Weakening Your Bones: జాగ్రత్త.. మన ఈ చిన్న అలవాట్లే ఎముకలను బలహీనపరుస్తున్నాయి..

Weakening Your Bones: నేటి ఆధునిక కాలంలో వయసుతో సంబంధం లేకుండా చాలా మందిని వేధిస్తున్న సమస్య ఎముకల బలహీనత, కీళ్ల నొప్పులు. కొద్దిగా పనిచేసినా తీవ్రమైన అలసట రావడం, మోకాళ్ల నొప్పులు రావడం ఈ రోజుల్లో సర్వసాధారణం అయిపోయింది. ఎముకల్లో నొప్పి అనగానే చాలా మంది కేవలం కాల్షియం లోపం వల్లే ఇలా జరుగుతుందని భావిస్తారు. అయితే, ఎముకల బలహీనతకు కేవలం కాల్షియం లోపం మాత్రమే కారణం కాదు, మన దైనందిన జీవితంలో చేసే కొన్ని పొరపాట్లు, చెడు అలవాట్లు కూడా దీనికి ప్రధాన కారణమని ఆరోగ్య నిపుణులు హెచ్చరిస్తున్నారు. ఎముకల ఆరోగ్యాన్ని దెబ్బతీసే ఆ అలవాట్లు ఏమిటి? వాటిని అధిగమించడానికి ఎలాంటి జాగ్రత్తలు తీసుకోవాలో ఇప్పుడు తెలుసుకుందాం.

ఎముకలను బలహీనపరిచే ముఖ్య కారణాలు..

వ్యాయామం లేకపోవడం:

నిరంతరం కూర్చుని ఉండే జీవనశైలి వల్ల ఎముకల సాంద్రతవేగంగా తగ్గిపోతుంది. శారీరక శ్రమ లేకపోవడం ఎముకల బలహీనతకు దారితీస్తుంది.

ధూమపానం, మద్యపానం:

అధికంగా మద్యం సేవించడం, సిగరెట్లు తాగడం వల్ల ఎముకలు క్రమంగా తమ బలాన్ని కోల్పోతాయి.

విటమిన్-డి లోపం:

శరీరానికి తగినంత ఎండ తగలకపోవడం వల్ల విటమిన్-డి లోపిస్తుంది. ఇది ఎముకలు కాల్షియాన్ని గ్రహించే సామర్థ్యాన్ని తగ్గిస్తుంది.

అనారోగ్యకరమైన ఆహారం:

జంక్ ఫుడ్స్, నూనె పదార్ధాలు ఎక్కువగా తీసుకోవడం, సుదీర్ఘకాలం పాటు కొన్ని రకాల మందులను వాడటం వల్ల కూడా ఎముకలు గుల్లబారిపోతాయి.

ఎముకలు వజ్రంలా గట్టిపడాలంటే ఏం చేయాలి?

రోజూ వ్యాయామం:

ప్రతిరోజూ క్రమం తప్పకుండా వాకింగ్, రన్నింగ్, మెట్లు ఎక్కడం లేదా తక్కువ బరువులు ఎత్తే వ్యాయామాలు చేయడం వల్ల ఎముకలు దృఢంగా మారుతాయి.

సూర్యరశ్మి:

ప్రతిరోజూ ఉదయం కొద్దిసేపు ఎండలో గడపడం వల్ల శరీరానికి అవసరమైన విటమిన్-డి సహజంగా లభిస్తుంది.

బరువు నియంత్రణ:

శరీర బరువు ఎల్లప్పుడూ అదుపులో ఉండేలా చూసుకోవాలి. అలాగే ధూమపానం, మద్యపానానికి దూరంగా ఉండటం ఎంతో ముఖ్యం.

ఒకేచోట కూర్చోవద్దు:

ఆఫీసుల్లో లేదా ఇళ్లలో గంటల తరబడి ఒకే చోట కూర్చోవడం మానేసి, మధ్యమధ్యలో చిన్నపాటి విరామం తీసుకుంటూ నడవాలి.

ఎముకల ఆరోగ్యానికి మేలు చేసే ఆహారాలు..

ఎముకలు బలంగా ఉండటానికి రోజూ తీసుకునే ఆహారంలో పాలు, పెరుగు, పనీర్, బాదం పప్పులు, ఆకుకూరలను భాగం చేసుకోవాలి. శరీరానికి సరిపడా నీటిని తాగడం కూడా ఎంతో అవసరం.