉండాల్సిందే.. లేదంటే ఇన్ఫెక్షన్ల ముప్పు తప్పదు.. నిపుణుల హెచ్చరిక

Monsoon: ఎండల తీవ్రత తగ్గి వర్షాలు ప్రారంభం కాగానే వాతావరణం ఎంతో ఆహ్లాదకరంగా మారుతుంది. అయితే ఇదే సమయంలో గాలిలో తేమ శాతం పెరగడం వల్ల వివిధ రకాల ఇన్ఫెక్షన్లు, బ్యాక్టీరియా, వైరస్‌లు వేగంగా విజృంభిస్తాయి. వీటికి తోడు వర్షాకాలంలో మన శరీరంలో జీర్ణక్రియ శక్తి మందగిస్తుంది. అందువల్ల ఈ సీజన్‌లో రోగాల బారిన పడకుండా ఆరోగ్యంగా ఉండాలంటే మన ఆహార అలవాట్లలో కొన్ని ముఖ్యమైన మార్పులు చేసుకోవాలని ఆరోగ్య నిపుణులు హెచ్చరిస్తున్నారు. ముఖ్యంగా వర్షాకాలంలో అస్సలు తినకూడని కొన్ని ఆహారాల గురించి ఇప్పుడు తెలుసుకుందాం.

రోడ్డు పక్కన దొరికే స్ట్రీట్ ఫుడ్స్..

వర్షం పడేటప్పుడు వేడివేడిగా చాట్, పానీపూరి, సమోసాలు తినాలనిపించడం సహజం. కానీ, వర్షాకాలంలో రోడ్డు పక్కన తెరిచి ఉంచే ఆహార పదార్థాలపై బ్యాక్టీరియా సులభంగా చేరుతుంది. ఈ సీజన్‌లో ఈగలు, దోమల తాకిడి ఎక్కువగా ఉండటం వల్ల ఈ ఆహారాలు కలుషితమై విరేచనాలు, కలరా, గ్యాస్ట్రోఎంటరైటిస్ వంటి తీవ్రమైన కడుపు ఇన్ఫెక్షన్లకు దారితీస్తాయి.

పచ్చటి ఆకుకూరలు

సాధారణంగా ఆకుకూరలు ఆరోగ్యానికి ఎంతో మంచివి. కానీ వర్షాకాలంలో వీటికి దూరంగా ఉండటమే శ్రేయస్కరం. ఎందుకంటే వర్షపు నీరు, తేమ వల్ల ఆకుకూరల మధ్యలో కంటికి కనిపించని సూక్ష్మక్రిములు, పురుగులు, బ్యాక్టీరియా వేగంగా పెరుగుతాయి. వీటిని సరిగ్గా కడగకుండా తింటే ఇన్ఫెక్షన్లు వచ్చే ప్రమాదం చాలా ఎక్కువ. ఒకవేళ తినాల్సి వస్తే, బాగా ఉడికించి మాత్రమే తీసుకోవాలి.

సీఫుడ్స్

వర్షాకాలం అనేది చాలా రకాల చేపలు మరియు సముద్ర జీవుల ప్రసవ కాలం. ఈ సమయంలో లభించే సముద్రపు ఆహారం అంత సురక్షితం కాదు. పైగా నీరు కలుషితమవడం వల్ల చేపల ద్వారా మన శరీరంలోకి ఇన్ఫెక్షన్లు చేరే అవకాశం ఉంది. కాబట్టి వర్షాలు ఎక్కువగా ఉన్నప్పుడు సీఫుడ్‌కు దూరంగా ఉండటం మంచిది.

నూనెలో వేయించిన భారీ ఆహారాలు

వర్షాకాలంలో మన జీర్ణవ్యవస్థ చాలా సున్నితంగా, నెమ్మదిగా పనిచేస్తుంది. ఈ సమయంలో పూరీలు, పకోడీలు, బజ్జీలు వంటి నూనె పదార్థాలు ఎక్కువగా తింటే అవి సరిగ్గా అరగక గ్యాస్, ఎసిడిటీ, అజీర్ణం మరియు కడుపు ఉబ్బరం వంటి సమస్యలు తలెత్తుతాయి.

ఆరోగ్యంగా ఉండటానికి నిపుణుల సలహా..

వర్షాకాలంలో ఎల్లప్పుడూ వేడివేడిగా వండిన తాజా ఆహారాన్ని మాత్రమే తినాలి.

త్రాగే నీటిని బాగా మరిగించి, చల్లార్చుకుని తాగడం వల్ల నీటి ద్వారా వచ్చే వ్యాధులను అరికట్టవచ్చు.

రోగనిరోధక శక్తిని పెంచే అల్లం, వెల్లుల్లి, పసుపు, మిరియాలు వంటి వాటిని రోజువారీ ఆహారంలో చేర్చుకోవాలి.

నోటికి రుచిగా అనిపించే జంక్ ఫుడ్స్ కంటే, ఈ వర్షాకాలంలో సులభంగా జీర్ణమయ్యే ఇంటి భోజనానికి ప్రాధాన్యత ఇవ్వడమే మీ ఆరోగ్యానికి శ్రీరామరక్ష..